رقائق 2

مظاهر الهشاشة النفسية

من ضمن مظاهر الهشاشة النفسية إللي مجتمعنا بقى غرقان فيها.. فكرة إن كُل حاجة عايزة دعم.. وكل فكرة تستحق التشجيع وكل مبادرة تستاهل يبقى ليها جمهور.. ودي آفة توحّشت بتوحّش السوشيال ميديا رغم تغذية المجتمع ليها بالتربية والتنشئة الخاطئة..

بتلاقي واحد قاعد يولول كل ما يشوف صايع من اياهم معاه فلوس واتشهر.. يقولك أنا دكتور وأنا مهندس.. ليه مش مشهور وليه معييش فلوس؟ ويبدأ يكتـ.. ئب ويندب حظه.. طيب أنت متضايق ليه؟ ما تعمل زيه؟ إيه مانعك؟ دينك؟ ما أنت اشتريت دينك بالغالي زعلان ليه بقى؟ صياحك المستمر ده هيفيدك أو هيفيد الناس بأيه.. ( أنا مريت بالمرحلة دي)

حد تاني بيتسول الدعم.. شجعوني يا جماعة أنا بعمل حاجات صح كتير.. جس وات.. العادي انك تعمل الصح.. العادي انك تكون انسان سوي.. العادي انك تحرص انك تتصرف بشكل سليم.. كل ده مش محتاج تشجيع.. ادعولي يا جماعة ألبس الحجاب.. طيب يا ستي هندعيلك حاضر.. بس انتي من الأساس معندكيش رغبة مش واخدة قرار ولا مبيتة نية .. عايزة الناس تشجّعك في حاجة زي دي ازاي؟

حد تالت بيتغذى على ردود أفعال الناس اتجاهه.. ده التعبير الشيك لمدمني لفت الانتباه.. يعمل الحاجة ويجري يبص ع الناس.. ها.. منبهرتوش؟ محدش هيشكرني ؟.. محدش هيقولي كلمة حلوة.. طيب اجوّد ؟ أعلى بالسقف! وهكذا..

حد رابع بيتسوّل المواساة.. أنا مظلوم في الدنيا دي ومهما عملت أو هعمل مش بلاقي تقدير ولا مردود لتعبي.. طيب يا سيدي معلش.. السعي في حد ذاته فرض.. جدد نيتك وادعي بالتوفيق.. لا بس أنا مظلوم.. أنا محدش بيحبني.. أنا نفسيتي في الأرض.. هو ليه محدش واقف جنبي..

** مش بنحكم على الهشاشة النفسية من موقف ولا اتنين.. الهشاشة النفسية مرتبطة بالمواقف دي لما يكون ده أسلوب حياة الشخص.. دي شخصيته ودي حياته.. مش مرة ولا اتنين.. ومش على فترات كبيرة.. كلنا بنعدي بفترات ضعف وهشاسة.. لكن بناخد استراحة محارب ونشحن طاقة ونرجع نكسر في الحياة والحياة تكسر فينا.. عشان كده نصيحة.. الإنسان الهش نفسيا مش محتاج مساعدة شخص عادي.. ابعد عنه.. ده محتاج مساعدة متخصص.. نفساني.. محتاج مساعدة على مستوى يقدر يتعامل معاه.. الهش مينفعش شريك شغل ولا زميل.. مينفعش صاحب.. مينفعش زوج أو زوجة.. الهش محتاج علاج.. ومهما حاولت تساعده أو تدعمه أو تسايره في هشاشته لعل وعسى يتحسن.. هشاشته هتعديك وهتبقى شبههة.. أو هتتحول حياتك لشكل بائس جدا.. هتظلم نفسك وهتقضي حياتك تبذل طاقة ومجهود على الأرض في محاولة التعامل مع الإنسان الهش بكل حساسية ولطف ولين مبالغ فيهم..

**مننساش دور الاهل.. التدليل والدلع والاتكالية خلقوا جيل مفتقد للجلد وغير قادر على تحمل أي مشقة.. خلاص تعبت.. خلاص يأ.ست.. خلاص جبت أخري.. للأسف الجيل ده فيه نوعين بس من الشباب.. نوع مقا.تل بكل ما تحمله الكلمة وقتـ/ـيل الحياة وداخل قصادها تحدي في السعي والاجتهاد.. وواحد تاني عنده ملايين الحجج.. ملايين الأعذار.. بيتدعي إنه دايماً عامل إللي عليه.. لكن المؤامرة الكونية كالعادة خذلته..

** الهشاشة زادت جدا مع رغبة الناس تكوين جماهير.. تكوين مشاهدين ومتابعين.. حاجات كتير فقدت النية الحسنة وفقدت الهدف منها وفقدت القيمة أو الجدوى منها لأنها مرتبطة بوجود ناس بتسقف وناس بتشجع.. رغم إن حاجات كتير محتاجة السرية.. الحرية الحقيقية في انك تعمل بينك وبين نفسك.. حتى إن صدقات السر عند ربنا أفضل من صدقات العلانية.. بدون حملات دعم ولا هعمل الخير لما البوست يجيب ألف لايك الأول!