Affection[Complete]

၄(U+Z)

 Unicode

ပိုင်ယန်၏စိတ်အားထက်သန်မှုမှာရှောက်ချန်၏ အရေးမစိုက်မှုကြောင့်လျော့လို့မသွားချေ။ သူ့မှာ ကျောင်း၊ စားသောက်ဆိုင်ကအလုပ်၊ ဆေးရုံတို့ကိုလွန်းထိုးသလိုပြေးလွှားနေရရှာသည်။ ငှားရမ်းထားသောအခန်းကျဥ်းလေးမှာ ညအိပ်စရာနေရာတစ်ခုသာဖြစ်သွားလေ၏။

သူနဲ့ရှောက်ချန်မှာ တရုတ်စာပေဋ္ဌာနနှင့် ဥပဒေဋ္ဌာနတို့တွင်စာအတူတူသင်နေရသော်လည်း အချင်းချင်းသိပ်မတွေ့ကြပေ။ ရှောက်ချန်ပုံစံကစာဖက်ကိုသိပ်အရေးမစိုက်သည့်ပုံပေါက်နေသော်လည်းတကယ်တမ်း သူကစာဖက်တွင်လည်းထူးချွန်လှ၏။ မိသားစုကလည်းနောက်ခံကောင်းလှသည်လေ။ သူ့အဖိုးလုပ်သူက ဆေးကုမ္ပဏီကြီးရဲ့ဥက္ကဋ္ဌကြီးဖြစ်သလို သူ့အဖေကလည်းဆေးရုံကြီးတစ်ခု၏ဆေးရုံအုပ်ကြီးဖြစ်လေသည်မို့ ရှောက်ချန်ကကျောင်းတွင်အတော်လေးရေပန်းစားလေသည်။

ဒါပေမယ့် သူကျန်းဟန်ချင်နဲ့လမ်းခွဲပြီးသွားကတည်းက သူချစ်သူရည်းစားထပ်မထားတော့ပေ။ မိန်းကလေးအများစုကလည်း ထိုနေရာလွတ်ကိုမျက်စိကျနေကြသလို ပိုင်ယန်ကလည်း သူ့ထံတွင်ကံကောင်းမှုလေးရှိသေးသည်ဟူ၍ ရှောက်ချန်မျက်စိရှေ့သို့နေ့တိုင်းရောက်အောင်လာလေ့ရှိသည်။ အဆိုးဆုံး?ဘယ်လောက်ဆိုးနိုင်ဦးမလဲ။

အတန်းပြီးသွားတော့ ပိုင်ယန်ကကားပါကင်နားသို့လာပြီးသူ့စက်ဘီးလေးကိုလာယူလေသည်။ ​ဖြစ်ချင်တော့ ရှောက်ချန်ရဲ့Porscheကားကသိပ်မနီးမဝေးတွင်ရပ်ထားသည်။

Sတက္ကသိုလ်ရဲ့ကားပါကင်က စက်ဘီး၊ ကား၊ ဆိုင်ကယ်များရပ်နားရန်သီးခြားလေးလုပ်ပေးထားသော်လည်း ကျောင်းသားအများစုကစက်ဘီးနှင့်သာလာကြပြီး အနည်းစုလေးသာကားစီးနိုင်ကြသည်။ ထိုအနည်းစုလေးတွင်ရှောက်ချန်နှင့် သူ့မိတ်ဆွေများပါဝင်လေသည်။

ရှောက်ချန်ရဲ့ရင်ကဆတ်ခနဲခုန်သွားကာ ထိုနေရာနားတွင်ခဏမျှရပ်ပြီးစောင့်နေလိုက်တော့၏။ နာရီဝက်လောက်ပဲ သူထပ်စောင့်လို့ရပြီး စားသောက်ဆိုင်အလုပ်ကိုမှီအောင်သွားရတော့မည်ဖြစ်သည်။ ဒါပေမယ့် သူကံကောင်းသွားလေ၏။ ဆယ်မိနစ်မျှကြာတော့ ရှောက်ချန်ကကားပါကင်ကိုတစ်ယောက်တည်းလမ်းလျှောက်လာသည်ကိုတွေ့လိုက်ရသောကြောင့်ပင်။