أجمل حاجة قريتها عن الصبر النهاردة..
هي إن الإنسان مطالب بالصبر.. لو وقع عليه البلاء؛ صبر.. لكن مش مطالب بالرضا عن البلاء .. لأن الرضا على البلاء والأذى مستحب.. مش واجب شرعي يأثم تاركه..
يعني إيه؟
لو لا قدر الله اتعرضت لمحنة.. و المحنة ممنعتكش انك تؤدي الفرائض إللي عليك.. ومكنتش حجة انك ترد على المحنة بذنب أو بشر أو بأذية حد تاني.. يعني المحنة ممنعتكش من انك تطيع الله ومتسببتش ليك في معصية.. كده انت صبرت.. واديت ما عليك من الصبر..
أما الرضى عنها فده شيء قلبي.. لو لا قدر الله مريت بمحنة.. وقلبك من جوة شديد التأثر بالمحنة ورغم علمه بحكمة الله في اقداره إلا إنه بيحاول يخفف المحنة.. بيحاول يدفعها.. بيحاول يقاومها.. حتى ولو فشل في كل ده فهو من جواه بيتمنى لو انها لا تصيبه.. فرحمة ربنا هنا هي إنه بيكتفي بصبر العباد على المحن وإن لم يرضوا بها طالما ثابتين على دينهم وقلوبهم ثابتة على الطاعات .. وإن كان الرضا عليه أجر عظيم.. لكن لو حسيت من جوة قلبك إنك مش راضي عن قضاء معين.. بس في نفس الوقت أنت محافظ على عبادتك ودعاؤك وعملك الصالح وصدقاتك.... فأنت مش وحش.. أنت مش عاصي ولا مذنب.. أنت كده ضمن رحمة الله.. اللي أعلم منك ببشريتك..
مش بس كده.. أنا مكنتش أعرف إن الصبر بيدخل معانا في العبادات.. كنت فاكره مرتبط بالمحن بس..
اتاري الصبر تقريباً بيحيط بكل عبادة وكل عمل وكل أمر في الدين.. حتى إن الصبر بيوصل للصبر على كلام الناس.. والصبر على ضيق الرزق.. والصبر على مشقة العمل.. والصبر على أذى الجار.. كلها من الصبر إللي يؤجر صاحبه
الأول: ﺍﻟﺼﺒﺮ ﻋﻠﻰ أداء الطاعة بحيث يحتسب الأجر في فعلها ويصبر على مشقتها ويؤديها على الوجه المشروع ويداوم على فعلها قال تعالى: (يَا بُنَيَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنْكَرِ وَاصْبِرْ عَلَى مَا أَصَابَكَ إِنَّ ذَلِكَ مِنْ عَزْمِ الْأمور).
الثاني: ﺍﻟﺼﺒﺮ ﻋﻦ ارتكاب معصية الله بحيث يجاهد هواه والشيطان ويصبر على مشقة ترك المألوف واجتناب الفساد وأهله ﻗﺎﻝ ﺍﻟﻠﻪ ﷻ : (وَالَّذِينَ صَبَرُوا ابْتِغَاءَ وَجْهِ رَبِّهِمْ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرًّا وَعَلَانِيَةً وَيَدْرَءُونَ بِالْحَسَنَةِ السَّيِّئَةَ أُولَٰئِكَ لَهُمْ عُقْبَى الدَّارِ).
الثالث: ﺍﻟﺼﺒﺮ ﻋﻠﻰ ﺍﻷﻗﺪﺍﺭ المؤلمة بحيث يصبر على مشقتها والآثار المترتبة عليها ويتجنب جميع الأقوال والأفعال التي تسخط الرب قال تعالى: (الَّذِينَ إِذَا أَصَابَتْهُم مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُولَٰئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَٰئِكَ هُمُ الْمُهْتَدُونَ).
وعشان كده.. شيء في منتهى الجمال والراحة النفسية لما تعرف إن البشرى إللي بيحملها القرآن للصابرين.. بشرى على كل أعمالهم.. بشر الصابرين على كل أنواع صبرهم.. وده ليه ثواب عظيم..
ربنا يصبرنا ويربط على قلوبنا ويثبتنا على دينه..
أنت تقرأ
رقائق 2
Randomمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
