العروس في الثوب الاسود

تكمله

محمد: اليوم ابوج يتزوج وراحو للمحكمة ويرجعون كبل للبيت راح اجيب غدة من برة ويه اللي سوته عمتج لان اهل البنيه هنا يتغدون وانتي رتبي البيت  على ما اجي وابقي هنا يم بيبتج .

اختنكت احس شي نام على صدري شلون راح اتحمل الوضع الجديد ما اعرف كتله..

رسيل : ماشي بس ابدل ملابسي واجي .

محمد:يلا انتضرج ..

رحت للبيت بدلت ورجعت لبيت جدو جانت اكو مواعين مال ريوك على السنك غسلتهن ومسحت الكاونترات وكنست البيت ومسحته لان عمة مملحكة تنظف بس طابخة ورايحة باقي على تنظيف البارحة مسحت الاثاث وطلعت اغسل بالكراج وطبت بنية لابسة عباية مال راس وراها مرة كبيرة وعمة زهرة وبابا ...

زهرة : يمة رسوله تعاي سلمي وباركي لابوج ...

خليت الصوندة على صفحة وسديت البوري ورحت بوست المرة الكبيرة وبوست البنية ...

شجن: هلوو حبيبتي انتي اكيد رسيلة ..

رسيل: رسيل اسمي مو رسيلة ...

شجن: ادلعج حبيبتي وبوستني...

كلت بكلبي بدينة ...
رحت على بابا بوسته  وكتله مبروك ...

صادق: الله يبارك بيج بنيتي وباسني ...

بس عيونه تباوعلي بقلق يشوف ردة فعلي شنو اني اتصرفت طبيعي حتى ليضوج خطيه هو انجبر مثلنه ..
طبو جوة كعدو بالهول ورة شوية طب خالو جايب اكل اشكال سمج ودجاج وتمن وكباب مشوي .
وعمة مسوية فاصوليا وتمن.
بدينة نصب الاكل .

صاحت عمه..
زهرة: رسيلة هاج فرشي السفرة بالهول ..

رسيل: لزمت السفرة بيدي وكلت لعمة ما احب هذا الاسم لتصيحيني بيه ...

زهرة : يلا امم ما احجي بعد وخلت ايدها على حلكها .

ضاجت عمة  خلي تضوج بعد ماصار ساعة من اجتي  ست شجن كامو يصيحوني باللقب اللي طلعته اليه .

رحت للهول وفرشت السفرة طب حسام .

حسام: السلام عليكم اليوم عدنة خطار...

محمد: اي هاي مرت عمك سلم عليها ...

حسام : مبروك شايفين كل الخير..

شجن: الله يبارك بيك ...

صادق: الله يبارك بيك وتباوسوا...

والله  هذا طالع حلو بالزي الجامعي وعبالك كبران هو من قبل شكله حلو بس هسه حسيته كبر واني صار كم يوم مشايفته ضليت صافنه عليه انتبه عليه ورفع حاجة يعني شكو ...

نزلت عيني ورحت للمطبخ خلصت فقرة الغدة ورتبنه كلشي بمكانة وشجن اساعد واسوي واصب جاي خبصت روحها تركض كدام عمة .تالي عمه حجت وياها ...

زهرة: عيوني انتي عروس اليوم ارتاحي وباجر عود تعالي اذا تحبين هسه اني  اسوي كلشي ...

شجن : شعندي قابل اصلا اتونس بالشغل ..

زهرة : هاج لعد ودي الجاي ..

اخذت الصينية وراحت للهول رحت وراها من باب الفضول اريد اشوف بابا شنو تصرفاته يمكن لو غير واحد متزوج ما انتبه هيج بس لان بابا احسه مالتنه واجتي وحده غريبه تشاركنة بيه طبيت وكعدت هيه وزعت الجاي ..

شجن: تفضل ابو حسام عيوني ..

محمد: غالية خيتي الله ليصغرج ان شاءالله ...

وزعت للكل وصلت لبابا ..

اخذ الاستكان بدون ميباوع عليهة وهيه رادت تاكله بنضراتها ..
صادق: مشكورة ..

شجن: تدلل تاج راسي..

حجيت بس بصوت ناصي شبسرعة صار تاج راسج وانتي البارحه عرفتية ...

حسام: ديري بالج راح يطكج عرج ...

انداريت وشفته كاعد بصفي ويضحك هذا شوكت اجه ولا انتبهت هلكد ممركزة ويه شجن ..

رسيل : هاا ..
حسام : علاه شبيج راح تطكين ترة ابوج تزوج ما باك ...

رسيل: وانت شكو شعليك بيه اطك اموت شلك دخل وثاني شي اني ما احجي وياك. ..

حسام: ديلا عيني هسه اني الميت عليج وعلى حجايتج...

درت وجهي ونفخت بضوجه...

ورة شوية كالت عمة ..

زهرة: لو جايات البنات ليش ما جوي على الغده خطية...
ام شجن: والله يستحن يجن ...

زهرة : حروح اجيبهن واجي خطيه يتغدن هنا شو اكل وخير من الله وهم يغيرن جو ..

ام شجن: انتي تعبانه هسه هذا الوليد يجيبهن شسمك يمة ..
حسام: حسام ..

ام شجن: يحفظك لشبابك وينطيك العافية تكدر تجيب البنيات هنه هنا بعد كم بيت مو بعيد...

زهرة: كوم حسام اني وياك نروح ...

الكل استغرب من تصرفها شلون حسام شاب ويروح لبنات للبيت وهنه وحدهن بيه ومراهقات هاي انحسبت نقطة ضد بيت شجن .

خلص اليوم ورجعنة لبيتنه يابيتنه اللي راح تشاركنة بيه وحده غريبه صعدنه فوك وهمة بقو جوة .

رسيل: رنودة شو هادئة شبيج اليوم لا حجيتي ولا جيتي سلمتي..

ريناد: وهو منو بحالي اذا سلمت واذا اجيت كلمن ملتهي بروحة...

رسيل: كلنا نحبج انتي ليش هيج تفكرين منو مثل دلالنة شو بابا اي شي نأشر عليه ثاني يوم يمنة اذا مو نفس اليوم انتي ليش هيج صايرة قبل مجنتي هيج ..

ريناد: ماكو شي ليضل بالج ..

رسيل: يلا نامي حبيبتي لتفكرين با افكار موحلوة تصبحين على خير ..

ريناد : وانتي من اهله ..

نمنة ومنعرف شنو منتضرنة بالايام الجاية
كعدت الصبح ساعة ستة اول مرة بحياتي اسويها واكعد وحدي ما اعرف الليل كله ممرتاحة وما اعرف شلون اتصرف وية وضعنة الجديد وسكوت ريناد حيرني .
اول منزلت طلع بابا من غرفته مبين هو هم منايم ...

باوعتله ابتسمت ...
رسيل: صباح الخير حبيبي ،،

حضنتة وبسته ..