العروس في الثوب الاسود

تكمله

بدت المدارس اني صرت صف رابع اعدادي  وريناد ثاني متوسط وثائر ثالث بكلوريا  وخالو شد عليه علمود يقره زين وحسام الزعلان مني صارله شهر وشويه صار صف ثاني كلية .

كعدنة الصبح ورحنة للدوام ورجعنة يعني روتين عادي
صار العصر التمينة بغرفة بيبي عمة جابت جاي وكعك
واندك الجرس كسرو الباب تكسر من الدك  طلعنه نركض اني وعمة فتحنه الباب وطب خالو عصبي ويرجف اول مرة اشوفه بهيج حال وعاط...

محمد : لج زهرة لحكي مصيبة وكعت على راسنة ........

يتبع....

العروس في الثوب الاسود

البارت العشرون

زهرة: خير ان شاءالله شصار الولد بيهم شي حسام ثائر ..

محمد: لالا مابيهم...

يحجي ويرجف

زهرة: لعد شكو احجي مو دمي نشف ..

عمة كعدت بالكاع من الهبطة .

زهرة: يايمه رجليه متعيني بعد احجي يارجال ...

فاتحه عيوني كلها واباوع على خالو اريده بس يحجي عبالك الوكت صار شطولة .

محمد: جنة كاعدين  باب المحل اني وصادق وحسام ...

وبدة خالو يحجي التفاصيل

_

صادق: حسام بلكت تجيبلنه لفات من ابو رافد شو جعت محمد تريد .

محمد: اي والله ياريت ..

حسام: اجيب اربعه كافيات ...

صادق: شدعوة على لفة لفة  حرامات تضل..

حسام : صار عمي تدلل ...

  كاعد احجي ويه صادق واشوف  وحده واكفه يم محل يبيع حلويات ليغاد عن محلنه بشويه والشعر طالع وذاك اللبس اللي يخزي استحي اباوع عليها هلكد ما لبسها فاضح كتله لصادق..

صادق : والله هاي الدنيا صايرة مدري شلونها شوف الناس بدال متتعض تعصي ربها قاطات .

صادق: شكو شبيك المن تقصد .

محمد : شوف ذيج البنيه شلابسه ماعدهة اهل هذا الي وياها ما شافها من طلعت .

صادق: وينها ؟؟؟

محمد: ذيج كبالك ...

صادق: هاي ام شعر الاصفر .

محمد: اي هيه ..

صادق: شعلينه بالعالم ...

محمد: لايابه شعلينه بس اول مرة اشوف وحده هيج لبس وتفتر عادي بنص الزلم ..

صادق: اني شايف اشكال مثل هاي وبعد اضرب ...

محمد: اي عيني انت كله سفر ودول طبعا تشوف اشكال مثل حضي حدي للسوك وارجع...

باوعتله صفن على البنيه، شو هذا كوم واخذلك بوري من المحل واركض ركضت وراه واشوفه لازم واحد ودك بالبوري على راسه وعلى ضهره والبنيه الجانت وياه انهزمت  كوة فكيناه من ايده جان مات الولد ،،،

كعدت يم الولد اشوفه بيه روح لو مات  رفعت راسي ادور على صادق ماكو ركضت مثل المخبل جماعه كالو لحك هاي البنيه اللي جانت هنا كمت اضرب على راسي شلون بيه هذا وين راح وكفت تكسي وكلت ارجع للبيت اشوفه خاف رجع  بعدني بدايه الفرع واشوف سياره شرطه اباب بيت مرته واخذوه وراحو من اركز زين الكه نفسها البنيه اللي جانت ويه هذا الولد بس مدميها و كاعده بالكاع ويمها هوسه نسوان ..

زهرة: يايمة تعزينة وتصخمنة يعني شنو راح صادق انسجن .

محمد: والله ما اخليه ينام ليله وحده بالسجن اوكل احسن محامي واطلعه .

اريد استوعب الحجي اللي يحجيه  خالو ماكاعد يدخل بعقلي  كمت ابجي بقهر عفيه بابا شوكت ترتاح جبت عمرك تعب بتعب .

ورة شويه دخل حسام صاير دم كام خالو من الكاع وكف يمه...

محمد : ها شصار احجي عمك منو بلغ عليه .

حسام: هيه البربو.....بلغت اول ما رجعت للبيت
بس عاشت ايده عمي شلون خابزها يضرب بيها واكله بعد اريد يبرد كلبي بنت الكلب ليش تخاف صلفه ترادد الكلمه تردها بعشرة صدك لو كالو عين الكح..... كوية .

محمد: والولد مات لو بيه روح...

حسام: عساه ميت والله عمي قصر ما فلع راسه نصين
اخ لو ملحك عليه اله اشوف نفسه انكطع يلا اكوم منه ..

زهرة: اي عفيه اي ضيع نفسك هيج اريدك سبع ...

تبجي عمة وتضرب على رجلها ..

حسام: شتريدين لعد اباوع على عرضنه تفرفر ويه الزلم واسكت متكليلي منين هاي الزباله جبتيها لعمي شكد كلج ما اريد اتزوج لا اله تتزوج اله تتصخم دعوفوه للرجال هيج احسن انفضح بالمنطقه وهسه اخذته الشرطه.

كمت ابجي بصوت عالي واصيح اريد بابا معليه واضرب برجلي بالكاع .
تقرب عليه حسام وخله ايده على حلكي ..

حسام: سدي حلكج شنو هذا  العياط مالتج منا الناس طفله خوما طفله ...

رسيل: وخر عني اني بيا حال وانتي تكلي صوتج ومنا العالم بابا راح بعد ميرجعلي .

حسام: لتتفاولين هسه نروحله للمركز وان شاءالله ماكو شي كافي يلا سكتي...

اخذني لحضنه وضليت ابجي واشهك ضل يمسد على شعري ويحجي بصوت ناصي..

حسام : كافي والله اليوم ينام يمج هنا بالزايد باجر الصبح .

محمد: حسام اذاها هواي ..

عافني واندار على خالو .

حسام : المن ...

محمد: شجن ...

حسام: والله طبلها بالبوري وانت اتخيل الوضع كسرها تكسر بحيث امها وكعت على رجله  باستها علمود يعوفها وهو فاقد ميحس اني اللي خبلني هذا عمي الهادئ منين اجته هاي الاعصاب ما ادري ولو اللي ينحط بهيج موقف اكيد ردة الفعل تكون هيج واقوة بعد...

زهرة:  شنو راح تسوون...

محمد: اروح اسال على محامي زين وبلكت الله نطلعه بسرعه .

حسام: يابه ترة اهل الولد نفس المنطقة مالتنه وناس زايعتهم الكاع وعدهم الكتل بفلس لازم نطلع عمي منا .