العروس في الثوب الاسود

تكمله

اجتني فكرة بس يارب تنجح،
انتضرت نص ساعة ضبط وطلعت من الغرفة باوعت يمنة يسرة ماكو احد مشيت وصلت للدرج مديت راسي اريد اشوف اكو احد بالهول ،
هو مو هول مكان جبير بس اني اصيحلة هول ،
كلشي ميبين لان لوفه بالدرج ،
يعني لازم انزل ،
نزلت الدرج على كيفي واتلفت عبالك حرامي اوووف شراح تسوين بعد يا رسيل ،

خلص الدرج واخيرا نفسي انكطع شلون يصعدون وينزلون يوميه الله يساعد نور صاعده نازلة عليه تشوفني شنو احتاج ،
فتت للهول شفت بيبي كاعدة وعوجيتها بيدها...

رسيل: هلو بيبي ..

الجدة: شني هلو ، هذا سلام ..

رسيل: شنو اكول ...

الجدة: كولي السلام عليكم مصباح الخير ، ولو صار الظهر يا مصباح هذا.

رسيل: بيبي كاعده من الصبح بس جنت تعبانه وبقيت فوك.

الجدة: ساعدي البنيات التهي وياهن بلجي تنسين .

جريت حسرة ..
رسيل :  ماشي .

حجيتها و رحت للمطبخ شفت نور واكفه على الطباخ تطبخ كل جدر شكبرة.

رسيل : هلو نورة.

نور: هله بحبيبتي شلونج اليوم عساج بخير وعافية

رسيل: احسن شويه، اليوم ايوته كعدتني.

نور: انه دزيتها عليج حت تصبحين عليها.

رسيل: تخبل احلا صباح عاشت ايدج .

نور: كعدي على الميز لبين ما خدرلج جاي جديد ، اسويلج بيض لو جبن.

رسيل: لا عفيه ما اريد .

نور: شني هيه الاكل شعليه وتكاطعتي وياه.

رسيل: ما اشتهي الاكل مر بحلكي حتى المي علكم.

نور: ازمة وتعدي ، فد يرادلج قوة ليش انتي هشه
الحياة يراد الها الكوي، ترة الضعيف ينكال.

رسيل: ومنين اجيب القوة ، وبابا اخذها وياه.

نور: امر ربج ، تعترضين على امر الله .

رسيل: حشه لله بس هذا فعل البشر لو مو دنائتهم جان بابا لحد الان عايش ويمكن يصير عمرة مية ..

نور: لكل اجل كتاب، ولكل موت سبب ، ربج كاتبله بهذا اليوم يموت وبهاي الساعه.

رسيل: تعرفين من شفت التهديد على سيارتة ، شافني خفت وكمت ابجي ، كالي اذا الله كاتبلي اعيش سنه ما ازيد يوم ، واذا ١٠٠ سنه ما انقص يوم، بس هو حتى السنة مكملها ويانه...

جان اسمع صوت واحد جر حسرة طويلة ، التفتت واشوف بيبي ، من شافتني التفتت كامت تبجي ، واشرتلي بيدها يعني تعاي احضنج ، كمت رحت حضنتها ، كلش محتاجه احد يوكف ويايه، ثنينه نبجي ونور هم .