- كل سنة بعد رمضان بحب أفكر نفسي بحديث النبي صلى الله عليه وسلم "خير الأعمال أدومها وإن قل".. الحديث دا جميل جداً، ولو فهمته كويس وطبقته هيغيرك تماماً.. هتلاقي نفسك بتنجز حاجات في دراستك، وشغلك، وحياتك عموماً ماكنتش تتخيل إنك ممكن تنجزها..
- مبدأياً حاول تداوم بعد رمضان على اللي كنت بتعمله في رمضان، ومالكش دعوة بالكمية.. كمل في القيام، حتى لو كنت بتصلي 20 ركعة ودلوقتي هتصلي 4 بس.. ماتقطعش قراءة القرآن.. مش لازم تقرأ كل يوم جزء ولا جزئين زي رمضان.. اقرأ ولو ربع واحد، المهم ماتهجرش القرآن خالص.. الكمية ماهياش مهمة أد ما مهم إن العمل نفسه يكون موجود..
- وعلى فكرة الموضوع مش مقتصر على العبادات.. يعني لما تقرأ صفحة واحده من كتاب كل يوم، أحسن ما تركن الكتاب خالص، وتقول لما أفضى هبقى أقرأه كله.. عشان الحقيقة انت مع الوقت بتنشغل أكتر مش بتفضى..
- انا عن نفسي كنت بركن الكتب واقول الكتاب دا مش عارف كام صفحة، لازم أفضاله.. ولقيت الأيام والشهور بتعدي ولسه مافتحتش ولا كتاب.. بعدها قولت خلاص أمسك 10 صفح بس من كل كتاب كل يوم.. جيت بعدها بـ سنة لقيت كتاب والتاني والتالت خلصوا والرابع وصلت لنصه والخامس قطعت فيه شوط كبير.. وسبحان الله التيكست بوك السبعتلاف صفحة، اللي كنت بقول مستحيل ألاقي وقت أقرأه لو قعدت مليون سنة، طلع بيخلص عادي!
- أول لما فتحت تفسير ابن كثير لقيته مفسّر "أعوذ بالله من الشيطان الرجيم" في 40 صفحة تقريباً.. قلت صباح الفل دا عايز عُمر تاني عشان أقرأُه فيه.. وبعدين قلت هقرأ كل يوم آية واحدة.. بدأت من سنتين تقريباً ودلوقتي بفضل الله خلصت الفاتحة والبقرة وبخلص آل عمران اهو..
- برضو كنت بأجل التمرين واقول لازم ابقى فاضي وفي المود وحاجتي كلها جاهزة ومش عارف ايه..! والنتيجة إني كنت بقعد أسابيع ماتمرنش.. بعدها قولت طاب مانا أتمرن كل يوم إنشالله لو نص ساعة بس.. ونص ساعة على نص ساعة.. لقيت نفسي اخر الشهر اتمرنت أضعاف اللي كنت هتمرنه لو كنت استنيت الـ Perfect day والـ Perfect mode والـ Perfect circumstances..
- المهم يعني عشان ماطولش أكتر من كدا.. أحاديث النبي صلى الله عليه وسلم جميلة جداً.. فعلاً أوتي جوامع الكلم.. وفي كلامه خير الدنيا والآخرة.. دا مثلاً حديث أربع كلمات.. لو خليته اسلوب حياة، هتلاقي حياتك اتغيرت فعلياً.. ولو اتطلعت باقي الأحاديث، هتلاقي كل حديث بيديك صفة حلوة أو بيشيل منك صفة وحشة أو بيوعيك على حاجه انت مش واخد بالك منها..
#Gaza_Under_Attack
د. محمد فهيم
أنت تقرأ
رقائق 2
De Todoمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
