موضوع كتالوجات السوشيال ميديا ده بقى مُرهق جدا.. وصفات لكل حاجة.. وصفات للنجاح.. وصفات للعلاقات الاجتماعية.. ووصفات للجواز المثالي وبعدين وصفات لتربية الأطفال بشكل مثالي .. وصفات للحياة السعيدة.. ووصفات للميكب المثالي واللبس والأكل والسفر.. مفيش مساحة للارتجال أو للصدفة.. مفيش مساحة للمفاجآت.. كأن الحياة كلها كانت فيلم بس جت السوشيال ميديا وحرقته.. بقينا نشوفوا الحياة في عيون ناس تانية.. نتمنوا حياتنا في حياة ناس تانية..
كل ده مع افتراض إن الكتالوجات دي طرق مجربة وخبيرة وعن علم.. لكن في الحقيقة أغلبها وجهات نظر.. أغلبها بتكون استعراض للأنا أكتر من إنه بنية المنفعة العامة.. كلها بقت نصايح أو وعظ أو محاضرات آخرها لو أعجبك الفيديو متنساش تعمل سبسكرايب.. هاااااا! وبعدين؟
أصعب ما في الموضوع إنك لما تحاول تتجاهل الكتالوجات دي وتعيش بطبيعتك.. بتكتشف إن الناس بتتعامل معاك بناءاً عليها.. هما بيفترضوا الكتالوجات إللي شافوها على السوشيال ميديا في العلاقات مثلا عليك.. فبقوا دايما يظنوا الظن السيء.. ومن العلاقات للجواز.. ومن الجواز للشغل.. ومن الشغل للعيلة والمناسبات والتجمعات.. انت بقيت مجبر تواجه الكاتلوجات دي في كل حتة..
هل فيه طريقة إن الواحد يعيش الحياة عادي؟ عادي.. مش لازم زي حد ولا على نصايح حد ولا على طريقة حد ولا على وصفات حد.. هينفع أعيش حياة كده بين خبراء السوشيال ميديا إللي مقفلين الحياة وبيعيدوها معانا بس عشان يونسونا؟.. ينفع ولا؟"
ردي مجرد ما شفت اول كلمة " عايزة اعيش تجربتي بحلوها ومرها عايزة اتفاجيئ واغلط واتعلم و مش عايزة اشارك وصفة نجاحي مع حد و لا اسباب فشلي مع حد ... مش كتمان علم عن الناس بالعكس أنا ابسط من كده و في غيري كتير دي شغلانتهم انهم يقدروا يحللوا التجارب و يقولولك ايه ينجحك و ايه العكس و ناس عاديين يقدروا يدوك عصارة تجربتهم ، انا لا انا حد بسيط جدا و عادي جدا جدا جدا و بحاول اتعامل علي هذا الأساس مش هغشك أو اضللك لكن متنتظرش مني احكي اسرار لأن مفيش اسرار هي حياتي زي ما هي حياتك زي ما هي حياتهم ، كل واحد ليه سيناريو خاص بيه ، سيبها كده و عيشها علي هذا الأساس ، أو لو مش مقتنع سيبني اعيشها انا كده ،،، من فضلك ! "
لقيت تعليق لحد " انا عايشه عادي بعيد عن اي كتالوج خالص بربي عيالي بردو بطريقتي انا بعيد عن التابوهات ومرتاحه كده مريحه دماغي وبعمل اللي نفسي فيه بغض النظر هو ماشي مع مقاييس الصح والغلط بوجه نظر الناس او لا المهم هل ده هيناسبني انا واقدر عليه.. طبعا بعيد عن اي حرمانيه.. كل ده بلاستيك وفيك وكلنا عارفين انه ماسك واكل عيش ع السوشيال ميديا وان باب النجار مخلع لكل اللي حاطين مقاييس لكل حاجه سواء فالتربيه ولا الجمال ولا الطبخ ولا التعليم "
عمر الاسكندراني
أنت تقرأ
رقائق 2
Randomمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
