رقائق 2

اقرا روايات عادي

شوفت بوست دلوقتي لشخص ما فاته التريند وجاي يلحقه النهاردة بيدي معلومة لطيفة للناس ان قراءة الروايات الخيالية هي مجرد تسليه ومبتنميش الوعي ولا الذكاء ولا بتأثر في المخ ولا ليها لازمة
وحقيقي انا مكنتش triggered كده من ساعة اخر مرة سمعت حد بيقول الأرض مسطحة
مع كل احترامي لصاحب البوست بس الكلام ده بيقول ان هو محتاج فعلا انه يقرا اكتر فأي نوع من الكتب عشان ده هيخليه :
1- يزود قدرة مخه على الاستيعاب والتحليل فيفكر في الهبد قبل مايهبده
2- يقوي ذاكرته قصيرة المدى فيفتكر كل المعلومات عن اهمية القراءة للمخ اللي خدناها في المدرسة وكمان الذاكرة طويلة المدى فيحميه من الزهايمر عشان لما يكبر يفضل فاكر الحاجات دي وميقعدش يدي نوعية النصايح دي لأحفاده
3- يجرب يعمل تمارين لعقله ويزود نشاطه ويحفزه بشكل مستمر ويساعده على ربط الاحداث والاستنتاج ويقوي اتصال الحواس ويزود قدرة الاستيعاب عشان يقدر يستوعب ان الشطارة في الرياضة والفلسفة مش مقياس ذكاء
5- يتفهم ويتقبل ثقافات وطباع مختلفة ويكون منفتح اكتر على تقبل اوجه الاختلاف بين البشر وميولهم واهتماماتهم حتى لو بتتعارض معاه ويتعلم ان منظوره للعالم ضيق جدا ومينفعش يحكم على حد منه فيخلي رأيه اللي طالع من أفقه الضيق لنفسه
6- يوسع حصيلته اللغوية والفكرية عشان لما يحاول ينزل بوست تاني يبقى عارف علميا اللي بيقوله ميفتيش
7- يعرف ان الكتب مش لازم تكون عن قصة حياة مارتن لوثر كينج ولا كيف انهارت حضارة المايا عشان يستفاد منها ، ارتباط الانسان بشخصية في رواية ايا كان نوع الرواية يقدر يساعده انه يتخطى موقف او فترة فحياته لأن الشخصية دي تصرفها في موقف قدر ي relate ليه بيأثر فيه فعلا
8- يكتسب شيء من الذكاء الاجتماعي يخليه يقدر يتعامل مع مواقف كتير منها انه ميقولش حاجة فيها تقليل من اهتمامات الآخرين
9- هيكون عنده comfort zone او ملاذ آمن يلجأله ويستخبى فيه لما حد يفكره أد ايه العالم الواقعي قاسي ومقرف والروايات هي نوع من الهروب العاطفي اللي كل انسان محتاجه ومش محتاج حد ينطله فيه ويقوله دي مجرد تسلية مش هتفيدك بحاجة ويزود عنده احساس الذنب عشان بيضيع وقته فحاجات مش مفيدة من وجهة نظر حد تاني
في النهاية احب افكركوا ان القراءة في العموم مفيدة ايا كان اللي بتقراه ، اه في حاجات هتقراها وهيكون لقرائتها اضرار تتخطى الفايدة اللي جاية منها ، اه في بعض الأعمال اللي قرائتها مضرة ومضيعة للوقت وكرينج بلا هدف ، لكن رغم كده عملية القراءة فحد ذاتها حتى في "بعض" الأعمال دي مفيدة غصب عنك حتى لو مطلعتش منها بمعلومة مفيدة وعايز تاخد مخك تغسله بصابون بعدها ، برضو غصب عنك مخك استفاد عالأقل بنقطة واحدة من اللي فاتوا دول من اول انه عمل حبة ستريتشات وصحصح حواسك لحد انه اداك ساعتين برا الواقع
الذكاء انواع مش بس حفظ معلومات وارقام زي ماهي الصورة السائدة ، القدرة البلاغية ، قدرة الابداع ، الخيال الواسع ، الذكاء العاطفي ، المعلومات العامة ، الذكاء الاجتماعي ، كل ده بتكتسبه سواء بتقرا كتب في علم فيزياء الكم او فانفيكشن وصاحب البوست لو كان بيقرأ كفاية مش شاغل نفسه بأنتقاد اهتمامات الآخرين والحكم عليهم كان عرف ده