رقائق 2

الجهل بالاساسيات ليس مبرر

- بص يا ابني.. الجهل بأساسيات العلم الشرعي مش مبرر لترك واجب أو عمل محرم.. مش مطلوب منك تكون فقيه وعالم بكل تفاصيل الشرع.. لكن على الأقل يبقى عندك الحد الأدنى من العلم اللي يخليك إنسان مسلم..
- الرسول صلى الله عليه وسلم قال : "رفع عن أمتي الخطأ والنسيان وما استكرهوا عليه".. وناس كتير للأسف بتخلط بين الحاجات المذكورة في الحديث، وبين الجهل..
- هضربلك مثال بواحد شرب في نهار رمضان.. لو شرب وهو بيتمضمض غصب عنه، دا كدا الخطأ.. لو شرب وهو ناسي إنه صايم، دا كدا النسيان.. لو حد أجبره إنه يشرب.. دا الإكراه.. و التلاتة دول يكملوا صيامهم عادي، ومفيش عليهم كفارة، ولهم عذرهم عند ربنا بحديث سيدنا النبي..
- إنما لو شرب وهو مش عارف إن الشُرب بيفطر، دا كدا جاهل بالحكم وصيامه مش مقبول ولازم له كفارة.. طاب لو ما كفّرش وقال انا ماكنتش أعرف إن الشرب بيفطر.. هل دي حجه له عند ربنا؟ لأ طبعاً..
- المثال قد يبدوا سطحي بعض الشئ عشان تقريباً كلنا عارفين أحكام الصيام.. لكن لو أسقطت الموضوع على أحكام شرعية تانية زي الزكاة مثلاً، وشوفت كام واحد جاهل بأحكام الزكاة، هتلاقي كتير.. مع إن الزكاة الركن التالت من أركان الإسلام.. زيها زي الصلاة والصيام.. فـ هل اللي يضيعها عشان مش عارف يحسب النصاب ومش عارف يعني ايه حول، له عذره عند ربنا؟ لأ طبعاً..
- ماينفعش جهلك بأحكام الطهارة يخليك تصلي وانت على جنابة.. أنا شخصياً أعرف شباب كبار ماكانوش يعرفوا يعني ايه غسل جنابة.. وكانوا بيخشوا المسجد ويصلوا وهما جنب.. لحد ما قعدت معاهم وفهمتهم يعني ايه حدث أصغر ويعني ايه حدث أكبر وازاي يتطهروا منهم..
- هل دول صلاوتهم اللي صلوها وهما جنب مقبولة عشان ماكانوش يعرفوا؟ لأ طبعاً مش مقبولة ولازم يعيدوها.. حتى لو بيصلوا كدا بقالهم 10 سنين؟! حتى لو بيصلوا كدا بقالهم 100 سنة..
- ماينفعش ماتبقاش عارف أحكام الطلاق وتقعد تحلف بالطلاق عمال على بطال، وتهزر مع مراتك بالطلاق.. ولما حد يعرفك إنكم كدا عايشين في علاقة غير شرعية تقول أصل انا ماكنتش أعرف..
- يعني لو واحد طلق مراته 3 مرات وهو عنده 20 سنة، ودلوقتي عنده 70 سنة وعنده أحفاد يبقى عايش مع مراته 50 سنة في حرام؟ أيوه.. والمفروض يبعدوا عن بعض ويتوبوا..
- اتعلموا أساسيات دينكم يا جماعة عشان دي بيتبنى عليها كل حياتكم.. اللي بيعيش عمره كله ما يتطهرش من البول، دا كدا كل وضوءه مش صحيح، وبالتالي كل صلواته على مدار حياته مش صحيحة.. كل دا عشان معلومة صغيرة جداً كان المفروض يتعلمها وهو صغير..
- والشخص دا لما يقف قدام ربنا ويقوله "ماكنتش أعرف" مش هتكون له حجه.. الناس زمان كانوا بيسافروا أيام وليالي عشان يحضروا درس علم ويتعلموا دينهم.. دلوقتي وانت قاعد في مكانك ممكن تعرف أي حكم انت عايزه من النت..
- المهم يعني عايزكم تعرفوا إن الإسلام عامل زي البرج.. له أساس مبني عليه كل حاجه.. وله جدران وأسقف وعواميد ودي أركانه وواجباته اللي من غيرها مش هيقوم البرج.. وجواه زخارف وتفاصيل كتير، ودي اللي بتخلي شكله حلو وبتميز برج عن برج.. فـ اتمسكوا بالأساس والجدران والأسقف عشان مايتهدش فوق دماغكم.. ولو عرفتوا تستزيدوا وتزخرفوه يبقى فضل من ربنا..