العروس في الثوب الاسود

٩_________١٠

العروس في الثوب الاسود

البارت التاسع

أثاري أنت سفر دنيا

وحلم مبيوك
مر صدفة

وخلص وكته
.....

رجعنة من النجف بنفس اليوم وصلنه لبغداد بليل تقريبا ساعة عشرة طبكنة السيارة بلباب ونزلنه بابا فتح الباب الخارجي وكال انتضروني اجيب اخوكم واجي راح بابا وره شويه اجه.
رسيل : ها بابا وين آران

صادق: طلعلي حسام وكال عوفه نايم باجر الصبح اول ما يكعد يجيبوه..

رسيل: ها زين لعد ..

صادق : بنات سبحو وغيرو ملابسكم علمود اسبح وراكم ..

رسيل : اي بابا

دخلت سبحت وطلعت وبعدين دخلت ريناد كملنة وصعدنه نمنه ما كعدنه غير ساعه ٣ الظهر على صوت بابا يصيح...

صادق: يلا بنات كعدو راح يصير  العصر

رسيل: نازلين بابا رنود يلا ننزل..

ريناد: يلا

اول ما نزلنه لكينه بابا واكف بداية الدرج وعيونه مدمعة...استغربت ليش باجي يمكن تذكر ماما...

صادق: تعالو نتغده..

ريناد: شنو الغده بابا..

صادق: دولمه عمتج دزتها ...

رسيل: والله دولمة عمة متتفوت عاشت ايدها جنت كلش مشتهيتها ...

صادق: يلا امشو لعد قبل لا اخلصها واخليكم بلا غده..

حضناه وحده منا وحده منا وهو حاوطنه بيده ، مشينه سوة للمطبخ كعدنه منظر الاكل يبجي دولمه حمرة وطرشي بيت وخضره وخبز مكسب يابه كمت امطك سمينه بسم الله واكلنه
اني وريناد ناكل وبابا لازم الخاشوكة ويحرك بيها

رسيل: بابا ليش متاكل بابا مو احجي وياك..

صادق: هاا ويايه

رسيل: اي بابا وياك وين صافن..

صادق : ماكو شي اكلو بالعافيه اني ما اشتهي لان قبل ساعه تريكت .

باوعت بالمطبخ ماكو ماعون مغسول ولا قوري على الطباخ عرفت ممتريك بس سكتت خليه براحته
كملنة وشلنة الاكل وبلشنه بتنظيف البيت اني وريناد وبابا .

صادق: يلا بنات اني راح اغسل الكراج والشارع واسكي الزرع وانتو سوو اللي تكدرون عليه بين ما اكمل واجيكم...

رسيل : تمام بابا ...

اني لملمت البيت وكنسته ومسحته وريناد رتبت الاسرة مالتنه ومال بابا ،،،دخل بابا شافنه كلشي مكملين تعجب

صادق : هاي شنو والله وعاشت ايدكم اني تأخرت لان غسلت السيارة بدربي صارلي كم يوم مغاسلها حتى اطلعكم باجر .

ريناد : هله هله بابا الحلو بابا الزين هههه ..

صادق: يا كلاوجية تموتين على التخايم ...

ريناد : اذا بابا حبيبي ميطلعني منو يطلعني ...

صادق : تدللو عيوني الكم شعندي غيركم بالدنيا...

كملنة كلشي وبابا سوة جاي و كعك وكعدنه برة

بالحديقة عدنه ميز وكراسي ناكل ونسولف ونضحك

بابا صديقنه كلش ابد ماعدنه تقيد وياه اي شي نريده نروح نحجي وياه لان يتفهم ومو عصبي اهدأ من النسمه والحلو عنده خلك حيل طويل ويانه و حتى ويه الناس يعني عنده استعداد يسمع المقابيل ساعات وميمل صدرة رحب كلش ويتقبل الاشخاص بعيوبهم قبل مميزاتهم ،،،،

صارلنه كم سنه هنا كاعدين مافد يوم صارت بينه وبين الجوارين اي مشكلة...

  الناس كلها تحبه وتريد خاطره لان يساعد الصغير قبل الكبير يصيحوله صادق ابو الوكفات .

وره نص ساعه اندكت الباب كام بابا فتحها فاتت عمة  وخالو وإران يمشي فدوة شاله بابا وبوسه وكعدو خالو وعمه يمنه بالحديقه...

محمد: هاي خيانه هيج كاعدين ومتدزون علينه ...

صادق: ردت اكعد اني وبناتي وحدنه ميصير يعني.... حجاها بضحكة ...

محمد : اكعد عيني ليش لا اني جان زعلت ورحت على حجايتك هاي بس الجاي وريحة الهيل دكت بخشمي .

صادق: كومي رسوله صبي جاي لخالج وعمتج

زهرة : كعدي يمه اني اصب ...

راحت عمة جابت استكانين جاي وكعدت ضلو سوالف وضحك كامت ريناد ..

صادق: ها وين ..

ريناد: اروح اقره بابا باجر عندي امتحان ..

محمد : كومي رسيل قري اختج ..

ريناد: خالو ميحتاج اني اقره هيه اجتماعيات ..

محمد: لا خلي اختج تقريج احسن حتى تاخذين درجه كامله .
اني عرفت خالو يريد يزحلكني اكيد عنده موضوع ويه بابا وخوفي لا موضوع الزواج كمت وكتلهم راح اروح اني هم اقره .
دخلنه جوة صعدت ريناد واني ضليت واكفه بالمطبخ اريد اسمع شنو الموضوع اني مو طبعي اتسنط على الكبير بس هذا الموضوع حيل حساس بالنسبه النه...

لهناك و اسمع خالو يكول لبابا.

محمد:  صادق اليوم ام حسام راحت لبيت ابو جعفر وعدهم بنات ممتزوجات وحيل خوش بنات شتكول تشوف وحده منهن.

صادق: ليش يعني بيت ابو جعفر

زهرة: اني صارلي فترة ادورلك على مرة الحجية وصتني قبل وكعتها الاخيرة وياهو اللي اروح الها لو مطلقه لو محلوة متعجبني بس بنات ابو جعفر يخبلن كلش حلوات .
صادق : شكد اعمارهن
زهرة: وحده ١٦ والخ ٢٠ والجبيرة ٢٥ سنه

صادق: شعجب ممتزوجه الكبيرة

زهرة: ما اجاها نصيب زين 

صادق: كلتي الهم اني زوجتي متوفيه وعندي ٣ اطفال ..

زهرة: اي يدرون همه اصلا يعرفوك واول ما  كلت لامهم  وافقت كالت وين نلكه احسن من ابو رسيل

صادق:  كلتيلهم على الحجية وسهاد يدرون بالوضع

زهرة: كلشي يدرون وكيفن ...

محمد: هسه شتكول هاهيه نتوكل .

صادق: جر حسرة وكال هاهيه ..

زهرة : لعد راح اتفق وياهم باجر نروح حته تشوف البنيه مكلت ياهو تريد بيهن