العروس في الثوب الاسود

٢٧________٢٨

العروس في الثوب الاسود

البارت السابع والعشرون
ضعنة

وراحت اللمة وكلمن مشى بهمة

______

مشهد مستقبلي💫

وين صافنة ؟
رسيل رسيل رجعتي تصفنين يلا راح تستبردين كومي جبت المنشفة .
ناوشتني المنشفة نشفت ولبست البرنص وطلعت امشي بس ميتة الصارلي مو قليل يمكن اني قوية اللي تحملت كل هذا وبعدني مامتت دخلت لغرفتي ، جابت المشط وكفت على راسي .

نور: خلي امشط شعرج

رسيل: عوفيه راسي يأذيني عفيه

نور: ما اوجعج على كيفي حرامات متعكد

رسيل: هاي لان جان بيه دم ويبس وتشابك الشعر .

نور: انتي ليش متحجيله الحقيقة وتخلصين من كل هذا الضيم .

رسيل : المن احجي منو يصدكني شفتي بعينج كلها طلعتني كذابه رغم حلفت وفرفحت .

نور : مو على السوار قصدي

رسيل: لعد على شنو

نور: على السالفة القديمة واللي صار وياج روحي احجيله الوحيد ميعرف بلكت يصدكج .

رسيل: نور كارهني متشوفين بوجهي ميباوع عبالك خيال كباله مو بشر وحجاية والخ يكلي خاينه .عوفيني اني ماعندي حظ بالدنيا، برأيج ليش صار بيه كل هذا شنو الجرم السويته، ليش من دون العالم هيج صار بيه، ليش مو اني يم اخوتي هسه هواي اسئلة تجيني وما الكه الها جواب .

نور: حبيبتي هذا اختبار من رب العالمين والمؤمن الصحيح يمر بعده اختبارات ويجتازها بالصبر والتحمل وهذا كله عليه ثواب .

رسيل: برأيج كل هاي الناس؟العايشة مرتاحة وسعيده كفار وماعدهم اختبارات شو بس عليه معقوله بس اني المؤمنة وهيج يصير بيه عمي اذا اخلص من الاني بيه واصير مثلهم حتى الصلاه اتركها.

نور: حرام استغفرالله ليش هيج تحجين رسيل اول تالي انتي ام القران والصلاه والصبر والله مرات من تصير عندي مشكلة وانقهر عليها رأسن تجين ابالي اكول اني ذرة لمصايب رسيل ما اوصل وهي ماجزعت مثلي، صلاتها والتزامها ويه ربها .تالي استغفر ربي واكوم اصلي حبيبتي تعوذي من الشيطان وكومي صلي صار المغرب .

رسيل: اريد انام مابيه حيل كلشي اسوي

كملت شعري وطلعتلي ملابس

نور: هاج هاي البجامة لبسيها وكومي صلي ترتاحين وبعدين النومة هيج وكت ابد مو زينه .

كمت لبست بدون ما احجي رحت توضيت وكفت على السجادة ابجي بصوت عالي واشهك شلون عبالك واحد وشاف ابوه ويشكيله ضيم كلبه هاي اني من الزم السجاده احس رحت لابويه اشكيله واعرف ربي يسمعني وهو الوحيد من اشكيله ميمل مني رغم يومية اعيد الحجي نفسه واعيد كلشي مر عليه بحياتي انفض القهر والألم بسجادتي واكوم كأنما كلشي مصاير ويايه وارجع اتحمل من جديد الله ناطيني قوة صبر عجيبه اواجه اكبر شي بثبات وقوة يمكن يرجع هذا الشي لتربية بابا النه علمنه على الصبر والتحمل والمسؤوليه،

و شخصيتنه صارت قويه لان جان ياخذ رأينه بكلشي ويرجع النه من تصيرله مشكله ونحاول نحلها وياه ، من موضوع زواجه من شجن ولحد ما عافنه يشاركنة بكلشي يخص حياته ويشوف رأينه بيه شنو اذا وحده بينه رفضت والثانيه قبلت ميسوي الشي الكال عليه اله ثنينه نوافق وهذا الشي كلش عزز ثقتنه بنفسنه وخله عدنه قوة عجيبة بحيث نواجه اكبرر واحد .

كملت صلاة لميت السجادة وطلعت من الغرفة اباوع الصالة نظيفة خطيه اكيد نور نظفتها والله هاي البنية لو شنو اسوي ما اجازي ربع تعبها ويايه دمعتها ويه دمعتي تنزل .

دخلت للغرفة مددت ورجعت لخيالي لحياتي القديمة وين معفتها ملاذي الوحيد اللي يطلعني من الاني بيه ...............
__________

نرجع

طلعت من الحمام فرحانة لان راح اغير جو صارلنه هووواي كلش مامسافرين اخر سفره  من جنت صف رابع ابتدائي بابا جان كل صيف ياخذنه لدولة
لبنان سوريا السعودية الامارات تركيا اكثر شي جنه نروحلهن .

رسيل: يلا كومي نزعي ملابسج وسبحي صرتي طرشي

ريناد: ما بيه حيل انام شويه واكعد اسبح

رسيل: براحتج ..

وكفت اباوع على الغرفة كلش عجبتني لون الحايط مصبوغ بلون بيجي فاتح والبراكيتات ضواهن هادئ لونه شمسي واكو سريرين واحد الي والثاني لريناد والحمام يخبل يسوي واهس واحد يسبح بيه .

بدلت ومشطت شعري وطلعت من باب الغرفة اكو مثل هول صغير ومقابيله غرفة ثانيه اللي هية لبابا وحسام واران اخذنه سويت حتى كلنا ننجمع بمكان واحد.

كعدت بالهول ورة وين يلا كعدو اني الوحيده منمت لان بالسيارة شبعت نوم تقريبا ٣ ساعات اني نايمه .

دخلت للغرفة سمعت صوت الدوش ريناد كايمة تسبح
علكت الهيتر الكهربائي حتى تتدفة خاف تتمرض .

بدلت لبست جينز اسود وبلوز لونه اصفر حياكة وبيه الوان بالصدر وقمصلة جلد طويله بيها كلاو بيه فرو اصفر وشسورت شعري وشلته ذيل حصان عالي .

طلعت ريناد من الحمام باوعتلي

ريناد: اي هاي اختي مو ذيج الشفتها الصبح

رسيل: غير من ورة سوالفج مجان كلتيلي خليتيني اعيش ليلة كامله بالهم جان فرحت حالي حالج .

ريناد: والله بابا مقبل كال اريد اسويلها مفاجأة صلح

رسيل: يلا كومي بدلي حتى نكعدهم شنو جايبينه هنا حتى نام .

ريناد : يلا
بدلت وطلعنه دكينه الباب عليهم كسرناها كومو يلا جعنة يمعودين .