العروس في الثوب الاسود

تكمله

اني وريناد نروح ونجي ويه خالو للمدرسه فدوة لعينه ولا يقصر ولا يمل يوميه يودي ويجيب يكول انتو بنات الغالية كلش يحب ماما ويعزها.

خلصت السنه الدراسيه ...وقبل لانعطل مال مراجعه لصف السادس بأسبوع،،
مدرستنه سوت النه حفلة تخرج وحضرو بوقتها بابا وماما وجنت طايرة بيهم ورافعه راسي احس نفسي اسعد وحدة بالدنيا واحسن من كل البنات لان الله رزقني بهيج ام واب..

بس للاسف هاي جانت اخر لحظات الفرح بحياتي ومن يومها معرفت شي اسمه الفرح ..

بيوم كعدنه على صريخ ماما عدها وجع مال ولاده
بابا  حبيبي يركض منا ومنا مخبوص ميعرف شيسوي صاح عليه اروح لبيت جدو اصيحهم ،، ركضت على بيت جدو اجتي بيبي وعمة زهرة..

اول ما دخلت بيبي وشافت وضع ماما كامت تضرب على وجها...

البيبي:  يايمه شصار ليش عندج وجع  بعدج وينج وين الولاده توج دخلتي بالسابع ..

سوسن: ما ادري يوم لحكولي ما اتحمل بعد صادق فدوة استعجل راح اموت من الوجع ..

طلع بابا يركض شغل السيارة بين ما خاله زهرة بدلت الماما وطلعو ،،
وصلت ماما للباب الخارجي ركضنه اني وريناد نبوس بيها ونحضن وهيه تبجي وتبوس بينه..

حجت بصوت ضعيف وتعبان..

سوسن: ماما لتبجين من جبتكم هم هيج صار بيه هذا الشي طبيعي، اريدج تصيرين سباعيه وتديرين بالج ع اختج لتسوون هوسه وتعبون بيبي خطيه تعبانه.

رسيل : ليضل بالج ماما ترحين وترجعين بالسلامه.

بوسناها وراحت بس مجنه ندري هاي اخر مرة نشوف ماما ونشمها لو ادري جان جلبت بيها وماخليتها تروح وتعوفنه والله ماما بعدها صغيرة واحنه صغار ومحتاجيها وماشبعنه منها  ...

مرت الساعات وماكو خبر ، ولا واحد بين لا بابا لا خالو..

واحنه على نار صح صغار بس نفتهم وبيبي كل شويه
تكول وين صارو  بس لا سوسن بيها شي لو الطفل
و لازمه السبحه وتدعي يامسهل سهل ولادة سوسن بنت افتخار وكومها بالسلامة هيه وطفلها...

لهناك فات خالو كال..

محمد : ها خير شو هنا كاعدين ، رحت للبيت لكيت بس  ثائر موجود وسألته عليكم كال يم بيت عمه سوسن .
البيبي : يمه اختك كاعد تجيب وبعد ماندري بوضعها وتاخرو حيل كلبي مثل النار عليها .

محمد : بيا مستشفى ..

البيبي : بمستشفى ... ولتتاخر يمه طمني عيني ترة كلبي مايتحمل بعد ...

راح خالو محمد وهم الروحه روحة مرت الساعات وصارت ساعه ١٢ بليل اندفع الباب دخلو بابا وخالو

بس شنو العيون دم وجه بابا ازرك محتقن وخالو محمد مو اقل منه حالهم يبجي الصخر..

بيبي من شافتهم  عاطت

البيبي : ها ولكم شو وحدكم سوسن وين ...

عاط بابا وصاح بحركه كلب..

محمد :  راحت حجيه راحت ام بيتي راحت صديقتي وحبيبتي راحت ام بناتي ..

ويلطم ع وجها وصدرة مثل النسوان والله يبجي وينحب... بيبي مجرد سمعت الحجي مال بابا وكعت من طولها ركض خالو محمد عليها .......

محمد : يوووم كومي رحمه لأهلج مابيه حيل انتي هم تفجعيني لج يووووم كومي كافي عليه سوسن راحت مني..،

متجاوب لا ايد ولا رجل اخر شي شالها واخذها للمستشفى ...

يتبع.....

أتعبني فراقك يا أمي
لازلت ابحث عن وجهك المبتسم ،

ألمي يا امي يفوق وصفي وان قلبي يختنق في كفي ..
ياوجعي
يا المي
رحلت عنا سريعا وكأن حكاية رحيلك كانت حلمآ والوداع كان وهما...

أطمئني يا أمي
نحن بموتك مصدقون ونحن على فقدانك ان شاءالله صابرون محتسبون..
الله يرحمك يا أمي كنتِ أجمل ما في الدنيا واخذتي معك كل جميل لم يبقى الأ حبك لنا ودعواتك لنا
تعبتي من أجلنا
وأحسنتي تربيتنا
ف يارب أسكنها الجنة وأجعل قبرها روضة من رياض الجنة يارب العالمين ........
يتبع ...