العروس في الثوب الاسود

٢١________٢٢

العروس في الثوب الاسود

البارت الواحد والعشرون

بابا عاط فوتو جوة اجوي غدر واني اعيط ومجلبة بتشيرت بابا اخاف اهده ويطلع.ركضنة جوة وسدينه بابا المطبخ وصوت الرمي مستمر ورة عشر دقايق هدأ  وسمعنه صوت سيارات شخطت سريع .

صادق: راحو ولد الكلاب

بابا هد ايدي من تشيرته ويريد يطلع حضنته وصرت كباله حته امنعه من الطلعة..
رسيل: وين رايح عفيه خاف واكفيلك لتطلع ..

ابجي واتوسل بيه .

حجة بنفاذ صبر...
صادق: رسيل وخري من كدامي ترة واصله لهنا ..

رسيل: ما اوخر والله .

اجتي ريناد هم جلبت بيده ،وعمة زهرة تتوسل عاد كعد على الكرسي اللي بالمطبخ وخلى ايده على راسه .

ورة شويه اندكت الباب كام بابا وهم عطنة اني وريناد.

صادق: شطلعت هاي وخرن من كدامي واللي اسمعها تتنفس والله اطلع ضيم كلبي بيها ما اسمع صوت يلا طبن جوة .

جرني من ايدي وخرني من باب المطبخ وطلع واني املخ بوجهي من الخوف فتح الباب فاتو  خالو وحسام وجوهم متتفسر مصدومين من اللي صار طلع بابا حتى يشوف الرمي على بيتنة لان مبين مو على بيت جدو
وره شويه فات و كلنا كعدنه بالهول .

محمد: شفتهم ولد القنادر كاتبين على بيتك مطلوب دم

صادق: اي شفت ..

محمد: والحل ؟

صادق: ما اعرف خلي ارتاح شوية وافكر راسي راح يطك ام حسام كلاص جاي بلا زحمة

زهرة: تدلل يابه من عيوني ..

صادق: سالمة خيتي راح انام بغرفه حسام لحد يكعدني

دخل بابا نام وكلنا صافنين على وضعه تغير عبالك شخص ثاني مرات اكو أشياء تصير للانسان تغيره للاحسن ومرات لا تحوله لشخص كاسر خصوصا اذا جانت هذه الأشياء تخص سمعتة بابا انكسر وكسرته جبيرة حيل ويراد وقت يلا يتعافه .

مر اسبوع واحنه في حالة ترقب وخوف خالو حبيبي حاله يبجي اكله قليل ماينام لازم حراسة على بابا خاف يطلع وحسام كذالك ميخليهم يوصلون الطرمة كم مرة كبت عيطه بين بابا وخالو وتنتهي كل واحد يكعد بمكان حياتنه انكلبت رأسن على عقب بنهايه الاسبوع اندكت الباب طلع خالو صاح منو .

اني حجي ابو ناظم .

محمد: يا هلا بالحجي تفضل ..

_ لا بويه جاييك بجلمتين ورايح ..

محمد: أمرني حجي ..

_ ما يأمر عليك ظالم اني جاي من طرف بيت ابو سالم ودزولكم خبر بيدي .

محمد: شنو شرايدين

خالو يحجي بأعصاب ..

_ يكولون الكم  عطوة ٣ ايام واذا ما حولو يمنه نرميهم واي واحد يطلع من بيتهم نعتبره مطلوب ...

طلع بابا وارتفعت الاصوات كل واحد يحجي شكل الى ان راح الحجي ودخلو جوة بابا خشمة طك دم عبالك بوري وانفتح ركض حسام جاب خاولي  وسد خشمه  عاط خالو..

محمد : جيبو جهاز الضغط ..

رحت ركض جبته اخذه مني قاس ضغط بابا طلع معلك  العالي ١٨...

محمد: زهرة بسرعه عصير ليمون ..

ركضنه اني وعمة وحده تنضرب بالثانيه هيه تكلي وخري اني اسوي واني اكلها لا اني اسويله راحت عمه يمهم واني سويت وجبته اخذه مني حسام .

حسام: خليتي شكر لو لا ..

رسيل: اي خليت ..

جان يعيط...

حسام :  شبيج ثوله حرام اذا تدبرين شي هاج يمه سوي غيره على السريع ..

راحت عمه جابت واحد ثاني وشربوه لبابا ورة شويه انكطع الدم غمض عيونه ...

محمد: اطلعو برة وسدو الباب...

طفينه الضوة وطلعو كلهم اني رجعت على كيفي كلبي مينطيني اعوف بابا بهذا الحال واسمع خالو يحجي وياه .
محمد: صادق ..

صادق: هممم ..

محمد: شوف خويه بالله عليك راح احجي بدون انفعال اسمعني للاخير وقرر ذوله ناس شرانيين وشفت شلون خرطو البيت وحبسونه اسبوع بلبيت صمون منكدر نطلع نجيب.

صادق: انت صوجك خايف وحابسنه من ورة جوكة نسوان .

محمد: خويه جوكه النسوان اللي معاجبيك ذوله يغدرون ما يجون بالوجه اني ما خايف على نفسي بكد ما خايف عليك وعلى البنات واران وحسام وثائر
كلشي توقع يضربون اي واحد في سبيل يحركون دمنه.

صادق: المطلوب مني شنو ..

محمد: نخابر على اخوتك .

كام بابا من مكانه وحجه بعصبيه ..

صادق: شوف محمد هذا الحجي تسده وراح اعتبر نفسي ما سمعتك ودير بالك تخابر من ورايه  قسم بالله لساني ما يطخ لسانك.

محمد: والحل شنو منين نجيب عشيرة ونروحلهم خويه اني وياك وحدنه ما النه ظهر وهاي شوفت عينك اني ماعندي احد غيرك انت وعلاء لا اخوان لا ولد عم بيهم حظ ونحتمي بيهم وحته لو عندي ولد عم صدكني ما يجون محد يورط روحه ناس تخاف وتجفة الشر .

صادق: وأن يكن ما ادز عليهم اروحلهم وحدي .

محمد: انت مخبل وتروح وحدك حتى يرموك همه من دزو خبر معناها يردوها عشاير وانت عشيرتك تسد عين الشمس بس اشر يجوك ركض الله يخليك فكر لخاطري .

نصى خالو على راس بابا وباسه يريده بس يوافق ..

صادق: افرض خابرتهم من بعد كل هاي السنين شريد اكللهم شلونكم اخوتي تعالو لحوكني زوجتي خانتني ويه واحد بنص السوك وضربته وخليت دمه بطوله ويريدون مني فصل انت فكرت بيها لو بس حجي وخلص .