العروس في الثوب الاسود

٢٣_________٢٤

العروس في الثوب الاسود

البارت الثالث والعشرون

كبرنة أحنه وصغر كلشي

الدرب والشوك والدنيا وضمير الناس...

______

من كتله هيج صفن بوجهي وكال...

حسام: ماكو رشوة حتى احجي ..

باوعلي بمكر وتقرب عليه ..

رسيل: شبيك حسام شنو هالحركات لتخليني اندم اجيت وياك ..

تقرب عليه اكثر بحيث انلزك ضهري بالحايط وبيني وبينه مسافه كلش قليله اباوع عيونه ذبلت ارتبكت .

رسيل: اااا وخر عفيه ..
دفعته ...

حسام: اريد جاي حتى اسولفلج ...

احم اريد صوتي يطلع ماكو اختفى وضليت الوم بروحي شلون جيت لهنا  صحت على ريناد تجي يمنه نزلت كعدنة بالمطبخ شويه أمنت .

سويت الجاي وصبيتله وبعد ماسألته حتى ماريد يحجي هو حس عليه ضجت منه بدة يسولف .

حسام: هذا ابن عمج واحد مكار ومحد يكدرله ..

رفعت راسي عليه..

رسيل: منو منهم؟

حسام: مروان غير طلع ضابط جبير بالبصرة واله وزنه هناك .

رسيل:  هااا وشسوه ؟

حسام: اول ما اجه كعد ويه عمي وافتهم السالفه منه وكله ....

مروان: عمي انه ردت اكعد وياك ونتفاهم قبل لا نكعد وي الزلم أنه من لميتهم بديوانة قبل لانجي ليجاي
خبرتهم عمي واكع بمشكله ومهددينه لان من غير طائفة ماردت اذكر سالفتك وتطش بالسلف اللي يدري بالحقيقة أنه وجدي وابوي وأيهم ...

صادق: بس السالفه مو هيج واني الكل تحبني هنا ومافديوم احد حسسني اني مو منهم ناس طيبين صارلي ١٥ سنه معاشرهم ماشفت منهم غير الخير...

مروان: اعرف عمي بس شنو اريد اكللهم ماكو بس هذا الحل .

صادق: وعمامك ؟

مروان: شبيهم ؟

صادق: يدرون بسالفتي ؟

مروان: فهمتهم حالهم حال الغرب اعرف محد
يكض لسانه كبال مرتة ومن واحد لواحد لنهة طاشة السالفه .

صادق: عفيه عليك سبع ما انسالك وكفتك هاي..

مروان: عمي انه ما انكر فضلك علي من جنت جاهل علمتني وفهمتني الدنيا،، جنت اقرب الي من ابوي انت رفيجي قبل لا تكون عمي .

صادق: والنعم منك ومن تربيتك والله انت ابن حموله يامروان .

مروان: هسا الاريدة منك تروح تكعد بنص الزلم ورافع راسك وتكول قضيتي كيت وكيت ...

صادق: ومحمد كتله خاف يحجي شي ..

مروان: اول ماجيت فهمته وكال تم ..

صادق: ريحتني الله يريح كلبك ...

كام ابوج حضنه ويبجي ..

رسيل: وبعدين شلون نحلت سالفه البيت ..

حسام: من بعد ماصارت الكعده ابوج فهم الزلم بالسالفه اللي اتفق عليها هو ومروان ودزولهم كم زلمه خشن ومشورب تكولين صكر واكف على حلكة مو شوارب راحو همه واسلحتهم لبيت ابو سالم كلولهم انتو اللي مندكين بعرضنه وبنتنه كالت ابنكم يدري بيها مزوجه ومصاحبها هاي وحده والشغله الثانيه دكيتو البيت مال ابنه هاي وحدها عليها فصل وحجايه منا حجايه منا ذولاك كامو يطكطكون تالي حولو الكعدة يمنة وكلولهم من تجون تذكرون سالفه طائفيه مو غيرها  ونطيناهم عطوة اسبوع وتجي الزلم هنا وراح ننصب جادر بالباب .

رسيل: يعني فروها عليهم حل ههههه ..

صادق: هو هذا ابن عمج فد واحد لعبهم لعب .

صافنين على حسام من يحجي عبالك فلم وكاعد نتفرج عليه شلون احداث عجيبه اندك الباب .

حسام: راح اشوف منو واجي لتطلعون ورايه ..

طلع واحنه على كعدتنه طبت عمة زهرة تضرب على راسها وتصيح تعزينة وتصخمنة .

حسام: دومج تلطمين وتعزيتي وتصخمتي من وره حجايتج هاي صدك تعزينه احجي ع كيفج بدون لطم مو حتى كلبي وكعتيه.

جرته حيل من هدومه ...

زهرة : ولك شلون تريدني ما الطم ومن وراك صارت عركة شكبرها وعمك تخربط وصعد ضغطة .

عطت بابا شبيه عفيه عمة احجي ..

زهرة: سدي حلكج مو جنتي مطمورة  بغرفتي شجابج هنا شجابج .

كامت تضرب على وجها ..

حسام: اوكفي فهميني اني شكو حتى من ورايه صارت عركه شمسوي .

زهرة: من تدري عدنه خطار ومحد يعرف اطباعنه ولا يعرفون ميانتكم  انت وياهن ورابين سوة تاخذ بنات عمك من نصهم ليش وتجيب حجايه لابوك ولعمك هااا ليش.

.. انصدمت بالحجي مكاعد استوعب شنو من بشر بكلشي يخلون أنه..

رسيل: وشعليهم اجيت ابيتنه منو همة حتى يتحكمون بيه اعرفهم يعرفوني.

زهرة: ذوله ولد عمج ومادام ابوج صالحهم كلمتهم تمشي عليج ومتكدرين تسوين اللي يعجبج وتتصرفين على هواج انتي حاسبيج مرة  مو عبالج طفله بعدج. هناك بكدج متزوجات وكل وحده عدها ثنين وتلاثة .

حسام: بس فهميني وحده وحده مو خبلتيني شصار وشلون افتهمو اني والبنات طلعنه.

زهرة: اول ماصحت على رسيل واجتك للمطبخ اني رحت كعدت يمهم شفت أيهم ومروان يتهامسون بيناتهم والخلق مكلوبة ومن انت اجيت صحت ريناد وطلعتو مروان اشر لأيهم يلحكم وكام ايهم وراك ورة شويه طب وكله لعمك ..

أيهم: عمي شنو حسام ورسيل مخطوبين ...

صادق: شنو لا ممخطوبين ليش تسأل ..

أيهم: لا بس دا أشوف حسام هواي عنده ميانة وي البنات .

صادق: شتقصد أيهم ثمن كلامك من تحجي ..

أيهم: قصدي معروف عمي من بنيه شابه تطلع وي ولد شاب بليل وبلبيت وحدهم شمعناها شتفسرها أنت .

هنا عمك صادق صار عصبي نار وكام على أيهم راد يضربه وكف مروان بيناتهم .