العروس في الثوب الاسود

٢٩________٣٠

العروس في الثوب الاسود

البارت التاسع والعشرون

مدري امنين اجونه وفركو هلدين        ياهو الجان يعرف طائفة جاره
عشنه اخوان والله وايد تشبك ايد        ولو يوكع طفل تحزنله الحاره
ولو يوكع عمر يركض حسين وياه         ونلتم بالعصر ونروحله لداره
ولو يعثر علي يركض عليه عثمان         يكله اسم الله خويه وينكث اغباره
ولو واحد تمرض بينه ذاك اليوم         نكضي الليل يمه وكلنه سهاره
ماضنينه مره بهل الوكت يندار            وتجينه وجوه صفره وكلهه غداره
______

تغير لون وجها ايده رجفت
انتجة على البنيد رحت يم بابا  اريد اقره شنو مكتوب  بالورقه و هيج غيرت احواله باوعت على الورقه انصدمت كلبي كام يرجف عيوني دمعت ممصدكة اللي قريته .

رسيل: بابا هاي شنو المكتوب بالورقة ...

عقج الورقة وخلاها بجيبه ويتلفت يمنة ويسرة .

باوعتله بقلق والخوف انزرع بكلبي .

صادق: صعدي بسرعه واللي شفتيه بالورقة متحجيه لاحد .

رسيل: بس بابا هذا تهديد ..

صادق: اعرف تلكيه واحد زعطوط وكتبها لتهتمين .

رسيل : شلون ما اهتم بابا حبيبي.

ابتسم وكام يسولف ويحاول ينسيني اللي شفته بس اني بالي مو يمة يم المكتوب بالورقة نفسي كامت تلعب ومعدتي كلبت اشرت لبابا يوكف السيارة نزلت اركض للرصيف واستفرغت لحد ما ارتاحيت .

خطيه بابا راح جابلي مي غسلت وجهي وكعدت على الرصيف كعد كبالي و يباوعلي بقلق ونضراته تتوزع على وجهي .

صادق: ليش هيج صار بيج قبل شويه جنه نسولف ونضحك وجنتي مثل الوردة.

رسيل: بابا راح يكتلوك مو راح ياخذوك من عدنه، مثل ما راحت ماما راح تروح مني . خليت ايدي على وجهي وكمت ابجي.

كعد بصفي واخذني لحضنه ..

صادق: باقي لتخافين اضل وياج لحد ما كل سنوني توكع وتكومين توكليني بيدج لان ما اكدر اكل وحدي اصير  مثل بيبيتج وتكومين تضوجين مني لان كل شويه اريد منج شي ارجع مثل الطفل الصغير واكوم ازعل عليج وتعاي كل شويه لازم تراضيني .

حجيت بجية وقهر

رسيل :  شفايتلي بابا اتمنى تعيش ضعف عمر بيبي واداريك واشيلك بعيوني اذا اكو امنيه بداخلي واريدها تتحقق واكثر شي ادعي  ربي تصير هي الله يحفظك النه وماشوف بيك يوم موزين .

صادق: لتخافين وصيري سباعيه وكلمن حد يومه اذا الله كاتبلي اعيش سنه يوم واحد ما اعيش فوكاها واذا كاتبلي اعيش ١٠٠ سنه يوم مينقص منهة .

رسيل: اني كلشي ما اريد من الدنيا بس اريدك الك يوميه انزل على كيفي اشوفك تتنفس لو لا من ماتت ماما لليوم اني ما انام الليل كل شويه وانزل مخروعه خاف بيك شي .

صادق: اني ما احب البنية الجبانه وتبجي هوواي اريدج تصيرين  سباعية وتتحملين كلشي هاي دنيا طويله راح تشوفين اشكال الناس وتعاشرين الزين والموزين خوما اقل شغله تصيرلج وبجيتي اذا صارت شخصيتج ضعيفه ومهزوزه محد يحترمج والكل راح يدوس عليج ويمشي وان شاءالله مايجي بطريقج بس الزين ويبعد عنج كل شخص سيء كومي نروح للبيت واهتمي بدروسج .

جريت نفس قوي وكمت ،ملابسي كلها مي وتراب عبالك مدري وين جنت اللي يشوفني يكول جانت تلعب بالطين .

وصلنه للبيت وقبل لا انزل من السيارة لزم ايدي .

صادق: انطيني وعد متحجين لاي احد عن الرساله .

رسيل: ماشي بس شلون اذا طلع الحجي البداخلها صح وينفذوه اموت بابا اذا صار عليك شي واني جنت اعرف وسكتت .

صادق: والله شغله زعاطيط صارلنه سنين هنا منو يعرف هذا شيعي وهذا سني امشي ننزل ولاتبينين لاي أحد ترة ياكلون راسي ويخلصون كلبي مابيه حيل واحد ينك بكلبي .

رسيل: هذا هو ما احجي ...

نزلت دخلت جوة وبابا راح للمحل يم خالو شافتني عمة

زهرة: شنو هذا حالج ليش هيج ملابسج كلهة طين .

رسيل: عثرت و وكعت

زهرة: غير تنتبهين خوما تأذيتي ..

رسيل: لا الحمدلله متأذيت ، عمة راح اروح ابدل واجي ما اتاخر .

زهرة: ماشي حبيبتي

  طبيت للبيت كلبي مقبوض وخايفه عبالك واحد عاصر كلبي عصر .فتت للحمام سبحت وطلعت بدلت ورجعت لبيت جدو شافني حسام جان كاعد بالحديقه.

حسام: هي هي رسيل ويأشر بيده ..

رسيل: هااا

حسام: صار ساعه اصيح وين صافنه ..

رحت يمه كعدت

رسيل: مصافنه ..

حسام: شبيج شو وضعج مو تمام صاير شي؟

رسيل: اليوم سجلت بالمعهد واريد اطلع معدل وخايفه .

حسام: انتي مو ترحين تاخذين محاضرات من ترجعين اشرحلج المافاهمتة وامتحنج تصيرين توب اهم شي الخوف تشيليه من كلبج لان يطيح حضج شلون اني اول سنه هم هيج صار بيه .

رسيل: الله كريم  لعد وينهم شو هدوء .

حسام: ريناد وثائر راحو ويه امي للسوك ..

رسيل: شعدهم ..

حسام: ريناد تريد ملابس ..

رسيل: وثائر شعنده رايح وياهم ...

حسام: يخاف عليهن هههه ..

رسيل: والله خوش صار رجال ثأوري ..

حسام: الدنيا تركض ركض بينه ..

رسيل: اي والله صدك ...

حسام: رسوله شنو رأيج نطلع نغير جو ..

رسيل: وين نروح ..

حسام: بكيفج وين يعجبج نروح ..

رسيل: حسام دائما تجيني بالوكت الغلط بوكت لو ضايجه لو نفسيتي زفت.