حسام: تصير كعدة رياجيل ونعلن الخطوبة حتى الكل يعرف رسيل لحسام وهاهيه.
رسيل: نعلن بدون حفله ومن يرجعون اهلي ، ذاك الوكت نسوي حفله ونعقد .
حسام: ميخالف ما اصبر خليها اليوم .
رسيل: من جنت اكلك مو صاحي تزعل هاي سوالفك مال واحد عقله موجود هنا ؛ وأأشر بيدي على راسه .
حسام: اي ماكو اخذتيه مني مضلي لا عقل لا كلب لا جلاوي لامعلاك .
رسيل: هههههه شمزوجة واحد تفصيخ .
حسام: هاهيه بعد براسج براسج .
سمعنة صوت عمة تصيح ..
زهرة : وينكم تعالو نقلوا الغدة اجوي .
طلعنه نضحك ونشوف خالو كاعد توة جاي ..
محمد: ها عصافير الحب شلون الوضع .
حجاها وغمز لحسام ...
حسام: كلش زين بس لتخلي عينك .
محمد: لا ياجلب هو منو سواها الكم غيري قبل كم يوم جنت تبجي وتتوسل بيه حتى بس احجيلك ويه عمك هسه صرت احسد، بابا رسيل بطلي حسام ميفيدج .
حسام: حجي على كيفك ، صاير ما تتحمل شقة بسرعة تبيع.
محمد: حتى توب تحجي على ابوك مرة ثانية....
حسام: هو شعندي غيرك بالدنيا انت الخير والبركة حجي.
طبت عمة شايله المواعين ،
زهرة : اصبغ اصبغ بينه اليوم الصبح اني الخير والبركه وهسه ابوك لو ندري عندك هيج لسان حلو من زمان نخطبلك ههههه.
حسام : ها حجية هااااا ...
انقل مواعين واضحك على سوالفهم والله بيت خالو لمتهم تجنن وابد ماعدهم نفاق لو يحجون على احد ، الحلو بيهم اذا ميعجبهم شي يحجوه بالوجه. وهذا الشي اللي مريحني من ناحيتهم.
رسيل: خالو بابا مو تأخر
محمد: معاملة تطول تعرفين يمنه كلشي يمشي بسهوله ، هاي اذا كمل اليوم جوز يأجلوه بعد.
رسيل: خطية والله .
تونة كعدنة ناكل ونسمع صوت طلق بس مو كلش قريب .
محمد: ياستار ياربي كمنة نسمع صوت الطلق اكثر من هورن السيارة...
ورة دقايق اندكت باب بيتنة تفلش تفلش ، وكفنة على حيلنه كلنا طلع خالو وحسام يتراكضون واسمع صوت هوسه بالطرمة ، كلبي لزمني اريد اروح اشوف شكو بس رجلي احسها وكفت متعيني بعد ، اباوع وحدي بالهول ، عمة هم طلعت على صوت الهوسة ، طلعت اجر برجلي احسها شثكلها ، وصلت للطرمة والكه خالو مشكك ملابسة ويلطم على راسه. وعمة مكطعة شعرها وتصيح راح اخويه راح العزيز راح ، اجيت كعدت كبالها اريد اسألها منو واخاف ، اخاف شكوكي تطلع صح وصار اللي دا افكر بيه .
عاط خالو بصوت مليان حززن..
محمد: رسيييييييييييل راح ابوج راااااح .
هو كال هيج و اني شلون واحد نايم وكعدوه ،
صرختتت صرخة هزت البيت هز وطلعت اركض بالشارع حافية والناس تركض ورايه يريدون يلزموني ،
ما اعرف منو لزمني بحيث حاوطني حتى ما كدرت اركض ، ادفع بيهم واصيح
رسيل : وخرووووو عني وخروووو ، اريد بابا جذب ماميت جذابين ؛ هو كلي راح ياخذني وياه راح نسافر سوة ، بابا ميغدر بيه، لا لا لا مستحيل ميعوفني .
حسام: اش اش كافي امشي ارجعج للبيت، يحجي ويبجي .
انداريت عليه..ولزمته من قميصة حيل...
رسيل : لك وينه اريد اشوفه وينه فهمني وين وديتوووه لك احجييييييي مو راح اموت احجي ابوس ايدك.
ملختة لحسام تملخ تشككت ملابسة بيدي وجها كله خراميش مال اضافري .
يباوعلي وعيونه مليانه خوف عليه وحزن على بابا..
حسام: اخذو للمستشفى بلكت بيه روح ...
رسيل : اخ كلبي اخ ياربي كون عايش ياربي لتفجعني بيه لتكسرني ربي لتكسرني.
رجعني حسام للبيت وراح هو وخالوا ؛ واني افرفح وكل شوية وحدة مغسلتلي ، نسوان الطرف كلها التمت يمنة .
ورة تقريبا سبع ساعات اكثر، طبت مرة تلطم وياها نسوان وتصيح يمه ابني يمه راح مني ، اللي عرفته بعدين هاي بيبي ام بابا وذني النسوان خواته ونسوان اخوه ، ما اعرفهن ولا شايفتهن اجني بوسني واخذن من خاطري وكعدن ،يبجن حالهن حال النسوان .
ورة ساعتين سمعنه صوت رميييي كلش قوي ، كالو جابو النعش طلعت اركض، دخلو للطرمة يمكن عمامي ذوله وخالو محمد وياهم جان، خلوه بالطرمة وطلعو وسدو الباب لان الشارع مليان زلم ....
اني شفت التابوت لو فقدت حضنته وابجي حجيت بصوت ضعيف لان حيل مابيه ...
رسيل : كوم بابا كوم متلوكلك النومه ، بعدك صغير، بعدنه ماصحينة من كسرت امنه وتكسرنه انت هم ، لج يوووووم اخذتيه، اخذتيه يمج ، هو يحبج وروحه بيج ، اجاج وعافنه اجاااااج ، ديري بالج عليه ،.......
يتبع....
أنت تقرأ
العروس في الثوب الاسود
Romance#العروس_في_الثوب_الاسود #مقدمه لم يكن يومآ الحُزن قضيتي ! بل قضيتي كيف اتخلص منه ! الحزن هو شعور بالعجز يشعر به المرء لكنه لايدوم . احيانا يغرقنا الحزن حتى نعتاد عليه وننسى أن في الحياة أشياء جميلة ممكن أن تسعدنا . عادة ما يشعر الناس بالحزن لا يفع...
