العروس في الثوب الاسود

تكمله

رسيل: خلي يتدلل مادام اخته بالوجود هذا اروني الورد..

زهرة: هلمرة آروني منين جبتي هذا الاسم

رسيل : عمة شبيج غير ادلعه...

زهرة : والله خوش دلع يلا صيحي اختج راح اصب الغده هم يلا نتغده الولد شوفيهم اذا بغرفهم صيحيهم واذا ماكو شوفيهم بلباب ...

رسيل : ماشي رحت صحت ريناد ودورت على الولد ماكو طلعت برة بالطرمة هم ماكو فتحت باب الشارع جان ولد على البايسكل وحسام واكف يمه وكاعد يسولفون من شافني خزرني واشر براسه معناها طبي جوة .......

يتبع

العروس في الثوب الاسود

البارت السادس
يا ترى هل ينبغي عليّ في كل مرة أن أعيش فرحة مؤقتة،
قصيرة المدى،
سريعة الزوال
تنساق من بين يديّ هاربة

وأنا أقف مشدوهة أراقبها وهي تتلاشى خلف المغيب
ولا أفهم حتى سبب أختفائها عن عالمي!
____

دخلت للطرمه ومشيت بعدني لنص الطرمة مواصلة جان انجر حيل من أيدي انداريت وأشوف حسام اعصاب ومخنزر.

ضجت كلش جاوبته بحديه..

رسيل : هاي شبيك أيدي دوخر ليش هيج تجر بيها ..

حسام : شعندج مادة راسج بالضهاري متكولين احد يفوت انتي وهاي كفشتج..

رسيل: اي غير اصيحك علمود تتغدة ...

حسام : وليش انتي تطلعين وين هذا الغبي ليش ماطلع..
رسيل: منو قصدك؟

حسام: ثائر

رسيل: والله شمدريني وينه عمة كالت صيحيهم راح اصب غدة واجيت حتى اصيحك ..

حسام : هاي اخر مرة تطلعين برة وتمدين راسج فهمتي..
يحجي بصياح

على صوته مدت راسها عمه زهره من باب المطبخ تحجي وبيدها الجفجير..

زهرة : هاي شنو الصياح شكو شبيك حسام ...

حسام : شكو تدزيها تصيحني مو عندج ولد ودزيه..

زهرة : على كيفك هاي من يمته وجاي تحاسب رسيل شو يوميه تروح وتجي لو بيتنه لو بيتهم..

حسام: بالجديد ومنا وجاي ما تطلع وحدها لو اني لو انتي لو عمو لو ابويه مال تروح وتجي بعد ماكو ...

زهرة: لا تاخذنه بعياطك فهمني شصار وهيج اجيت فاير وصوتك شعلاته.

حسام: اول ما مدت راسها وعيون صاحبي لجحتها حتى ما احترمني وتالي طردته .

زهرة : زين تسوي هو مبين مو خوش ولد ...

حسام: لا مو هو مو خوش كل الولد هيج اول ما تنفتح الباب عينهم تصير على اللي يفتحها ذاك من ذاك ميباوع

زهرة : هسة شتريد فضني نريد نتغده...

حسام: رسيل ممنوع تطلع وحدها بعد وسم ماريد تغدو انتو..

عافنه وفات جوة عمة زهرة كامت تهز بيدها كالت..

زهرة : والله هذا ابني فلا صاحي.

دخلنه جوة وبدينه نصب فات خالو ...

محمد: ها يابه الله يساعدهم...

زهرة : هله الله يساعدك عيوني تعال غسل حتى تتغده

محمد: اي والله يا ام حسام ميت جوع واليوم كلش حار الجو وبيه هوة عالي حته وجهي كسب...

زهرة : الله يعينك وياربي يقيك نار جهنم ..

محمد: أمين

رسيل : الله يساعدك خالو حبيبي ،،

رحت بسته من خده

محمد : هله حبيبتي شونج اليوم ..

رسيل : زينة الحمد لله ..

محمد: الله يجعلج..

بعدها تغدينه والامور تمام...

مشت الايام و حياتنا هادئة نوعا ما بابا سجلني بخط لان صرت بمدرسة ابعد من مدرسة ريناد وثائر وخالو يتأخر اذا كلنا يوصلنه تصير فرة عليه ،،،

بابا من جان مجاز هو حاير يودي ويجيب ومن رجع للدوام ، حسام كام يوصلني نروح ونرجع تكسيات عاد بابا كال عليمن هالتعب وشلعان الكلب اسويلها خط وافضها ...

بالبداية حسام اعترض بس من شاف بابا وخالو مصرين على رأييهم سكت .

عمة زهرة شايلتنه بالصلوات مقسومه بين بيت جدو وبين بيتنه تجي تنظف بيتنه مرتين بالاسبوع وآران هيه متكفلة بكل شي يخصه ..

بيبي على حالها صار الها اشهر وماكو فرق خالو ما خله طبيب ماعرض عليه حالتها ونفس اراء الاطباء الباقين اخر شي اقترح خالو على بابا يسفرون بيبي للاردن تتعالج ...

صادق: محمد اني مااكدر اسافر تدري بوضعي منا دوامي والبنات مدارس شلون اذا اني اخذت اجازة البنات تروح عليهم السنة .

محمد: والله ياخوية صح كلامك ولا اجة على بالي سالفه المدارس الله كريم نشوف شلون تصفى .

وبيوم جنت راجعة من المدرسة جانت امتحانات اخر السنه باقيلي أمتحانين رجعت كبل لبيت جدو واشوف عمة زهرة تريد تبجي من التعب رحت عليهة كتلها .

رسيل : شبيج عمة ليش هيج وجهج تعبان وفد مرة صايرة...

زهرة: وج يمة ضهري ماكدر اتنفس من الوجع يمكن طك ...
جاوبتها بقلق...
رسيل : ليش عمة خاف شلتي شي ثكيل ..

زهرة: لا بس اليوم بيبيتج سبحتها وبدلت فراشها ونيمتها وراها سهاد كالت بلكت تسبحيني وياج اني جنت حيل تعبانه بس كلت خطيه ميخالف هم صارلهة يومين ماغاسله توني رفعتها من الفراش حتى اكعدها بالعربانة و اسمع طكه بضهري شاغت روحي ولحد هسه ماكدر اتحرك وكوة اجر النفس .

رسيل : سوده عليه عمة شلون قهر ..

ويه حجايتي فات حسام

حسام: خير شكو..

سولفتله لحسام السالفة

حسام : خاف لزمج دمار..

زهرة : والله ما ادري ما اعتقد شغله دمار ..

حسام: كومي خلي ادهنه الج بالفكس ( دهن حار ) ..