العروس في الثوب الاسود

١٥________١٦

العروس في الثوب الاسود
البارت الخامس عشر

صفنتلها ولكيت الخوش ما مريود
الناس تحب المسربت..

شجن : صباح الخير ...

جاوبنه ثنينه ، صباح النور..

شجن : ليش انت تسوي ريوك جان كعدتني ..

صادق : مايحتاج متعلم ..

شجن : اي جنت وحدك هسه عندك زوجه تهتم بيك وبكل تفاصيلك..

سكت بابه مجاوبها..

صادق : رسوله من يمج ناوشيني الملح ...

حسيتها ضاجت رجعت لغرفتها وسدت الباب .

نزلت ريناد كعدت على الميز ، كعد بابا بصفها حاجها هيه ساكته ، خليت الريوك تريكنه وكمنه على البيت ...

....

مر أسبوع على زواج بابا والحال كما هو بابا بغرفتة وشجن بغرفتها من يجي بابا هيه بيت جدو يم عمة زهرة ومن تجي يطلع يتحجج بشغل او يروح يم خالو محمد حتى على الأكل مننجمع سوة اذا هيه ويانه يكول ما أشتهي واذا مموجودة ياكل عادي..

.انتبهت شجن لتصرفات بابا وبدت تضوج .مرة جنت توني راجعة من المدرسة ودخلت لبيت جدو ما لكيت احد بالمطبخ فتت جوة واسمع عمة زهرة تحجي ويه شجن .

زهرة: أتحملي ياعيني بعدة مامتعود عليج انطي صبر شوية شوية يتعود خوما رأسن .

شجن: أكلج عفيه قابل اول زواج ويتعود لو يخجل مني المفروض أني اللي اخجل مو هو والله مدري شلون تحجين انتي.

زهرة: دادة على كيفج هالله الله بالرجال ترة بعدة جرحة ما طاب وعلى ايدج يطيب أن شاء الله .

شجن: عشتو والله خوش يطيب على ايدي شنو يمة شفتيني دكتورة واطيب جروح .شو الرياجيل على الاربعين ويتزوجون العينتين صارلة ٣ سنوات ياجروح البقت...

زهرة: شفتي كلتي الرياجيل يعني مو صادق وترة مو كل اصابعج سوة.

شجن: وأذا انتي هيج تعرفين مو كل اصابعي سوة شكو جيتي خطبتيني و من اجيتي ورة ما كعدت أني وياه وحدنه وكتلج على الحجي مال صادق ليش اكلتي بعقلي حلاوة وكلتيلي معليج هذا حجي ما راح يصبر هسه يكوم يحبج ويدللج مثل ما جان مدلل مرتة .

زهرة: احجي حظج وبختج الرجال قصر وياج شو ذهب وانتي اللي اختاريتيه وملابس ارقة شي جابلج وغرفتج تجنن.

شجن:عيوني شسوي بالغرفة وهو مابيها اكللها من يوم الي تزوجت لحد الان ما بايت بغرفتي ينام وحدة ومن ناكل يصيح ما اشتهي مرات اتعمد اكل قبلهم اريد اشوف شيسوي واطلع الكاه كاعد ياكل ويه بناتة وطول ما اني بلبيت هو طالع يجي توالي الليل ومن اني يمكم هو يروح للبيت .

زهرة: وعيونج بس يرجع محمد اخليه يحجي وياه وشوفي شلون راح يتغير.

شجن : نشوف يازهرة ...

كلش ضجت من طريقة حجيها على بابا هاي شجن مبينة لسان ومو فقيرة الله يستر .

اجة بابا وطلع هو وخالو محمد واكيد خالو محمد حجة وياه لان اول مدخل لبيت جدو كال لشجن حضري روحج باجر نطلع اني وياج والبنات ..

رسيل: بابا عندي امتحان ما اكدر ..

ريناد: أني هم ...

جر نفس وكال براحتكم واندار على شجن وانتي عندج شي لو لا .

جاوبته بفرحه..

شجن: لا لا شعندي قابل افرغ مني ماكو ..

حجتها وتضحك..

باوع عليها بابا ودار وجها اعرفه ميحب هيج نوع من النسوان يحب الثكيلة اللي تعزز بنفسها هو ليش يحب ماما ومكدر ينساها لان كوة حصلها ودائما يكول اللي يجي بسهولة يروح بسهولة .

ثاني يوم طلعو هيه وبابا ،،طبعا شكد عدها ملابس بابا جاب الها بس تلبس عباية مال راس وشحاطة ام الاصبغ والاصابع مصبغتهن.

راحو ورجعو جنة بيت جدو احنه اصلا شبه مقيمين بس النومة بلبيت مالتنة .

طبت شجن من المطبخ وتصيح تعالن يبنات وينجن عمو وحسام واحد باوع على الثاني وضحكوا بس من طب بابا سكتو ..

طلعت من العلاكة لعابات ثنين كبار وقراصات هاج ريناد هاي الج وهاج رسيلة هاي الج ..

اخذتها منها وضحكت اني شسوي باللعابة عمري مال لعابة ..جاملتها وكتلها شكرا ..

ريناد: هاج ماريدها شنو شفتيني اول أبتدائي وتنطيني لعابة .
خزرها بابا..

صادق: ريناد اخذيها عيب ..

ريناد: لا ما اخذها واني مكلت الها جيبيلي اذا احتاج شي اجي عليك .

زهرة : رنوود ليش عمة هيج تسوين فوك ما تذكرتج وجابتلج هديه ..

ريناد: واني معايزة على هديتها خلي تنطيها تذبها بالزبل .

طلعت ريناد وراحت للبيت كمت رحت وراها بعدنه بالطرمة و بابا اجة ورانة مشى سريع ولزم ايد ريناد
كلت راح يضربها لان قللت الأدب بس اللي صار بالعكس باسها واخذها كعدو على المرجوحة ...

صادق: من شنو ضايجة بنتي حبيبتي ..

ريناد: ماكو شي ..

صادق: شلون ماكو شي وانتي عيونج مدمعه ..

ريناد : مرتك ضوجتني ..

صادق: اول شي هيه عدها اسم وثاني شي عيب تكوليلي مرتك اني ابوج ميصير هيج تحجين ويايه ..

ريناد : أسفة بابا بس هيه ضوجتني هواي تدخل بحياتي كلشي وكالت لا هاي ميصير هيج لازم هيج وليش تتأخرون بالنوم تطير البركة من البيت ومن نرجع من المدرسة احنة متعلمين نام الضهر ونكعد نقرة هيه لامتقبل لازم نقرة يلا نام حجيها كله خواتي هيج جانن واني هيج من جنت بيت اهلي تريد تاخذ دور الأم وهيه مصارلها اسبوع من اجتي .

صادق: يايابة هذا كله ضامتة بكلبج وساكتة عمي اني اليوم احجي وياها ومن باجر ماراح تسمعين حسها بلبيت هسه تمام راضية.