- كتير من البنات عايزين يعملوا ميكس فيمينيز.مي إسلامي شقي ياخدوا بيه كل المزايا "الظاهرية".. بغض النظر عن تمسكهم بـ فكرة معينة.. وبغض النظر عن الصح والغلط..
- مثلاً لما قولت إن الست شغلتها الأساسية البيت، وممكن تشتغل وتعمل كارير وفلوس لنفسها من غير ماتقصر في بيتها.. والراجل مهمته الأساسية المصاريف وممكن يشارك في شغل البيت تكرماً..
- قالوا لأ.. شغل الراجل في البيت واجب عليه مش تكرماً ولا حاجة.. وأصلاً شرعاً المفروض يجيب لمراته خدامة..
- تقولها تمام.. يعني انتي مرجعك الشرع؟ طاب يا ستي.. نفس المشكلة دي حصلت بين السيدة فاطمة وسيدنا علي رضي الله عنهم.. وراحوا للنبي صلى الله عليه وسلم عشان يحكم بينهم..
- وسيدنا النبي حكم على سيدنا علي بالأعمال الظاهرة اللي هي أي حاجه برة البيت.. وحكم على السيدة فاطمة بالأعمال الباطنة اللي هي شغل البيت..
- والعلماء استدلوا بالواقعة دي إن مفيش حاجه اسمها الزوج يجيب خادمة ولا حاجة وإن شغل البيت على الزوجة، والشغل برة البيت على الزوج..
- وحتى العلماء اللي قالوا إنه يجيب خادمة.. ربطوا الموضوع بشرط من اتنين..
- الأول إنها تكون مش متعودة تخدم نفسها "يعني كان ليها خادمة وهي في بيت والدها"..
- أو التاني إنها تكون مريضة أو عاجزة عن خدمة نفسها.. فـ ساعتها يجيبلها خادمة..
- تقتنع وتسكت؟ لأ ازاي..
- تقولك احنا مش زي النبي والصحابة.. والزمن غير الزمن.. ودلوقتي الحياة صعبة.. وفي أوروبا والدول المتقدمة في مساواة بين الراجل والست.. فـ المفروض جوزي يشتغل في البيت زيه زيي، هو مش أحسن مني في حاجه..
- تقولها طاب في أوروبا والدول المتقدمة بيشاركوا في كل حاجه مش في شغل البيت بس.. إيجار البيت بيبقى بالنص.. كل الفواتير بالنص.. الأكل والشرب بالنص.. يعني كنتي المفروض تعترضي برضو لما قولت إنك تشتغلي لنفسك..
- تقولك لأ.. أصل النفقة شرعاً على الزوج، والمفروض انا مادفعش ولا مليم وجوزي هو اللي يجيب كل حاجه.. الشقه ويوضبها، والعفش، والأجهزة الفول أوتوماتيك، وشبكة بـ خمسين ألف، ومهر عشروميت ألف، وفرح في جراند لامور، وشهر عسل في دهب، ويصرف عليا وعلى البيت وعلى العيال..
- تقولها ماشي كل دا حقك طبعاً.. بس أنا برضو شرعاً ليا حقوق، أبسطها الطاعة.. تقولك لأ انت مش هتتحكم فيا، الستات بره طلعوا القمر وانت عايز تقولي أعمل ايه وماعملش ايه! .. تقولها طاب بره بيتجوزوا بـ دبلة بس، وكل حاجه بتبقى بالنص في حدود إمكانياتهم من غير ما الراجل يقعد يعمل جمعيات خمستاشر سنه عشان يحوش مليون جنيه يتجوز بيهم.. تقولك بس ربنا قال...
- المهم إنك تجيبها بالدين.. تقولك مساواة.. تقولها ماشي يا ستي مساواة.. تقولك قال الله وقال الرسول.. تقولها ماشي يا ستي قال الله "وللرجال عليهن درجة".. تقولك انت مش حافظ غير الآية دي؟ عايزين مساواة.. ماشي يا ستي واحنا بنتجوز وبعد الجواز هنقسم كل حاجه بالنص.. تقولك ربنا قال "اسكنوهن من حيث سكنتم" وقال "وأنفقوا عليهن".. طاب يا ستي هجيبلك سكن واصرف عليكي بس تديني حقوقي وتسمعي كلامي.. تقولك لأ بس ليدي جاجا قالت إني Independent ومش محتاجه أوامر من رجاله.. طاب خلاص مش هأمرك بحاجه بس انتي كمان ماتطلبيش مني حاجه واعتمدي على نفسك.. تقولك النبي قال "كفى بالمرء إثماً أن يضيع من يقوت".. تقولها يعني انا اللي هصرف عليكي اهو، يبقى تسمعي كلامي.. تقولك بس الأستاذة أمال ماهر قالت إني قادرة ع التحدي و ع المواجهة وماجبتش سيرتك في الأغنية..
- المهم يعني انها هتلففك في دايرة مفرغة، وهتاخدك رايح جاي، وهتقعد تلاعبك شيكا ع العالي وشيكا ع الواطي.. وفي الآخر هتأكلك جاتوة وتكسب النقاش، وهتطلعك ذكو.ري، وهتبان في وسط صحابها أنها بهذه القوة..
- وهيفضل الوضع كما هو عليه، أكتر من 30% من شباب وبنات مصر عدوا الـ 30 من غير جواز.. فوق الـ 2 مليون حالة طلاق سنوياً.. كل حالة طلاق فيها على الأقل عيل او اتنين هيتشردوا أو هيقضوا طفولتهم في المحاكم، أو في أحسن الأحوال هيعيشوا بعيد عن أبوهم أو أمهم..
- حقيقي الوضع محزن جداً ومحتاج يتغير.. اقرأوا يا جماعه، واحضروا دورات تأهيل للجواز.. اعرفوا واجباتكم قبل حقوقكم مش العكس.. اتأنوا وانتم بتختاروا شريك/ة حياتكم.. وطوّلوا فترة الخطوبة.. وماتخلفوش في أول سنة جواز.. واعرفوا إن الدنيا بعد الجواز بتمشي بالحب.. ماهياش حرب.. ولا جمايل بنردها لبعض.. ولا حسبة هنمسكلها ورقة وقلم!
د. محمد فهيم
أنت تقرأ
رقائق 2
Losoweمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
