العروس في الثوب الاسود

تكمله

رسيل: مثل ما رفضت هديتك رفضت هديته وخلص ..

حسام: شنو جابلج وشوكت نطاها الج وين جنتو ومنو يمكم جان..

يحجي ويهز بيه قوي .

رسيل: مشفتها واول ما نطانياها رجعتها واذا خلصت كلامك عوفني اريد انام تعبانه .

هد ايدي وبعده خازرني ،،،انداريت اريد ادخل جان يكول ...

حسام: شفت الحجاب حلو عليج وحبيت اجيبلج ملابس على ذوقي بس طلعتي متستاهلين .

اني وامشي كتله..

رسيل : اني ما استاهل لتعب نفسك ويايه ..

دخلت للمطبخ وسديت الباب وكعدت على الكرسي اريد اهدأ من الموقف اللي صار نفسي سريع عبالك راكضة كومة  مشاعر متضاربه ما اعرف شنو كاعد احس وليش هيج احب استفزة ليش بس وياه هيج اتصرف ليش ليش احجي ويه نفسي وراسي راد ينفجر كمت صعدت فوك مددت من وجع راسي غفيت كعدت قبل السحور بساعه نزلت لكيت بابا يقرة قران
شافني صدق وابتسم...

صادق: صح النوم هاي كلها نايمه ...

رسيل: تعبانه بابا...

صادق: ليش خوما بيج شي ...

رسيل : لا بس ضايجه شويه وهسه احسن..

صادق: اكيد..

رسيل: اكيد والله ..

صادق: يلا لعد لبسي حتى نروح نتسحر بيت جدج وساعدي عمتج اليوم بس تدردم عليكم انتي وحسام ليش تأخرتو هلكد.

رسيل: مو حسام كال نص الاشياء اللي عمة موصيتنه عليهن ماموجودات لهذا افترينه على اكثر من سوبر ماركت..

اول مرة اكذب على بابا بس شريد اكله اوووف .

صادق : هاا خطيه،، عمتج تعرفيها من تنخبص تعصب ....

رسيل : اي حقها..

صادق : يلا يابه امشي نروح..

هزيت راسي ورحنه لبيت جدو دخلت للهول خالو وعمة كاعدين اول ما شافتنه عمه كالت..

زهرة: ها نبلش بالسحور ...

صادق: اي يادوب تلحكون ..

زهرة: شنو مشتهين ...

محمد : ركي وجبن عاجبني رحمه لاهلج ..

زهرة: وانت ابو رسيل.

صادق : اني هم سوي شي خفيف شو ما اشتهي ..

سوينه السحور اني وعمة وجبناه للهول كعدنه ناكل وطبت عمة تصيح حسام وطلعت ..

محمد: ها وينه ..

زهرة: مقبل ياكل يكول شبعان ...

محمد: شبيه هذا اليوم مو على بعضه ..

صادق : ربك ستر اليوم من انت اجيت قبلي للبيت وضلينه اني وياه بالمحل اجه رجال راد يرجع غراض مشتريهن من قبل اسبوع بعدني كاعد اتفاهم وياه وكتله ميصير ارجع صارلهن هواي بس كال الرجال ماريدهن وما ادري حسام منين طلع وتلازم هو وياه كوة فاككتهم التمت العالم و صارت هوسه شكبرها .

زهرة: هو ورة الفطور مابيه شي يضحك ويسولف شو طلع ربع ساعه ورجع مكلوب وجها وبس يتعارك شسوة بثائر خطيه حتى كام يبجي .

محمد: اكلو انتو واني اروح اشوفه شبيه ...

راح خالو وره شويه اجه كال نايم كعدته رايح بسابع نومه .

صادق: عوفوه على راحته احتمال ضايج من شي واحنه مندري .

المشكلة الكل يسأل ويريد يعرف حسام شبيه اني الوحيده اللي اعرف سبب ضوجته

ضايج بسببي ولازم اصحح الموقف يمكن جانت ردت فعلي قويه  ردت اردله اللي سواه ويايه .

مشت الايام وباجر اول ايام عيد الفطر بليل عمة عجنت كليجة وكعدنه نسوي وياها نحشي ونخليها بالقوالب شويناها وكملنه ، ومسحنه البيت لان نظيف كله عزلناه هو وبيتنه يعني ميحتاج ...

ثاني يوم كعدت الصبح سبحت وبدلت لبست فستان اصفر بيه ورد صغار وشحاطة بيها علو وشسورت شعري اني بشرتي بيضه ولون عيوني تنطي على خظار طالعه على ماما  وشعري  اسود ،،ريناد تشبهني بس الفرق عيونها سود وسمرة على بابا طولي ١٦٤ وزني ٦٠  لا سمينه ولا ضعيفه وسط .

كملت تبديل ولفيت شعري باللورات وانتضرت ريناد تكعد حتى ننزل سوة نعايد بابا..

كعدت اران حبيبي هسه عمرة ٣ سنوات يعني يفتهم غسلتله وبدلتله مسبحته لان بليل عمة سبحته سبحه العيد هههه مشطتلة شعره يجنن اشكر لونه وهو حبيبي سمين مدنفش وره ما كملتله فتحت شعري ورتبته ..

بقت بس ريناد رحت اكعدها ماكو مطفيه عفتها ونزلت اني واران بابا ماموجود اكيد رايح للجامع ويه خالو علمود صلاه العيد ومناك يروح لبيت جدو طلعنه شفتهم واكفين بالباب بابا وخالو وحسام عايدت بابا وخالو وبوستهم .

التفتت على حسام حتى اعايده ما لكيتة طبيت جوة اعايد البقيه لكيته واكف بالمطبخ يشرب جكارة تقربت عليه وبسته بخدة هاي اول مرة اسويها وكتله. 

رسيل : كل عام وانت بالف خير .

تفاجأ ضل مصدوم مجاوبني درت وجهي ومشيت وصلت باب المطبخ اللي يودي للهول جان يكول ...

حسام: عبالي الله هداج وتحجبتي كلت شعجب
بس الظاهر العبادة والحجاب بس بشهر رمضان وباقي الايام عادي.

انداريت عليه وكتله..

رسيل : يوم تخرجك..

ضحكت وعفته ماريد اجادله لان اتعب وهو  هم حباب ميستاهل .

طبيت عايدت الكل وبوستهم وطب خالو جايب الكيمر والكاهي وسوينه بيض وجاي واجبان وكعدنه بالهول نتريك كل شوية ارفع راسي اريد شي من السفره والكه حسام عينه عليه ويوخر  يسوي روحه ياكل عفته مهتميت .
رحنة عايدنة الاقارب القريبين علينة بس البعيدين خابرناهم لان ازدحامات وبابا يخاف من الوضع. وهيج خلصت ايام العيد بخير وسلام ...