العروس في الثوب الاسود

تكمله

عن روتيني، عن موطن وجعي

أحتاج أن أنفث نيكوتين الحزن

أحتاج لشغبي ، لوهج الحياة في الأماكن التي تتسع لحجم إحساسي...
________

مر على وفاة ماما اسبوعين ضبط وحالنا يرثى له
بابا عزل نفسه بغرفته لا يطلع ولا يجي لبيت بيبي نوديله اكل يرفض ياكل عاش على المغذيات ،،،اخذ اجازة من دوامة وكعد بلبيت. حتى ميدري بينه وين ما وين كأنما عايش بغير كوكب .

خالو حال الضيم حاله حاير بمرض بيبي يفتر بيها من طبيب لطبيب حالتها كل مجالها تسوء اكثر وبس تبجي على ماما ..

عمة زهرة بعدها بالمستشفى ويه اخوية وحسب كلام خالو الطفل  كلش ناعم بكد جف الايد كال ادعوله الله ينطيه عمر ويعيش .

بالنسبه النه اني وريناد بين بيتنه و بيت جدو،،،

بهاي فترة الاسبوعين خالو علاء رجع سافر بحكم عملة مايكدر يتأخر اكثر ،،،
اخذ عائلته وراح ضلت بس نبراس مقبلت تروح لان الوضع مايسمح تعوفنه ،،،

منو يداري بيبي وخاله سهاد على الاقل بين ما ترجع عمة زهرة حتى هيه تقوم بيهم .

اجة موعد امتحاناتي و اني كلشي ما قارية ولا كدرت افتح كتاب بس جنت باليومي شاطرة واحضر ودرجاتي مال شهريات كلش زينة كمت اقره قبل الامتحان بيوم واروح امتحن يوديني خالو ويرجعني كالعاده خلصت امتحاناتي بطلاع الروح ،،،

وانتضرت النتيجة طلعت اكمال بدرسين،،
ودرجاتي البقيه ع الحافة،،
اصلا كلش زين على قرايتي اللي قريتها ،
اعتمدت على اليومي
واني نفسيتي تعبانه ،،،

اضافه الى ريناد كلش تعبتنه بس تبجي تريد ماما وتنحست كامت تعاند على كلشي حتى لو تحس هذا الشي غلط تسويه ،،،
مرة من المرات لكيتها كاعده وتكصكص بملابسنه همزين لحكت عليهة ، اخذت المكص من ايدها وعطت بيها...

رسيل : هاي شكاعد تسوين ليش هيج مو حرامات...

تباوعلي وماتحجي رحت ع خالو كتله ع سوالفها تخبل اجه ويايه لبيتنه وصعدنه فوك اني وياه لغرفتنه ، كعد يمها وبده يحجي وياها بهدوء..

محمد: رنود حبيبتي ليش زعلانه منو وياج اكو احد مضوجج .

صافنه علينه و متحجي ..

محمد : ضايجه اطلعج نفتر اني واختج ...

هم ساكته بس عيونها بدت تدمع ..

محمد : زين شنو رأيج تجين يمنه بلبيت تباتين يمي ونسهر للصبح بالحديقه ونشوف الشمس شلون تطلع ..

رفعت راسها وكلتله ..

ريناد : اني كل هذا ما اريده اريد شي اذا كتلك عليه تسويه...

محمد: كولي عيوني اشلعهن الج ..

ريناد: وديني لماما اريدها ..حجتها وكامت تبجي ..

محمد : لا حول ولا قوة الا بالله بنتي حبيبتي ماما راحت بالجنة راحت يم ناس احسن من عدنه وهناك حياتهم حلوة ليش تبجين عليها افرحي لان ارتاحت .

ريناد: لعد ليش ما اخذتنه وياها.

محمد: مايصير الصغار يروحون ممنوع بس الكبار ..

ريناد : لعد انت وبابا وبيبي مو كبار وبعدكم هنا ليش مرحتو ليش بس هيه راحت  .

خالو اختنك نزلها من حضنه وطلع برة الغرفه كام يبجي
ويحجي بصوت مخنوك...

محمد :  اخ يابويه شون كسرتينه بموتج ياسوسن الله يعين كلبنه على فراكج .

وراها راح لغرفه بابا ..رحت وراه..

محمد : صادق كوم كافي عاد تبجي وتنوح ذني بناتك محتاجاتك و يديرن بعينهن خطيه ما اكلك لخاطري وبداعتي  لا الخاطر هذني الاطفال شنو ذنبهن ضيعن امهن وانت هذا حالك راح تضيع وتضيعهن وياك .

جاوبه بابا بتعب ونبره حزن ماليه صوته..

صادق: انت موجود بمكاني وتكفي ..

محمد : بعيوني اخليهن بس اني مو ابوهن مستحيل اكدر أسد مكانك كوم لبناتك ذني يتيمات لا تيتمهن مرتين صادق..

بابا من سمع بابا كلمة يتيمات شون عبالك جان نايم بحلم وفز كمز من مكانه و طلع من الغرفه حسيته فقد عقله،،،،
ركض فوك على ريناد صعدت  وراه ورحت كعدت يمه،،

شبكنة ويبجي كام يصيح..

صادق : صرتن يتيمات راحت امجن راحت وعافتنة والله مو بس أنتو تيتمتو أني هم .

يحجي و يبجي واحنه هم نبجي بيومها نام يمنه فوك فرش فراش ونمنه على ايده وحده منا وحده منا .

ثاني يوم الصبح كعدنه ..

صادق : يلا بنات كومو نتريك سويتلكم اكل ..

رسيل : صباح الخير بابا ،،، كمت حضنته وبسته ما مصدكه هذا بابا وكف لحيله ويحجي ويانه..

كعدت ريتاد  ساكته كلشي ماحجت بس تباوع بعيونها ، نزلنه جوة غسلنه وكعدنه على الميز بالمطبخ ...

احنه ناكل و بابا يباوع علينه انتبه على عيوني وين نضرها جانت بأتجاه كرسي ماما اللي جانت تكعد عليه.

تنهد وكال..

صادق : مكانها خالي ،،، حجاها وجر حسرة ...

كعدنه على السفره وهاي اول مره نلتم بدون ماما صح جان عدها دوام واغلب الاحيان نتريك وحدنه بس جانت هيه تحضر الريوك وتسوي لفات النه وتروح .

مرت الايام.

وبيوم اجه خالو محمد للبيت على بابا ..

محمد: صادق شوكت تروح للمستشفى حتى تسجل ابنك لحد الان ضال بدون اسم..

صادق : ما اروح خليها بعدين ..

محمد: شنو بعدين ترة اذا ماتجي همه يخلون اسم بكيفهم هيه هاي وضعية امشي ويايه وهم تشوف ابنك ما متلهف تشوفه .

باوع بابا على خالو ونصه راسه  عيونه دمعت وكال