العروس في الثوب الاسود

٣__________٤

العروس في الثوب الاسود

البارت الثالث

لست اودعكِ يا أمي حين أقول لرحيلك وداعآ!

اللقاء بقلبي يتجدد

وإن كنتُ قد أمنتُ بأستحالة رجوعكَ الى الحياة
لكن أنتِ في واقعي.....
.
.
.
خالو اخذ بيبي  للمستشفى وللأسف طلع ضغطها صاعد والسكر معلك ضربتها جلطة خفيفة كال الطبيب بمرور الايام ممكن تتعالج بس لازم راحة واكل صحي بدون دهون وتتبهرز واهم شي الحالة النفسية جابها خالو للبيت وعلاكة مال ادويه شكبرها ويرادلها مداراه..

محمد : صادق الحجية وضعها حيل تعبان صادق مو احجي وياك .

صادق:  راحت وراح كل الخير وياها اخذت الضحكة والفرحة وحتى العافية..
يحجي بابا ويشهك ويبجي عبالك طفل صغير .

جاوبه خالو بخنكة..

محمد: كوم ياخوية ساعدني نشيل الحجية ونخليها بفراشها والله حتى حيل مضل بيه .

جاوبه بابا بصوت مبحوح ..

صادق : ليش شبيها الحجية..

محمد: ماتحملت الخبر وسكرها صعد والضغط علك ضربتها جلطة ماتت رجليناتها ..

صادق: شنو يعني بعد ماتمشي..

محمد: الطبيب كال بالعلاج الطبيعي والادوية ترجع واحتمال لا ...

صادق: الله يشافيها.

حجاها وكام يبجي طلع للحديقه اختنك ..

اني وريناد بس نبجي ونباوع بالوجوه منعرف شنو نسوي..

طلع خالو محمد على بابا برة وطلعت وراه اريد اعرف ماما وين راح اتخبل عليها..

محمد: اسمعني صادق هاي زهرة بالمستشفى يم ابنك وابنك بالخدج يرادله عنايه ويرادله سهر يعني زهره منا لشهر هيه مو بلبيت واحنه هنا عدنه سهاد مقعده ويرادلها مداراه ومنا وكعة الحجية وبناتك صغار اخ يابه اويلي ع المصيبة الوكعنه بيها لا اعتراض ع حكمك الهي منك الصبر وكام يضرب ع راسه ،، فهمني شلون بينه شلون راح تدبر..

بابا صافن ويبجي محجه شي ..

محمد: تخلص الدفنه و اخلي وحده من بنات خالاتنه لو بنات عماتنه تجي هنا تكعد على ما الله يفرجها وترجع زهرة للبيت..

صادق : خابر على علاء بلغه يجيب اهله ونبراس ونطلب منهم يضلون يمنه هالفترة على ما نوكف على رجلينه وتعدي الازمه..

خالو علاء  الكبير مسافر بعمان وعنده ٣ ولد احمد و وليد و زيد وبنات ٢ ولاء وافنان ...

نبراس بنت خالو محمد متزوجها أحمد ابن خالو علاء وكلهم مسافرين بعمان مستقرين هناك  والولد الصغار كملو دراستهم بعمان  لحد مادخلو جامعات ،، سنين صارلهم من مسافرين .

محمد: والله راحو من بالي هسه اخابرهم وابلغهم حتى يحضرون الفاتحة لان اكيد مايلحكون ع الدفنة ...

بابا هز راسه ب اي .

والليل كله يبجي وينوح ع امي وخالو ساعه يمه ساعه يم بيبي ويم خاله سهاد ..
خطيه حيل تعب وهو منا مقهور ع ماما كلش متعلق بيها لان هيه اختهم الصغيرة ..

اول ما طلع  الفجر راحو للمستشفى علمود يكملون اجراءات الدفن ...

طلعو واني دخلت للبيت اباوع ريناد ماكو واصلا ماشفتها من اجه بابا اختفت.كمت اصيح..

رسيل : ريناد وينج..

ادور عليهة وابجي ماهيه تخبلت ركضت ع حسام وثائر كتلهم ..شفتو ريناد

جاوبني حسام بخنكة..

حسام :  احم لا ماشفتها مو جانت يمج ..

رسيل : اخر شي جانت بفراشها وصافنة حتى محجيت وياها ومن اجه بابا اختفت ..

حسام : اخاف راحت لبيتكم .

رسيل : شيوديها هناك وحدها..

حسام: امشي نشوفها ..

طلعنه اني وحسام دخلنه لبيتنه امشي وابجي هذا المطبخ ماما شكد جانت تحبه جابت غرض غرض كله ع ايديها ،، دائما جنت اسمعها  تكول هاي مملكتي وابد ما افكر اشيل منا حتى اذا البنات كبرو نضل بيه ... اخ اخ شلتي  من الدنيا كلها مو بس من البيت .

اباوع على البيت واصفن كل شويه بالي يشطح يم موقف معين ،،،اجاني صوت حسام فززني من صفنتي ..

حسام :  وينج يمعوده صارلي ساعه اصيح وين صافنه.

حجاها بنترة ..

رسيل : هاا ماسمعتك لكيت ريناد ..

حسام : اي تعاي بغرفه امج نايمة ..

رحت اركض لغرفة بابا وماما لكيتها حاضنة ملابس ماما ونايمة ودموعها تنزل على خدها نمت بصفها وحضنت الملابس اني هم ودموعي بدت تنزل بحركه اكثر عبالك حاضنه ماما.

حسام : راح تبقين هنا لو تكعديها وتجون لبيتنه..

رسيل : لا خليهة نايمة ..

مجاوبني سد الباب وطلع واني ضليت اشم بملابس ماما وابجي غفيت من التعب لهناك واسمع صوت عياط وهوسه بيت بيبي ركضنه اني وريناد...

دخلنه للطرمه واشوف شي خشب بعدين عرفت هذا تابوت ،، وكلها نايمه عليه و تبجي الصغير والجبير ،،

عيوني تدور على بابا ذاك اي والله ذاك بابا بس منتهي فاصل عن الدنيا ،،،
هذا خالو محمد حالته اتعس بعد ،بيبي ع العربانة تباوع بعيونها وتبجي مابيها حيل تصرخ لو تحجي..

اخذوها لماما وراحو يدفنوها راحت وراح و كلشي حلو بالدنيا .

بدت تتوافد النسوان لبيت بيبي انكلبت الدنيا علينه نصبو جادر بالباب،،،

ثاني يوم الفاتحة اجوي بيت خالو علاء ،،زوجتة أبتهال و ولدة وبناتة ونبراس بنت خالو محمد.

خالو محمد اول ما شاف عمه ابتهال راح عليها.