العروس في الثوب الاسود

١٩________٢٠

العروس في الثوب الاسود

البارت التاسع عشر

وأثاريها المحنة الزايدة ترخص
.
.
.
تجاهلني بعد وياي ثكل الدم
لا تنطي مجال اصعب وكابر هم
ضبط سوي روحك عود ما مهتم
والله تحبني حب بس الله بي يعلم
تراقب عن بعد كلبك عليه ايلوب
جرأة الـ بالكلب لو تنتقل للفم
جا كلمة احبك جزت ذاك الصوب
والاطرش سمعها واجه كلك تم
من اكعد اكبالك تلتفت ليغاد
مو يم القضيه وانته رب اليم
اسولف ويه غيرك احس بيك اتموت
فص عينك طلع ما اعرف اشدردم !
احجي بصوت عالي شدردمت لتخاف
من المنضغط متوقع اشبع ذم
ولو مرات ادك دكة خباثه وياك
اشوفك روحي واختل واكعد اتبسم
وتضل عينك تدور علي بين الناس
والبيدك يطيح ويغدي وجهك دم
هنا يبدي الضعف ويبين المبهم
بـ هاللحظة المشاعر صدك تترجم
حسبالك رحت لا ما رحت موجود
وهذا الوكع من ايدك دهاك الزم
دايخ بيه دايخ هسه شموازيك
فضها وكول احبك شلك بهـالـهم
يعجبك شكلي صوتي ووكفتي وممشاي
وحافظني حفظ تندلني وين انشم
متردد ابطبعك حذر مدري شبيك
ترجع الف خطوة وخطوة تتقدم
اذا حتى السلام اترده بالمثقال
ما اسلم اتكول شدعوه ما سلم
لكن هم اعذرك عقلك مأذيك
الله يساعده جم قسم يتقسم
___________________
​

كمت اضرب بيه على جتفة..

رسيل :  اي مو كاعد احجي وياك وين رايح ..

حسام : شبيج عندي شغلة وياج ..

رسيل: شنو هالشغلة امشي رجعني يلا ماريد اروح لاي مكان  اني غلطت من صعدت وياك.

حسام: وليش خايفه قابل راح اكلج ..

رسيل:حسام امشي رجعني وكمت اضرب على الباب ..

لزم ايدي قوي وكلي شبيج ترجفين اول مرة اعرف بيج خوافه انداريت عليه وعيوني تجدح نار .

رسيل: يابرودك اكله رجعني ماريد اولي مو حتى ريكي نشف حرام عليك صايمة ...

حسام: لحالج عصبتي وترجفين هو شنو الصار ابن خالج واخذج وياه ليش خفتي ...

رسيل: مخفت بس ميعجبني انجمع وياك بمكان واحد...

سكت وحسيت بيه انقهر يمكن اني بالغت بردة فعلي بس ما اعرف احس بيه يلعب بأعصابي وما افتهمه شيريد ما كاعد  اميز تصرفاته خوف عليه لو يريد يفرض رأية..
واني منا ماخذه موقف منه  لان هواي يتدخل بلبسي واخر موقف خلاني اضوج منه حيل.

ورة شوية طبك السيارة ونزل حتى مكال وين باوعت اكو محل ملابس نسائية دخل ورة ربع ساعه طلع شايل علاكة مشى شويه دخل محل ثاني بعد مسافه عن محل الملابس وراها طلع و  اجه يمشي شايل علاليك صعد وخلاهن على الكشن ليورة .

رسيل: شنو ذني ؟؟؟

مجاوبني سكتت حرك السيارة ومشة وصلنه لابو الاسواق

حسام : كليلي شنو وصتج امي  اجيبهن واجي لتنزلين انتي .
كتله شنو الشغلات وراح تسوك واجه صعد وصلنة للبيت نزلت ونطاني علاكتين وهو شال البقية اول ما دخلنة  تلكتنة عمة بالصياح .

زهرة: صدك جذب وين رحتو نمتو خوما نمتو صارت سته اله ربع بعد ما  الحك اسوي اي شي ..

حسام: ناكل شوربة وبس

زهرة: هاي منو يحجي ابو بطن ...

جرت العلاليك من ايده ودخلت للمطبخ تدردم ادري وين رحتو ،،
سكتت محجيت ردت كالت

زهرة : مو وياج هو اخرس انتي هم خرسيتي ..

حجيت بنفاذ صبر ...

رسيل : سألي حسام..

عفتها ورحت لبيتنه صار وكت الفطور اجتي ريناد .

ريناد : رسيل رسيل وينج تعاي صار الفطور بسرعه

رسيل: جيت جيت شبيج تعيطين

ريناد: مو تدرين وكت فطور هسه ليش مجيتي

رسيل : نايمة جنت

ريناد : ديلا تعالي ..

دا اطلع بعدني بالطرمة دخل ثائر شفت بيدة علاكة كبيره

رسيل: هاي شنو بيدك ..
ثائر : هااا ذني غراض عمو دزهن ..

دخل العلاكة جوه ورة شويه طلع سدينه الباب ورحنه لبيت جدو كملنه الفطور وكمنة على البيت كملناه وعفتهم ورجعت للبيت.

جنت حيل مخنوكة ما اعرف شبيه صعدت فوك دخلت لغرفتي واشوف العلاكة اللي جابها ثائر على جربايتي فتحتها لكيت بيها ملابس تنورة وقميص وشالات عرفت هاي من حسام لان هو اليوم نزل يم محلات الملابس رجعتهن للعلاكة ورحت لبيت جدو جانو يصلون صلاة العشا دخلت لغرفه حسام خليت الملابس على الميز مالته واخذت ورقه صغيرة  وقلم من على الميز وكتبت ( لتعيدها تعرف ما اخذ هدايا من احد جان قبلت هديه زيد علمود اقبل بهديتك) وخليتها فوك العلاكة وطلعت رجعت للبيت .

ورة ساعه تقريبا اندك الجرس. ريناد واران بيت جدو وبابا بالمحل وبس اني طلعت صحت منو .

جاوبني حسام

حسام: اني ...

فتحت الباب  دخل عصبي وبيده الورقه اللي كتبتها رفعها وخلاها كبال وجهي ...

حسام: هاي شنو ..
رسيل: ورقه ...

كز على اسنانه ويحجي

حسام : اعرف ورقه مو طفل كدامج بس المكتوب بيها شنو .

رسيل: شنو مكتوب مفهمته لو متعرف تقره...

لزمني من زندي حيل وعصر ايدي سمعي لج مو اني اللي تتصرفين ويايه هيج خاف عبالج ساكت كلتي اسوي اللي يعجبني واهين كرامته ترة بعدج مشايفه وجهي الحقيقي .

باوعت على مكان لزمة ايده لزندي ورفعت راسي بأتجاها .

رسيل: هد ايدي ...
حجيتها وباوعت بعيونه صارت حمر من الاعصاب ...

حسام: احجي لج شوكت زيد جابلج هديه وليش؟

رسيل: مالك شغل ..

حسام : لتخبليني شنو مالي شغل احجي لا ادميج ..