العروس في الثوب الاسود

تكمله

صادق: ردت افاجئ رسوله ، واجيت طاير  ردت اشوف ردة فعلها شتسوي ،فتحت الباب وضلت مصدومه ههههه.

رسيل: والله بابا احلا مفاجئة بالدنيا يمكن متجي مثلها .

صادق : حبيبه ابوها شكرا...

كام بابا باس بيبي براسها واجه كعد متحس بأي احد ومتعرفنه اصلا.

ضلينه نسولف وعمه سوتله اكل فات سبح وطلع اكل،، بليل اجوي خالو وحسام وثائر  طارو من الفرح من شافو بابا جاي.

محمد: شنو هاي صاير مثل المسلسلات تخابر الصبح تجي بليل هههه.

صادق: احب الاكشن مو بيدي ...

حسام: عمو لايكلك السفر وحليان....

رسيل: يمه اسم الله من عينك لتحسد بابا ..

حسام: فوك ما اجامله يعني....

رسيل: ما يحتاج اصلا يجنن بس انت ما عندك نظر وتغار

حسام: حرت وياج اكول حلو تكولين تحسد اكول محلو تكولين اغار.

صادق: هاي رحت ورجعت بعدكم نفس المداهر.

زهرة: انت شايف منهم الله يساعد كلبي موتوني بالنكرة مالتهم والعناد والمداهر.

محمد: مونسينه لو مو صوتهم جان طكينة ..

رسيل: احم احم ههههه بينه فايده اريد راتب ...

حسام: انتي على كلشي رايدة راتب .

صادق: خلونه بالمهم ؛ حسام طلعت النتيجة مالتك..

حسام: اي عمي ونجحت الحمدلله ....

صادق: اي على الخير حبيبي يوم تعينك وزواجك ....

حسام: ركز على الثانيه بداعتي ..

صادق: هههههه يلا يوم زواجك وزواجك ..

حسام: هسه تمام ههههه ...

التهينه سوالف وضحك صارت ساعه ١١

محمد: شنو حلت الكم الكعدة وين العشا مو عصافير بطني كامت تعيط مو توصوص.

زهرة: فرحتنه ب أبو رسيل نستني حتى الاكل ...

صادق: الله يفرح كلبج دووم ياغالية .

رحنة اني وعمة للمطبخ وحضرنه العشا
جان الاكل بوجود بابا طعمة غير اكلت من كل كلبي ...

....

مر اسبوع من رجوع بابا واعلنو النتائج .

رحت للمدرسة اني وبابا وخالو ، شنو الخوف البكلبي مينوصف ،

رسيل: بابا انتضرك هنا شوفها وتعال ما اكدر ادخل ..

صادق: لاتخافين بطله انتي هسه استلمها واجيج وياربي خير .

راح بابا،، اكو صبه  بالساحة كعدت عليها انتظرة واكل
بأظافري من التوتر واهز برجلي...

ورة ربع ساعه اجه بابا يبتسم بيني وبينه مسافه ١٥ متر تقريبا بس عبالك ١٥ سنه، اشرتله بيدي يعني بسرعه تعال .