- راجل طيب جاي الطوارئ بـ سكتة دماغية.. قيسناله الضغط لقيناه 240/130.. عملنا أشعة مقطعية لقينا نزيف أد كده في مخه.. وعياله بيقولوا كان لسه راجع من الشغل وقاعدين بنتعشى سوا وفجأة وقع مننا.. ولما سألتهم هو مريض ضغط قالوا اه بس بقاله اسبوع ما اخدش العلاج.. وطبعاً دا اللي سبب له النزيف..
- والحقيقة إن نص المرضى اللي بييجوا الطوارئ، أو اللي محجوزين في الرعاية بيبقى سبب مصايبهم الضغط أو السكر، ودا أنا بشوفه بعيني يومياً.. لو دخلت أي أوضة طوارئ أو أي وحدة رعاية هتلاقي نصها سكتات دماغية، جلطات قلب، غيبوبات سكر، فشل كلوي... وكلهم وراهم ضغط أو سكر أو الاتنين مع بعض..
- الحاج الطيب دا ماكنش هيحصله النزيف دا لو كان متابع ضغطه ومواظب على العلاج.. ودي طبعاً غلطة عياله مش غلطته.. انا شخصياً بشوف دي حاجه وحشة جداً في حق الواحد إنه يسيب أبوه أو امه لما يوصلوا للمرحلة دي وبعدين يجيبهم بعد ماتجيلهم جلطة ولا يحصلهم حاجه..
- أهالينا بيكبروا وبيفضل اهتمامهم كله بينا ومحدش فيهم بيفكر في نفسه.. فـ المفروض نردلهم جزء من الاهتمام دا ونخلي بالنا منهم..
- لو والدك مريض سكر هاتله جهاز سكر وقيسله كل يوم واتطمن عليه.. لو والدتك مريضة ضغط خدها مرة كل اسبوع الصيدلية أو المستشفى أو أي عيادة تقيس الضغط..
- ناول لهم الدوا كل يوم عشان هما من كتر تفكيرهم فيك بينسوا نفسهم..
- الضغط اسمه القاتل الصامت.. ودا اسم حقيقي جداً.. عشان المرض دا مالوش أي أعراض.. محدش بيشخصه إلا بالمتابعة الدورية أو بعد ما حاجه من مضاعفاته تحصل.. عشان كدا لازم أي حد فوق الـ 35 يقيس ضغطه مره كل شهر على الأقل، عشان يتطمن إن ماعندوش ضغط..
- ولو حصل وطلع عندك الضغط هي حباية أو اتنين هتاخدهم يومياً هيظبطولك الدنيا ومش هيبقى عندك أي مشاكل.. لو طنشت هتبقى معرض لجلطات ونزيف ومصايب كتير..
- ونخلي بالنا إن مفيش حاجه اسمها كان عندي الضغط وخفيت، دا مرض مزمن لو اتشخصت بيه يبقى لازم تفضل ماشي على العلاج على طول، ولو وقفته لأي سبب ضغطك هيعلى تاني..
- عشان انا بشوف ناس كتير بيقولوا انا باخد العلاج لما أحس إن ضغطي عالي *مش عارف بيحسوا ازاي*، أو انا موقف العلاج اليومين دول عشان حاسس إني هبطان، أو العلاج خلص ولما أروح التأمين الشهر الجاي هبقى أجيبه... كل دا كلام غلط جداً.. العلاج ماينفعش يتقطع يوم واحد لأي سبب من الأسباب..
- وعموماً يعني الضغط كـ مرض سهل وعلاجه سهل خالص، الفكرة كلها في المشاكل اللي بتيجي لما تهمل في علاجه..
- كذلك السكر.. المرض دا لو صاحبته هتلاقي الدنيا زي الفل ومفيش أي مشاكل.. خصوصاً السكر النوع التاني "اللي بيتاخدله برشام مش انسولين".. مرض بسيط جداً لو انتظمت فيه على العلاج والدايت..
- لكن لو أهملت، خد عندك بقى قدم سكري وعين سكري وجلطات وغيبوبات وتصلب شرايين وقصور في وظايف الكلى وكل ماتشتهيه الأنفس من مضاعفات..
*هتكلم عن نقط مهمة جداً في العلاج لكن في بوست منفصل إن شاء الله*
#الضغط_والسكر
#ومن_أحياها
#ضهر_الروشتة
أنت تقرأ
رقائق 2
Randomمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
