كل البنات إللي في العالم عندهم مناطق في جسمهم اغمق من لون جسمهم الطبيعي وأقسملك إنه كل البنات كده فعلا ما عدا حالات نادرة مثلاً لا تتعدى الـ 1% ، وأغلب البنات عندها Stretch marks حتى لو مش متجوزة ولا حامل ده طبيعي لأننا بشر بيخس ويتخن وجسمه ده متغطي بجلد مش طوب فـ بيتأثر بالوزن والصحة والنفسية .
كل البنات بيطلعلها حبوب وعندها تصبغات وهالات ومفيش حد معندوش مشاكل في بشرته أو جسمه أو شعره
مفيش حد شعره مفرود زي المكواة ما بتفرد ، مفيش حد بشرته كلها لون واحد ولا جسمه كله لون واحد ، مفيش حد مثالي .
بلوجرز الأنستا والميكب أرتست ومشاهدة الفنانات على شاشات التلفزيون ، عملوا نموذج للجمال وهو الجمال الخالي من العيوب مع العلم أن مش ده شكلهم الطبيعي والله العظيم ، وخلوا في بنات كتير أوي تكرهه شكلها فعلا وتتحسر
والتأثير مش بس على البنات لأ وعلى الشباب كمان ، لما يشوف ممثلة ولا بلوجر هارية نفسها ميكب وفوتوشوب وشفط ونفخ ونحت وتفتيح ويفتكروا أن كل دة طبيعي ويقعدوا يقارنوا بالبنات إللي حواليهم بمنتهى السطحية وفي رجاله بتنغص حياة مراتاتهم بسبب المناظر دي ويفضل باصصلها إنتي ليه مش زيهم ؟
أنا آسفة في إللي هقوله بس ده حقيقة إن في مصر بوجه خاص والوطن العربي بشكل عام ، أغلب الجمال منحصر في لون البشرة والعيون والجسم وللأسف كل ما كنتي على قدر أعلى من الجمال كل ما هتتعاملي أحسن وتلاقي الفرص الكويسة بتتهافت عليكي ومش عايزة حد يعارضني في النقطة دي نهائي .
فـ أنا آسفة لأي بنت حد ضايقها في يوم ، والله إنتي حلوة .. حلوة جدآ لأنك خلق الله الذي أحسن كل شيء خلقه ، ومحدش هيقدر يخليكي تثقي في نفسك غير نفسك ، أنا فعلاً آسفة ليكي نيابة عن وقاحة العالم ..🌸
أنت تقرأ
رقائق 2
Nezařaditelnéمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
