العروس في الثوب الاسود

تكمله

قبل جانو خالين سيم نفتح الباب بيه بس من صارت الحرب خالو شاله خاف كلشي يصير.

طبينة جوة وكعدنه يم بيبي خطيه اول مشافت خالو كامت تبجي على اختها وضلت تسأل شلونها وشلون صارت طمنها خالو وضلو يحجون عفناهم ورحنة للمطبخ اني وعمة زهرة نسوي عشا .

اجه حسام كال محتاجين شي اجيب من برة ..

زهرة: ببسي جيبلنه..

حسام: ماشي .

باوع عليه وطلع اني بهاي الفترة كلها ما احجي وياه من يوم الموقف اللي سواه ويايه .

رجع وجايب ببسي وعصاير لان يعرف اني مو صداقة ويه الببسي عرفت علمودي جايب حتى متبين بس اليه جايب اكثر من واحد .

خلينة السفرة ونقلنه الاكل للهول وكعدنه كلنا ناكل وزعو العصاير والببسي اني اكلت ومشربت العصير عفته متقصدة حتى يعرف اني ما اريد اي شي منه .

كملنة العشا وراح بابا يجيب شجن انتظرناه بالطرمة ورة دقايق اجوي .

دخلنة لبيتنه وكلمن راح لغرفتة. ورة ساعه توني اريد اغفى واسمع دك بلباب خفيف طلعت من غرفتي باوعت هاي شجن تدك بالباب مال غرفة بابا اسمعها تكله ..

شجن :صادق ليش قافل الباب ...

ضلت تدك وتحجي وبابا ما فتح الها ضلت ايام على هذا الحال .

بابا اول ميدخل يقفل الباب عليه كامت تبدل وتتحضر وتروح تنام بغرفه بابا قبل لا ييجي هو من يشوفها هيج يصعد ينام يمنه واستمر الحال كما هو عليه .

الى ان فد يوم كبت العيطة بينها وبين بابا ..

شجن: افتح الباب انت ليش هيج تسوي اني مو زوجتك اطلع احجي ويايه جبان تتختل جان استحيت...

هيه كالت هيج وجان يطلعلها بابا وخنكها ..

صادق : لج هاي منو الجبان كلبه اليوم اموتج بيدي...

نزلنة نتراكض خايفين ونبوس بأيد بابا حته يعوفها وهيه اختنكت تركها وكعت بالكاع كامت تبجي وتصرخ

شجن : انت واحد ظالم متخاف الله.

صادق: اني ظالم وما اخاف الله شكو قبلتي بيه

شجن: لعد ليش اخذتني وعفتني ليش املتني ..

صادق: من ملحتج جبرتيني يوميه تزنين على راسي ردت اسكتج واخلص هلمرة انجلبتي .

شجن : اني من حقي اصير ام ليش تحرمني ..

صادق: واني ما اريد منج طفل اللي عندي كافي والحمدلله والشكر واني متفق وياج ومبري ذمتي امام الله.

شجن : امشي وديني لاهلي اني ما ابقالك دقيقة بعد جايبني خدامة ...

صادق: هذا جان الاتفاق ليش قبلتي تصيرين خدامة
وانتي حتى عمتي وسهاد شلتي ايدج منهن واني متزوجج علمودهن ..

شجن: والله خوش عيني جايبني خدامة للغربه شتكول لروحك من مرتك تخدم أبيت مو بيت اهل زوجها حتى اكول غصباً عليه اروح اهل زوجي ذوله .

صادق: خصم الكلام اني ما اريدج وتريدين تروحين لاهلج هسه اوديج ولتوصلين لبيتي بعد ..

شجن : اي اروح اريد اخلص عايزه على بيتك..

صادق: يلا يلا بسرعه لمي شكو عندج واني طالع بالباب بين متكملين.

راحت لمت ملابسهة كلهن ولبست عبايتها وطلعت .......

يتبع....

العروس في الثوب الاسود

البارت الثامن عشر
واني اراكَ بعينِ قلبي جنّةً

يامن بكَ مرُّ الحياة يطيبُ..

____

راح بابا وداها ورجع كلش ضايج ومقهور من اللي صار
طلب من عدنة نعوفة وحده وكعد برة بالحديقة اني ضليت انتظرة بالمطبخ خاف يحتاج شي لو يتخربط لان بابا اخر فترة حيل تعب هم ميجي للبيت واكله من برة وهم مشاكل وية شجن كل شوية اباوع من الشباك اشوفة مدنك راسة سودة عليه من اباوع عليه اشوف هموم الدنيا كلها بعيونة بابا جان نسمة وهادئ فجأة انكلب حاله مجرد تزوج واصلا زواجه مضرة مو نفع...

مشت الايام وبيوم كاعدين على الغدة بابا سأل خالوا

صادق: محمد ..

محمد: هاا
صادق: شسويت على سالفة المحل .

محمد: يامحل

صادق: هاي شبيك مو ردت تفتح محل مال انشائيات ..

محمد: هههه حيل بعدك تتذكر ..

صادق: بلا شقة ترة احجي صدك ..

محمد: هو احنة شفنة دربنه ياخوية شو  نوينة بس النية وصارت الحرب اذا اريد افتحه شراح يصير خليني هيج مرتاح .

صادق: واللي يكلك الفلوس موجودة والمحل موجود ...

خالو رد بلهفة وعيونة تلمع من الفرح وهم متفاجئ

محمد: لا اكيد تتشاقة كول والله ..

صادق: مكذب عليك بيوم علمود احلف هسه ..

محمد: حشا خويه محشوم بس مامصدك والله ..

صادق : لا صدك وهسه نروح نشوفة حتى اذا عجبك نأجرة ونبلش نتسوك ..

محمد: هو وين صاير يعني الموقع على شارع عام بالسوك بفرع...

صادق: ارقى موقع بمنطقة راغبة خاتون شارع الضباط
قريب على جامع العسافي ....



محمد: بربك لك غالي الايجار هناك ...

صادق: منطقة زينة والشغل بيها ماشي احسن من غير مكان .

محمد: امشي نتكاتب هسه ...

وكام على بابا حضنة وبجة ..

صادق: هسه ليش البجي ترة ابطل ..

محمد: لا سكتت خويه هاي دموع الفرح مامصدك راح يصير عندي عمل واخلص من التكسيات

صادق: هو اني ليش استعجلت بيه لان شغلة التكسيات تخوف صارت مو كل منطقة تكدر تدخللها وهم عصابات كومة ليروح فد يوم يصعد وياك واحد ابن حرام ويسلبك السيارة ويقتلك هسه الموديل الجديد ياخذون السيارة ويقتلون صاحبها .