اسبوع والدراسة هتهل وهتشوفوا بالأمهات اللي عمرهم ما صَحوا ولادهم لصلاة .. بيصحوهم من النجمة ، اللي عمرهم ما عَودوا ولادهم يصلوا .. واقفين يساعدوهم يجهزوا ادواتهم وكتبهم
اللي بتقول لولادها مرة كل كاااام شهر صلي ومتكررهاش بحجة ان ريقها نشف ياااعينى.. هتسمع صريخها من آخر الشارع عشان ميفوتش الدرس الخصوصي
اللي عمرها ما جهزت جلابية ومصلية عشان تشجع ابنها ينزل يوم الجمعة .. هتشوفها بتلف زى النحلة ع اليونيفورم واللبس الرياضى و بتخبط بالمشوار عشان تجيب الاجود منه.
اللي بتكسل تتابع ابنها ف خمس صلوات بس .. متابعة ومدونة كل مواعيد دروسه وأرقام المدرسين والسناتر وجدول الحصص وعدد كتبه وكشاكيله وأرقام أصحابه وأولياء أمورهم والرحلات والأنشطة.
اللي عمرها ما زعلت ولاخدت موقف ان ولادها مبيصلوش نهااااااائى.. بتعمل مناحة ولطميات ع درجاتهم ومستواهم.
ورغم كدا .. أفشل نظام تعليم وأفشل طلبة وأحط مستوى علمي فى العالم
وبعد سنين لما يكبروا ويطلعوا بأجسام كالبغال وشهادات مميزة وتَمكُن ف كام لغه نتفاجئ بإنهم مابيعرفوش يقولوا كلمتين عربي أو أيه قرآنية صح ونتصدم بأنهم أنانيين متكبرين عاقين تراودهم أفكار إلحادية مايعرفوش غير مصلحتهم وبس
اللي يجنن ساعتها إننا بنستغرب ونقول..
ليه كدا بس يا ربي أنا قصرت في إيه ؟!!
لا ماقصرتش خالص بالعكس .. دا إنت طَوِلت وكَبرت وعَلِيت بس كل المشكلة إنك نِسيت تِرمي الأساسات فكان حصاد الهشيم .. يعني لا دنيا قامت ولا دين قام
✍️ أحمد زيدان
أنت تقرأ
رقائق 2
Randomمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
