رقائق 2

امرأة منافقة

- المهم يعني إنها بتتجوز، وتخلف، وبتصحى الصبح تحضر الفطار وتفطر هي وجوزها وعيالها سوا، وبتعمل شغل البيت وهي مبسوطه إنها بتهتم بـ أسرتها من غير ماتحس بـ أي تكليف أو سلطوية من جوزها.. وبتعيش حياة مستقرة وسعيدة..
- وبعدين تفتح السوشيال ميديا آخر النهار تقول لصحابها : ماتفكروش في الجواز يا بنات.. انتم مش جواري عشان تروحوا تطبخوا وتغسلوا وتشتغلوا عند حد.. وتحط هاشتاج WomenPower وبتاع..
- أكيد جت في بالِك اول ما قولت الكلمتين دول..
- أيوه هي صاحبتك الشكاءة البكاءة اللي دايماً ناقمه على عيشتها، اللي على طول بتصدر المصايب والمشاكل.. وبتدكن أي نجاح أو تطور في حياتها لنفسها..
- اللي كانت بتطلع من الامتحان تقولك ماحلّتش حاجه وهسقط، وتبوظلك نفسيتك طول أيام الامتحانات، ويوم النتيجة تلاقيها جايبه امتياز..
- اللي لما تخلف أو تحصلها أي حاجة حلوة في حياتها ماتقولكيش وتعرفي بالصدفة، لكن لما ابن خالة جد مامتها يموت تتصل بيكي تعيط وتقولك أد ايه الحياة سوداوية ومذرية وغير عادلة، وإنها هتنتحر ناو..
- هي نفس البنت اللي لو روحتيلها وانتي متجوزة وقولتيلها في مشكلة أد الفسفوس حصلت بيني وبين جوزي، تقولك اتطلقي على طول، النهارده فسفوس بكرة يمد إيده عليكي.. وهي بتعدي لجوزها أي حاجه بيعملها عادي عشان ماتفككش أسرتها..
- عارفاها دي؟ اهي دي بتكتبلك البوست بتاع انتي قادرة.. استقلي بحياتك.. تمردي.. تحرري.. كسري القيود.. خليكي إندبندنت.. وهي قاعدة بتهشتك عيالها وبتاكل فشار وبتتفرج على فيلم السهرة مع قرة عينها..