رقائق 2

شغل البنت

- أعتقد إن كتير من مشاكل المجتمع هتتحل لو البنات بطلوا ينافسوا الشباب على الوظايف، وركزوا أكتر على البيت والتربية.. ساعتها هتتوفر فرص عمل أكتر للشباب وهياخدوا حقهم، عشان غالباً لو ولد وبنت قدموا لوظيفة البنت بتتقبل من غير ماتعمل Interview..

- معظم الشباب اللي معاهم مؤهلات عليا ومش لاقيين شغل هيكون لهم وظايف ودخل ثابت، واللي دخله قليل هيلاقي شغلانة تانية يحسن بيها وضعه.. فـ بالتالي هيعفّوا نفسهم ومش هنشوف راجل عنده 40 سنة لسه بيكون نفسه.. وهيعفّوا البنات اللي بقوا بيعدوا الـ 35 سنة من غير جواز هما كمان، مع إنهم زي الفل ومليون راجل يتمناهم، بس للأسف أغلب الشباب عاطل أو شغال شغلانة ماتفتحش بيت..

- وعلى الجانب الآخر لو دا حصل، البنات هيبقوا متفرغين إلى حد ما لتربية الأولاد فـ هيطلع جيل محترم متربي في البيت، مش في الشارع ولا في النادي ولا عند الدادة.. وهيبقى عندهم وقت وطاقة عشان يهتموا بالبيت وبنفسهم وبأزواجهم فـ هتقل المشاكل الأسرية وهتقل معدلات الطلاق..

- وساعتها لما الإختلاط يقل ومعدلات الجواز تزيد، الشباب والبنات هيكونوا محصنين فـ مش هيكون في كبت جنسي، فـ هتقل حوادث التحرش والعلاقات الغير شرعية، والمجتمع هينضف شوية..

*انا بكتب البوست دا وعارف كل العينات اللي هتعترض في الكومنتات*

١ - فيمينستايه بتؤمن بالمساواة وشايفه إن من حق الست إنها تشتغل زي الراجل، وتاخد شيفتات نايت وتبات بره البيت عادي، وهما الاتنين يشتغلوا في البيت ويربوا العيال.. هتدخل تقول انت بتكبت طموحاتنا، وعايز تقعدنا في البيت عشان تاخدوا حقنا، وانا ابويا ماصرفش عليا وعلمني ودخلني كلية قمة عشان في الآخر أقعد في البيت..

٢ - نُص فيمينستايه بتؤمن بنُص المساواة وإن الراجل يشتغل ويشقى ويصرف على البيت ويرجع من الشغل يطبخ ويغسل المواعين ويحضر الرضعة للعيال عشان هو مش متجوز خدامة، وهي تشتغل وتصرف كل فلوسها على نفسها عشان شرعاً هي مش ملزمة تصرف على البيت ولا على العيال..

٣ - أندر إيدچايه عندها 19 سنة في أولى كلية حاطة عافية ذوق رنة موبايلها، بتشتم في كل الرجالة وبتقول إن الكارير أهم من الجواز ولازم تستقل بحياتها وبتاع.. وبعدين بتوصل 40 سنة وبتعيط لما تشوف صحابها اللي اتجوزوا وهما عندهم أسر سعيدة وعيال زي القمر وبتتمنى يرجع بيها الزمن عشان ترمي الكارير بتاعها للقطط ويبقى عندها عيل زيهم..

- المهم يعني بعيداً عن مهاترات الكارير والطموح ومش عارف ايه.. عايز اوضح نقطة.. احنا كلنا يا جماعة من أصغر صنايعي لحد أكبر أستاذ جامعة بنشتغل عشان ناكل عيش.. اه في وسط شغلنا بيبقى في نيتنا نساعد الناس.. بس احنا في الأول والآخر بنشتغل عشان الفلوس..

- روح كدا لأي دكتور وقوله في شغل في مكانين بنفس المرتب، مكان فيه 50 حالة ومكان فيه 3 حالات.. وأقطع دراعي لو واحد بس قالك هروح المكان اللي فيه 50 حالة عشان أساعد ناس أكتر..!
فـ انت مهما كان مجالك ومهما عليت في شغلك هتلاقي نفسك في الآخر بتدور على شغلانة فيها فلوس و Life style كويس..

- فـ انا مش فاهم ليه لما نقول للبنات اقعدوا في البيت او اشتغلوا شغلانة خفيفة بيبقوا مصممين إننا كدا بنسرق مجهودهم وبنقتل طموحاتهم وبناخد منهم الأملة لنفسنا عشان احنا طماعين!! يا جماعة والله مافي راجل بيحب الشقى، ولو أي حد فينا لقى شغل مريح بفلوس كويسة هيحط كاريره تحت رجله وياخد الشغل المريح..

- هما غالباً البنات اللي بيقولوا كدا بيكونوا صغيرين وماجربوش سحلة الشغل.. عشان كدا لما بيكبروا وينخرطوا في سوق العمل ويشوفوا إن كل المجالات في الآخر بتتمحور حوالين "أكل العيش" ، وإن الكارير اللي عماله تصيح عليه دا هو مكتب الحسابات ولا الصيدلية ولا الموقع اللي هتشتغل فيه عشان تقبض آخر الشهر.. ساعتها بيعرفوا قيمة الجواز..

- ودليل كدا إن في بنات كتير جداً مش بيشتغلوا في مجالهم أساساً وبيروحوا مجالات تانية عشان فلوسها أحسن.. يعني أنا أعرف بنات مخلصين علوم وشغالين في حضانات، وأعرف بنات مخلصين تمريض وشغالين في معامل تحاليل، وبنات مخلصين تجارة وشغالين في محلات، وبنات مخلصين هندسة وشغالين دروس تأسيس إبتدائي!

- فـ هل هما شغالين في الأماكن دي عشان شايفين مستقبلهم فيه وشايفين إن دا الكارير الجامد اللي مفيش منه اتنين؟! لأ طبعاً عشان فلوسه أحسن.. ونفس الكلام بينطبق على الشباب، بس الفرق إن الشباب مش بيحوروا، هو بيبقى داخل الكلية اللي يخلصها ويشتغل ويجيب فلوس في أسرع وقت، ولما بيخلص بيدور على مكان فلوسه حلوة وبيروح يشتغل عشان يفتح بيت وخلاص..

* وختاماً بفكركم إن رأيي شخصي وغير مُلزم.. فـ محدش يصدعني..