BnSamy
الجهاز المركزي أعلن زيادة عدد سكان مصر نصف مليون في 110 يوم؛ ورغم إن الرقم دا يبان ضخم لكنه أقل نسبة زيادة تحصل في مصر يمكن من العصر الملكي؛ لكن تم الترويج لها إعلامياً بطريقة "يالهوي زدنا نص مليون".
*️⃣ نسبة الزيادة في السكان كده تقريبا 1.65% حالياً ودي نسبة مرتفعه بالمقارنة بالمقاييس العالمية لكنها برضك بتخلي مصر بره قايمة أكبر 50 دولة في معدلات النمو السكاني.
*️⃣ الخبراء الاقتصاديين بتوع العالم الثالث عندنا بيقولوا لازم النمو يبقي 1% بس عشان تحس بالتقدم... لكن هل دا فعلاً ممكن؟
*️⃣ البوست دا عكس المتوقع؛ مش هتكلم خالص عالجانب الاقتصادي؛ لا هقول تكلفة المواليد عالاقتصاد كام من دعم غذاء وصحة وتموين ووسائل مواصلات بتتحرك ببنزين مدعم وكهرباء . ولا برضك الاستفادة اللي بيعملوها لان طفل يتولد يعني مستشفي هتشتغل ودكتور وممرضين وبتاع ملابس أطفال وبامبرز وأغذية ووو... ولو الاطفال مبقوش موجودين كل دول هيقفلوا.
*️⃣ البوست دا بقي هو دردشة حول فكرة إننا نفترض جدلاً ان فعلاً هي المشكلة الوحيدة لاقتصادنا هي الأطفال؛ يعني لولا الزيادة السكانية كان زمانا سويسرا . سيبك من كل دا وتعالوا نقول كل ما سبق صح 100% لكن هل بقي ممكن تخفيض معدلات المواليد وتبقي الزيادة السكانية تحت 1% ؟
*️⃣ هل انتا متخيل إن الأوروبيين قرروا يعملوا معدلات نمو سكاني منخفضة جداً عشان يبقوا متقدمين؟ الإجابة هي لا... اللي حصل جه بواسطة هندسة تدمير الأسرة و المجتمع..
*️⃣ تعرف أي دولة واحدة في الكوكب؛ فيها ناس ملتزمة دينيا يعني الزنى ممنوع؛ الشاب بيتخرج يبحث عن زوجة ويتجوزوا وعادة دي الأسرة اللي بيكونها لباقي حياته... والراجل بيروح الشغل والست في البيت ترعي البيت وتشرف عالأطفال؛ والدولة دي عندها معدلات نمو سكاني قليلة ؟ لو حد يعرف اسم دولة كده يقولي عليها.
*️⃣ الغرب بقي كده عشان هو دمر منظومة الأسرة... انتا شاب وشابه عندكم غريزة جنسية؛ ليه تتجوزوا ويبقي في التزامات؟ قضوها عادي... وبص يا شاب في مليون بنت قصادك ليه تلتزم مع واحدة؟ دي شهرين ودي سنتين وهكذا... وانتي يا بنت خدي بالك؛ دا مش جوزك؛ فممكن يسيبك في أي وقت؛ فلو حملتي هتبقي Single Mother ودا بيقلل فرصك في انك تلاقي راجل تاني تقضيها معاه.
*️⃣ وحتى لو اتجوزتم؛ ليه تخلفي؟ ومستقبلك وطموحك وانتي سترونج اندبندنت واحدة ست؛ هتحملي وترضعي ودا هيعطلك في مسيرتك؛ اه في ستات هيقدروا يعملوا الاقنين بس الغالبية مش هتقدر... فانتا تضحي بمسيرتك وتلبسي في عيل وبعدين الراجل يسيبك.
*️⃣ كونك واحدة ست مستقلة يخلي محدش ليه كلمة عليكي وانتي حرة؛ بس دا برضك معناه إنك مش هتقدري تروحي لأبوكي واخوكي ؛ وحتي لو روحتي فالمجتمعات هناك خلت الرجالة مش رجالة؛ فعادي اختك تبقي في ازمة وانتا راجل قرونك للسماء ومتساعدهاش من منطلق كل واحد حر في حياته... زي ما انا مليش كلمة عليها؛ برضك مفيش عليا التزام نحوها.
*️⃣ السؤال بقي هل دا ممكن يحصل في مصر؛ مفهوم الانجاب في مصر حصري للجواز؛ فهل ممكن في مصر تقولهم اتجوزوا ومتخلفوش؟
*️⃣ لما تيجي تبص علي اللي بيحصل في قوانين وغيره ؛ الظروف اقتصادية فالجواز صعب؛ عراقيل وخوازيق كثير وتركيز علي موضوع ممكن تتحبس بالقايمة وممكن تخلعك من وراك ووو... الفكرة هي انك تضرب مفهوم الأسرة؛ تعيش بنظام حرص ومقلق من الطرف الثاني... دا ممكن يتجوز عليكي دا ممكن يسرق ذهبك ويعمل ويعمل.
*️⃣ بالإضافة ل موضة متخلفيش غير بعد كذا سنة بحيث تضمني؛ ومتخلفيش عشان جسمك يفضل جميل؛ متخلفيش عشان هيعطلك عن مسيرتك العلمية.
*️⃣ ضيف مع دا حالة التفسخ الأسري المنتشرة؛ طمع الأقارب في ثروات بعض فدا بقى يخلي الكل خايف من بعضه والناس تبعد عن بعضها ويحصل التفكك العائلي المطلوب... ومش هيحاول الإعلام يدور ايه سبب وجود المشاكل دي... مش هتلاقي أي عمل بيناقش سبب طمع الأقارب في بعضهم لكن هتلاقي مسلسلات تناقش ضرر التقارب العائلي... يمكن آخرهم مسلسل منى زكي اللي تقريباً خلى كثيرين يقولوا لازم الجد يبقى بعيد عن أحفاده بل شوفت بوستات عالفيسبوك لناس بتسأل أعمل ايه عشان لو مت فجأة مراتي تبقى الوصية على عيالي... الناس خلاص مبقتش واثقة في أهلها...
*️⃣ فكده نضمن إن العيلة الكبيرة اللي دورها ترعى الأسرة الصغيرة وتمنع تفككها بالطلاق وغيره بقت مفككة... وفي الأسرة الصغيرة قلقنا الراجل من مراته إنها تغدر بيه وتخلعه وتسجنه بالقايمة... وقلقنا الست إنه يتجوز عليها ويطلقها وتبقى مطلقة معاها عيال ومحدش هيبص لها... نفس بتاعة الغرب يعني.
*️⃣ ضيف مع دا العوامل الاقتصادية؛ هيطلع عينك عشان تجيب فلوس تتجوز بيها واحدة مش هتسمع كلامك وتقولك زيي زيك ومش هخلف عشان جسمي ومش هرضع؛ والشيخ الفلاني يديها فتوى ووو... فمن هنا بدأ العزوف الرهيب للأسر المصرية في الزواج والإنجاب وزاد الطلاق... من 10 سنين كان معدل الزيادة السكانية 2.4% ودلوقتي أهو 1.65%... واخدين بالكم من سرعة الانهيار.
*️⃣ شوف أي دولة تحبها وقارن بين المناطق الملتزمة شوية دينياً... مش شرط بلاد مسلمة؛ حتى في الغرب؛ المناطق الريفية أو اللي بيتنشر فيها الزواج ومفهوم الأسرة الطبيعية هتلاقيهم بيخلفوا وعاملين معدلات نمو كبيرة؛ وممكن باقي الدولة بالسالب فيكون إجمالي الدولة سالب... لكن اللي أقصده إن الشكل الطبيعي إن راجل ومراته وأسرة طبيعية فلازم طبيعي يخلفوا... لكن مجتمعات ملهاش في الزواج أو ممكن يتجوزوا على سن 30-35 سنة فكده خلاص ضمنا إنهم هيعيشوا بدون أطفال. ودا المستهدف.
نكتفي بهذا القدر وهتلاقوه البوست مشروح بتفاصيل أكثر كمان في اليوتيوب من اللينك التالي
https://youtu.be/wJtf0CpLaQQ
أنت تقرأ
رقائق 2
De Todoمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
