العروس في الثوب الاسود

تكمله

كومها وراحو لغرفه خالو  رحت وراهم لكيت اران نايم شلته علمود نرجع للبيت لان عمه تعبانه و هو صاير حرك كلش ،طلعت للشارع طبك خالو ونزل من السياره ...

صاح..

محمد: ها خالو وين ماخذه اخوج خطيه نايم ليش تمردين نومته ضلو هنا تغدو يمنه..

رسيل : لا خالو مو عمة تعبانه خطيه ضهرها ..

محمد : ليش خير شصار ..

رسيل : خالو روح  جوة و عمة تحجيلك اران ثكيل ايدي راحت .

محمد : روحي حبيبتي ..

التفتت على ريناد كتلها امشي ويايه للبيت خلي عمة ترتاح اليوم ..

ريناد: اي جيت باي ثائر ..

ثائر : باي ريناد انتضرج العصر علمود نشتري

ريناد : اي بالاربعه اجيك ..

ثائر : تمام..

دخلت للبيت نيمت اران بغرفه بابا بفراشه واني صعدت بدلت وريناد هم بدلت ونزلنه نمنة يم اران بالغرفه لحد ساعه ٣ اندك الجرس ،، طلعت وفاتحه نص عين بعدني نعسانة صحت منو ..

حسام: اني

فتحت الباب وكتله

رسيل : ها حسام

حسام: هاي منو هيج مطفي عيونج ، حجاها وضحك..

رسيل: نعسانه والله احجي بسرعه اريد ارجع انام ...

حسام : تعالو تغدو ..

رسيل : نايمين بعدهم من يكعدون نجي ..

حسام : امشي بابا  هيه مال من تكعدون ترة ميبقه اي شي هو اكل من برة نفتحه وناكل سوة ...

رسيل : ماشي هسه اصيحهم ..

دخلت وهو ضل واكف بالطرمة كعدت ريناد وشلت اران وطلعت ،، حسام اخذ اران  شاله
ورحنه بيت جدو ...

دخلنه جانت الصينيه بالكاع وبس خالو وثائر كاعدين

حسام : لعد وين الباقين..

محمد: امي نايمه مقبلت تكعد وهاي سهاد تبجي تصيح من ورايه هيج صار بزهرة وهم مقبلت تاكل ..

رسيل: لعد وعمة ..

محمد: عمتج جبتلها مسكن الآم من الصيدلية ونامت على ما يصير العصر واخذها للطبيب ..

رسيل : الله يشافيها ...

محمد : كعدي اكلي..

كعدنه ناكل بس ما النه نفس لان خاله زهرة هيج صاير بيها وخالو حيل مقهور ...

صار العصر وخالو وحسام اخذو عمة وراحو للطبيب..

ساعه سبعه اجه بابا اول ما دخل للبيت  سأل وينهم
سولفتله على الصار كلش انقهر كال.. زهرة طيبه متستاهل والله هيه شايلتنه كلنه .

ورة ساعه تقريبا اجه خالو ضايج حيل ومبين مقهور ودخلت عمه زهره ساندها حسام...

كام بابا وراح يمهم...

صادق: ها حمدلله على السلامة ام حسام ما تستاهلين بيه ولا بيج ..

زهرة : اسم الله عليك الوجع العندي لعدوي ما اتمناه

صادق : شنو كال الطبيب ..

محمد: انزلاق وسوفان بالفقرات ولازم تنام وترتاح وتبقه على العلاج فتره ...

صادق : لا ياالله مو خوش خبر ..

زهرة : الحمدلله الهي لا اعتراض على حكمك ..

صادق : يستاهل الحمد..

مر اسبوع على سالفة عمة زهرة حياتنه نكلبت الكل كام يشتغل وما نلحك اللي يتسوك واللي ينظف واللي يكوي ملابس والي يطبخ ويغسل مواعين ،،،

اما بيبي وخاله سهاد خالو محمد تكفل بيهم وبيتنه واران اني وبابا وووووو كومه شغلات جانت بس عمة تسويهن وحدها ليش تضوج تشكي عمرنة ما سمعنه حجايه منهة لو تكول تعبانه بالاسبوع الثاني بدت تتحسن عمة وكدرت  تكوم وتطبخ وتنظف بس لازم ما تدنك ابد ولا تشيل ثكل لان مو بس انزلاق سوفان بالفقرات هم عدها .

وبيوم كاعدين وبيبي كالت صيحولي صادق اريد احجي وياه رحت صحته  اجه بابا وكعد يم بيبي على القنفة ....

البيبي : يمة صادق انت ليش ما تتزوج عاجبتك حياتك هاي ......

يتبع .......