العروس في الثوب الاسود

تكمله

محمد: فكرت وفكرت وفكرت صارلي سبوع يخوي مانايم بس ماكو غير حل اني لو عليه من اول يوم اللي رمو بيتك اتصل عليهم من يشوفون عندك ظهر يخافون ويهابوك مو هسه وحدك وضهرك مكشوف الهم ..
.
صادق: صعبة يا محمد صعبة راح اموت بقهري هاي بنت الكلب هيج تسوي بيه والله حته مالي عين ارفعها واخليها بعيونكم وانتو اهلي شحال الغربه اذا طلعت ويأشرون عليه هذا اللي خانته مرته ولزمهم بالسوك والله اذا اسمع هيج كلمه واني متوقع اسمعها لا اطك واموت من قهري .

محمد:صعبه صح بس مو اصعب من الجاي
الجاي عباره عن ثارات ودم وشي يجر شي وكلنا نروح بالرجلين انت ابوك شيخ عشيره وكاعد بدواوين ويعرف بهاي السوالف ، اذا يجي يفرهم فر كم مصيبه صارت هناك ويدزون عليه ويحلها اسمعني بس هلمرة ومتخسر.

سكت بابا وجر نفس طويل وكله جيب التلفون.
كام خالو باسه من راسه وعلك الضوه شافني واكفه .

محمد: اني مو كلت الكل يطلع شعندج هنا واكفه .

رسيل: كلت خاف بابا يحتاج شي ومطلعت .

محمد: وخري وخري شلون جيل ميسمع الكلام وصلف .

ماهتميت للحجي عندي اهم شي بابا هسه والباقي مو مهم وخالو اصلا اعصابه تعبانه مو مال اخذ بكلامه
اجه خالو جايب التليفون شكله بالفيشه مال هول وطلعني بره وخابرو على بيت جدي .

ثاني يوم ساعة ٢ الظهر اندكت الباب وطلع حسام فتحها ودخلت زلم مسلحة تسد عين الشمس .....

يتبع......

احبكم ..🌹

العروس في الثوب الاسود

البارت الثاني والعشرون
خايف من اوصفك تشتهيك الناس
وخايف من ارسمك عالورق مكدر

اذا منكر صفاتك ربك امسويك
موذنبي من اوصفك ورتكب منكر

اسمر ماتصير اتحده شمس الصيف
من وجهك اخاف اعله الشمس تسمر

وعلى المرمر انصحك لاتحط رجليك
تزلك يازبد وايوصخك المرمر

يبوا رموش الكصب دورة عيونك هور
غررك بلام كلبي اوبيهن اتحيير

براري بوجنتك وشفاهي تعشك صيد
زلفك طير شايه لو غزالة بر

مطعون بنظرتك كلبي شابع موت
كاغد كلبي صار وحاجبك خنجر

يالشفاهك نيل
زهك فرعون صبري وخاف يحدث شر

يالمسودن حسن ربك تعب وياك
من خلص رئاك وكال رب استر

ياشجرة مواسم والفواكه بيك
عصفت ريح جفي وثمرك اطشر

شيلمك بعد ينرادلك مصطر
يبومتون القمم شعرك صكر مجنون

ويبو خدود الحماده وجفي بيهن طر
طفل ثملان خصرك والعجيبة البيه

ماميز ركبتك لوهي منه ازغر
شامات الخلك لازم يصيرن سود

بس مثلك جذب ماشفنه شام اشكر
يافو الحسن يلي بجبينك نار

وياحرب الترافة البيهه موت احمر

_______________

اني وعمة وريناد نباوع من الشباك على الطرمة حجت عمه ...

زهرة: ماشاءالله شوفي شكد جاييين ..

رسيل: كون يحلوها النه مو بس عدد ..

زهرة: انتي جنتي صغيرة وماسامعه بالكعدات مال جدج شلون يحلها ويسد حلوك الكاعدين محد يحجي بعد حجايته .

دخل بابا للمطبخ ..

صادق: ام حسام راح نتعبج هاليومين بس ماعندي غيرج .
زهرة: عيوني الك ابو رسيل ماعرف شسوي واكفر عن ذنبي

صادق: مالج ذنب خويه قابل تعرفين العالم عوفج من الراح اريدج تسوين جاي تنزلين الكتلي الكبير (قوري)
كم واحد عدنه بالمخزن ..

زهرة: اربعه ...

صادق: كلش زين هسه اصيح حسام ينزلهن وياج وحضروا الجاي على ما يكعدون الزلم..

دخل خالو وسمع الحجي ...

محمد: يا جاي رحمه لاهلك طريق ست ساعات السيارة تدك بيهم غير نصب غده هسه العالم تاكل وجوهنه.

صادق: صدك نسيت اني ليش ضل عقل براسي...

محمد: اطلعلهم يردوك ..

صادق: مالي عين ...

محمد: لتصعبها بايك ناهب العيبه عليها وانت ماسكتت اخذت حكك وهسه احنه ناخذه قاط لاخ امشي وارفع راسك اتذكر سوسن وبس هاي انساها ....

بعدهم يحجون واندفعت الباب ودخل رجال كبير بالعمر بس بعده بحيلة قوي كلنا سكتنه اباوع على بابا شفته ترجف وعيونه دمعت فتح ايده الحجي معناها تعال احضنك،،،

ركضله بابا يبجي وابوه يبجي التقو من بعد فراق ١٥ سنة تعالت اصواتهم بالبجي بحسرة على السنين الضاعت من عمرهم وهمه بعيدين عن بعض و تعبير عن الاشتياق .
موقف حيل مؤثر كلنا بجينه على بجيهم ...

لهناك دخل شاب ضخم اسمراني لابس دشداشة سودة وغترة لافها على راسه ومناظر وشايل سلاح بيده وسلاح لابسه فوك الدشداشه شكله مثل الحزام جوزي اول مرة اشوف هيج لبس اول مادخل شافنه وصاح ياالله .
عمة زهرة لابسه حجاب كامل بس اني بدون حجاب وبملابس البيت ،،،

رجع صاح ياالله كلت هذا شبيه كاعد يدعي خبصنه لو يفوت لو يضل برة بهاي الاثناء اجه حسام وكف بصف الولد اسمعه يكله،، 

_ فد سوي طريق اريد احجي وي عمي وحدنه..

التفت حسام شافني طب يركض عليه جرني من ايدي لغرفه خالو سد الباب ولزمني من زندي حيل..

حسام: ثوله غبيه فاهيه لو احجي حجي اثكل بعد ..

رسيل: شكو شمسويه بس تغلط وتعيط شبيك ايدي راحت..

حسام: متشوفين الولد واكف باب المطبخ ويصيح ياالله
شكو متبسمرة بمكانج .

رسيل: شسويله اذا هو ما لكة مكان غير بالباب يدعي .

حسام: لج صدك ثوله شيدعي من اكلج ثوله تزعلين من كال ياالله معناها يريد يفوت جوة ..