رقائق 2

ازاي تعرف سبب الذنب هوى ولا وسوسة ؟

إزاي تعرف إن الذنب إللي أنت عملته ده سببه وسوسة الشيطان ولا نفسك الأمارة بالسوء؟
السؤال ده جاوب عليه الشعراوي بشكل عبقري وأكثر من رائع..

الذنب الغريب عليك وإللي معملتوش قبل كده.. لو وقعت فيه يبقى أنت سمحت للشيطان إنه يوسوسلك ويزيّنلك الذنب ده.. الشيطان غرضه إنك تعصي الله من خلال إنك تجرّب أكبر عدد ممكن من الذنوب.. الشيطان بيستخبى ورا دافع الفضول لأي حاجة مجربتهاش قبل كده.. لو مسرقتش قبل هيلح عليك تجرّب السرقة.. لو مشربتش خمرة هيلح عليك تجرّب ولو مرة بدافع الفضول.. لكن ده مش فضول.. ده الشيطان عايزك تجرب الحرام بنفس طريقة آدم لما خلاه يجرب ياكل من الشجرة ولو لمرة..

أما الذنوب إللي أنت بالفعل واقع فيها.. دي من نفسك الأمارة بالسوء.. نفسك غرضها تحصّل أكبر قدر ممكن من اللذات والشهوات.. شراهة في الأكل.. شراهة في الجنس.. شراهة في التملّك والتمسك بالدنيا.. شراهة حتى في تعظيم الذات والإعجاب بالنفس والغرور.. كل ده من النفس الأمارة بالسوء.. نفسك هي إللي ورا الذنوب المتكررة عشان تخليها معتادة بالنسبالك..

الشعراوي جاوب على سؤال كمان.. ليه مهم إننا نعرف مين اللي ورا الذنوب إللي بنقع فيها دي؟ نفوسنا ولا الشيطان؟ هتفرق؟
طبعاً هتفرق، لأن أساليب جـ8ـاد النفس غير أساليب دفع الشيطان..

الشيطان سهل انك توقفه.. سهل تبعده.. سهل تستعيذ منه.. تقدر تقفل كل الأبواب إللي بيجيلك منها من قبل حتى ما يفكّر هو يدخلك منها.. سهل تتحرّى الفتن وتتقّي الشبهات وتبعد عن أي شيء تظن إنه مدخل لحرام..

امّا النفوس فـجـ8ـادها صعب جدا.. النفس مبتقدرش تستعيذ منها.. مبتقدرش تبعدها عنك لأنها ملاصقة ليك.. بتكلمك وبتأمرك وبتحرضك.. ومش بس كده.. النفس عارفاك كويس وعارفة طريقة تفكيرك.. فبتقدّم هواها على إنه طبيعي ومنطقي.. بتقدّم طلباتها وبتغلفها بالمنطق وبتخليك تعمل الذنب وأنت مقتنع.. ودي كارثة ربنا ينجّينا منها..

حاجة كمان.. على حسب الكلام ده.. أنت بتواجه عدوين مش عدو واحد..!!
ده حقيقي.. مع ذلك لازم تبقى عارف إن الشيطان هو العدو الحقيقي..
نفسك - مع صعوبة جــ8ـادها فهي حتة منك... تقدر تروّضها بالتدريب وبمعرفة خباياها وأسرارها.. بمجرد ما تفهم نفسك هتسبقها بخطوة وتقدر تسيطر عليها.. إنما الشيطان ده هو اللي يستحيل تدخل في مواجهة معاه وتكسب.. مستحيل تنتصر عليه بمجرد ما تسلمه دماغك.. فالحل الوحيد انك متديلوش فرصة من أساسا يدخل دماغك أو تدخل معاه في مواجهة..
حاجة أخيرة.. في ناس بتعين الشيطان بأنها تطيع كل هواجس وأوامر النفس.. كل ما تشتهي تستجيب.. كل ما تريد تفعل.. كل ما تحب تُغرم.. كل ما تأمر تُطاع.. ودي الحاجة اللي بيقع فيها معظم الناس.. وبتخلي الإنسان ضعيف جدا قدام نفسه.. بدون ارادة وضعيف التحمل.. لأن الشيطان بيخدع النفس وبيرسملها هواها والنفس قوية.. فبكده الشيطان يستغل قوة النفس ويمرر كل شروره من خلال نفسك وعقلك .. يا ترى إيه العلاج؟

العلاج هو الاكتفاء..
تعرف ربنا حلّلك إيه وأجازلك  إيه وتكتفي بيه.. تكبح نفسك بأنك تطيعها فيما يرضي الله وتخالفها في كل ما يُغضب الله.. تساوم النفس بالمسموح وتحرمها من الممنوع.. تستبدل شعور التمرد بالرضى والنقمة بالنعمة.. إياك والكبت أو الحرمان الكامل.. تحمد ربنا وتشكر فضله على كل شيء يسرهولك.. وكل شيء منعه عنّك.. توكّل عنك الله ﷻ في كل ما يخصك.. تدعوه.. ترجوه.. تطلب عونه.. وتصبر على ما بلاك..
الصبر كفيل بأن يخلي ربنا يرضى عنك دنيا وآخرة..