العروس في الثوب الاسود

١٧_________١٨

العروس في الثوب الاسود

البارت السابع عشر

نذر لعيونك عيوني

وحنيني وكل بكايا الحيل.

_____

التفتت حسام واكف يباوعلي ومخنزر...

حسام: ليش تلعبين بشغلات غيرج مو عيب هاي من شوكت انتي تدخلين لغرفتي بدون علمي.

يحجي بعصبية ..

ضحكت وكتلة بنبرة استهزاء
رسيل: منو داخل غرفتك ولاعب بأشيائك خاف عبالك اني  مطشرة غراضك ومطلعتهن من مكانهن.

حسام: لعد منو غيرج شفتيني اصيح كلتي اروح ارجع كلشي بمكانة قبل ليجون ويشوفون شمسوية وانكشف.

رسيل: وهاي لان شفتني بغرفتك عبالك اني لاعبة بأغراضك يعني فلنفرض مثلا انباكت منك فلوس  وشفتني بالغرفة راح تتهمني اني الي بكت.

حسام: والله المجرم وين يلكوه بمكان الجريمة ...

رسيل: اللي فهمته يعني اذا انت ضايعتلك فلوس تتهمني عادي مو.

حسام: مكلت هيج لتحجين بكيفج...

رسيل: اسمعني زين اذا واحد بينة يتحاسب فهو انت شتسوي بصوري كلهن يمك ...

حسام: ما ماخذ صورج جوز امي ضمتهن هنا ..

رسيل: بضحكة والبيت كله ماكو مكان غير غرفتك يخلون بيها الصور وبعدين شجابهن عد عمة زهرة احجي شي واحد يصدكة وغرفتك اني مداخلة الها وهاي الهوسة اللي دتشوفها مو اني مسويتها شوف منية خالتك ابالها وتفتر وراك بنصاص الليالي هيه اللي دخلت .
ومرة ثانية من تريد تحجي وياية اعرف شلون تحجي هاي اذا سمحتلك تحجي وياية  وعمري ما اباوع بوجهك شايف السلام  الجان بيناتنه صفكت ايد بأيد وكتله بح حتى هذا بعد ماكو ..

دفعته من كتفه وطلعت كمت اتنفس سريع و عيوني دمعت من الموقف اللي صار يعني طلعني حرامية واني اللي متربية عدهم .بسيطة حسام ..

طلعت وطلع وراية راح يدور على بابا ورة تقريبا نص ساعة اجوي بابا جان يم الفيتر عندة عطل بسيارتة سواه لهذا تأخر .

مشت الايام هدأ القصف من بعد ما سقط العراق كليآ بيد الأمريكان  الحياة رجعت لطبيعتها شوية شوية اني وريناد امتحنة اخر السنة ،، ماداومنة هلكد بس خمس اشهر تقريبا و بداية شهر الثالث بدت الحرب وعطلنة ومن انتهى القصف امتحنة و بدت العطلة الصيفية ورجعنة لبيتنة خالو مقبل كال ضلو هنا بس بابا كله لا نرجع لبيتنه وغراضنة صح هنا مرتاحين بس مو مثل واحد بيتة .

اهل شجن بهاي الفترة رجعو لبيتهم وانسد موضوعها لحد الان محجينة شي لبابا لان الوضع تعبان مو مال مشاكل .
وبيوم بليل كبت العيطة بين بابا وشجن نزلنة نركض ونسمعها تصيح بصوت عالي بغرفة بابا.

شجن: أنت ليش تزوجتني لعد ...

صادق: اتفقت وياج على كلشي وكتلج على وضعي ومستحيل اتغير وردتج بكل طريقة تبطلين انتي جلبتي شسويلج .

شجن: شنو ذنبي اني بعدني صغيرة شنو مجبوريتي ادفن روحي ويه واحد ميحبني وميطيق يباوع بوجهي .

صادق: مشكلتج شكو قبلتي بيه وعفتي ذوله الشباب الضالة جان اخذتيلج شاب بكدج لو يكبرج بسنتين وعشتي عمرج وياه شسوين برجال أرمل ونذر حياتة لاطفالة.

شجن: بعد اكلت تبن وتزوجت شلون ابقة هيج ..

صادق: ضلي ابقي ماكلة التبن وكملي حياتج الي انتي اختاريتيها.

شجن : بس حرام عليك هيج تسوي بية ..

صادق: لا مو حرام اني من اجيتج كتلج يابنت الناس اني ما افيدج اني احب زوجتي وما اكدر اتقبل وحده غيرها نفسيتي ما تتقبل شسوي وكتلج ترة الجماعه رايديج علمود تدارين الحجية وبنتها قابله بهيج وضع كلتيلي قابله كتلج الج اسبوع فكري زين ولتتأملين مني شي كلتي هاهيه ومايحتاج افكر ومع ذلك خليتج اسبوع وانتو دزيتو علينه وكلتو موافقين بعد ليش يومية نفس القوانة وشالعة كلبي شو بكلشي ممقصر وياج شتريدين بعد شتريدين وكام يصيح .

شجن: كل اللي دتسويه مو بعيني اني اريدك الك اريد اصير زوجتك كافي عاد حس بيه حس .

صادق: انتي دكج ومدكوكج على هاي السالفة شو تعاي ...

وراها صار هدوء بالغرفة صعدنة نمنة فوك
كلمن بمكانها ورحت غطيت اران جان متكشف اخر فترة بابا اشتراله جربايه وصعد يمنة .

ثاني يوم نزلت الصبح وبابا طلع من غرفته وهيه طلعت وراه فرحانة والضحكة شاكة الحلك .

شجن: صدوقي اليوم اني اسوي الريوك ..

صادق: ما اشتهي راح اسبح واطلع.

شجن: بس ..
دتحجي قاطعها بابا ..

صادق: رسيل بابا حضرو نفسكم اليوم نطلع ويه بيت خالج .
رسيل: تمام

صار العصر بدلنة وطب بابا بدل وطلع ،، شاف شجن كاعده كللها ...

صادق: كومي اوصلج لاهلج وارجع ..

شجن: ليش ما اجي وياكم ..

صادق: رايحين زيارة مريض اخت الحجية طالعة من المستشفى نأدي الواجب ونرجع.

شجن: يعني ابات بيت اهلي ...

صادق: لا من ارجع اجي عليج ..

ركضت باست بابا وحاوطت ركبته بيدها

شجن : يعني تشتاقلي اذا بتت.

وخر ايدها ونترها حيل .

صادق: ديري بالج مرة ثانية تسوين هيج تصرفات كدام البنات .

شجن: قابل شمسوية اني ..

صادق: روحي لبسي وفضيني مو متت ...

شجن شكلها كلش حلو ونازك والصراحة احلا من ماما وحتى اصغر منها وضحوكة ومرحة بس بابا نفسه مو بيها .
طلعنه رحنة لبيت اخت بيبي جانت طالعه من المستشفى مرة كبيرة بالعمر ضلينة تقريبا ساعتين ورجعنة لبيت جدو .
دكينة الجرس طلع حسام فتح الباب ،،