العروس في الثوب الاسود

تكمله

صادق: شلج بهذا الحجي سوسن تعرفيني كلش زين اني مافرق بين الولد والبنية عندي بناتي يسون الدنيا ومابيها.

سوسن : ادري ياعيني قابل كتلك متحبهن بس اني هم احب الجهال ،، وتعبت من الدوام ع الاقل يبقه دوامي يومي مو طيران ورحلات وتعب وهم من اجيب اخذ امومه لان رسوله سادس بكلوريا حتى اتفرغ الها .

صادق: والله حاسبتهة ومخططة يا ام رسيل..

سوسن : حبيبي انت الخير والبركه.

كمت وبسته بخده الله ليحرمنه منك ومن طيبتك ..

صادق: ولا يحرمني منج ومن بناتج ..

رسيل
دخلت للمطبخ لكيت ماما حاضنه بابا استحيت ردت اطلع صاحني بابا تعالي رسيل تعالي باباتي ..

رجعت بخطواتي اتجاه بابا..

رسيل: نعم بابا

صادق: شنو رأيج ماما تجيبلج اخ صغير تلعبين وياه ..

ضحكت وعيوني دمعت فرح

رسيل : الله بابا اتمنى يصير عندي اخ لو اخت واربيهم لان ريناد كلشي ما اتذكر منها جنت صغيره وهسه لا صرت افتهم .

سوسن : رحت فدوة لحبيبي اليفتهم تعاي ابوسج..

رحت يم ماما شبكتها وباستني..

رسيل : ماما كلش احب ريحتج...

سوسن : ياروح امج واني اموت عليكم وعلى كلشي بيكم الله يخليجن الي انتي واختج يلا صيحي رنوده حتى نروح نتريك يم بيبيتج ماطول اليوم عدنه عطله علمود نطلع العصر نروح نحتفل بمولد الرسول الاعظم( صلى الله عليه واله ) ..

فرحت كلش وركضت ع ريناد حتى اكعدها

رسيل : رنود كومي نروح نتريك بيت بيبي بالحديقة ...

طفرت من نومها وكالت..

ريناد :  صدك كولي والله اليوم بابا وماما بلبيت يعني ويانه يتريكون ..

رسيل : اي شبيج يلا منتضرينه جوة غسلي وبدلي راح انزل كدامج...

عفتها وطلعت ،، فرحه ريناد مو اقل من فرحتي اني وياها ابد ما نحس روحنه شبعانين من ماما وبابا لان على طول مشغولين دوام وسفر صح بيت بيبي ممقصرين لكن مو مثلهم .

رحنه لبيت بيبي ،، بابا جاب صمون حار وجايب وياه كاهي وكيمر دخلنه لبيتهم  بدون مندك الباب لان خالين مثل السيم مجرد نسحبه ...ينفتح الباب .

الجو كلش حلو بدايه شهر الثاني وشمس الشتا حلوة وبيها بروده ...

باوعت المنظر يفتح النفس الميز منصوب بالحديقة ..
وعليه قوري الجاي والاستكاين والاجبان والمخلمة ياويلي ،،،
بابا خله الكاهي والكيمر صارت سفرة تخبل كعدنه كلنه على السفره ، بيبي وخالو وزوجته وحسام وثائر وحتى خاله سهاد جبناها بالكرسي وكعدت يمنه ..

بابا اندمج ويه خالو محمد سوالف وضحك واحنه منعرف شكو بس نضحك على ضحكتهم ..

كملنه ريوك رفعنه السفره ، وماما ساعدت خاله زهرة بالمطبخ بيومها تغدينه بيت جدو ..

صار العصر جنه  نلعب بالغرفه اني وريناد

اجتي  ماما ..

سوسن : بسرعه غسلو وتعالو ابدل الكم..

نزلنه نركض غسلنه وجهنا زين وايدنه وصعدنه ..
بدلت النه ولبستنه فساتين يخبلن جايبتهن من الخارج اني سمائي وريناد وردي وكفنه كبال المرايا ونباوع على روحنه متعجبات بشكلنه ونضحك..

اجه خالو سمعنه صوته ونزلنه نركض بوسناه

رسيل : هلو خالو ..
ريناد : هلو خالو..

محمد: هلا بحبيبات خالجن يلا كملتو ..

ريناد: اي خالو كملنه احنه نريد نصعد وياك بالسيارة..

رسيل:  انتي صعدي ويه خالو اني ويه بابا ..

محمد : هههههه فدوة تعالي رنوده وياي.

ربت على شعرها ...صاح بابا ..

صادق : يلا عيني استعجلو مضل وقت ..

سوسن: لحظه نسيت الشموع همزين تذكرتهن ..

محمد: والله لو ناسيتهن ولا ارجع مثل العام رجعتيني عليهن ...

صادق : انت شنو ما تنسى ذاكرة جمل عندك ..

دك على الخشب وكال ..

محمد :  صلي على محمد لتحسدني هيه بس الذاكره ضاله عندي وخليت عينك عليها..

صادق: دومك تبجي خبصتني قابل حاسد عيونك الزرك لو شعرك الاصفر ..

سوسن : يبووو بلش المناكر ما راح نطلع منا لباجر ..

صادق : طفيتي الغراض تاكدتي منهن زين..

سوسن : اي كلشي تمام والغاز هم تأكدت منه حتى لتسألني ..

صادق : اي زين يلا طلعو علمود اقفل البوب ..

طلعنه بيومها سيارتين سيارتنه وسيارة بيت خالو
رحنه على جسر الاعظيمه والناس كتل كوه نلكه مكان نوكف بيه كلها تحتفل وفرحانه وناس تعلك شموع تطلب نذر وناس تعلك شموع توفي النذر لان حصلت مرادها وماما هم علكت شموع ونذرت مجنت اعرف شنو اللي طلبته بس بعدين من سالتها كالت اريد اخ الكم حتى يصيرلكم سند .

احتفلنه وبابا اشترالنه لفات كعدنه ع الرصيف نباوع على العالم وناكل ،،،
اجواء حلوة قسم يركصون وقسم كاعدين مثلنه

والشعالات كل شويه عالكين وحده ونفز ونضحك على روحنه صارت ب ١٢ رجعنه للبيت هلكانين مجرد خلينه راسنه على المخدة نمنه .....

مرت الايام والاشهر ،،، وصار موعد الامتحانات

امتحنه ونجحنه اني صرت صف سادس ابتدائي وريناد صارت صف رابع،،
وماما حبيبتي حامل وحامها قوي،،،

اتفقنة اني وريناد نساعدها بكلشي و ابد منتعبها وياها وياها نشتغل ونلملم غراضنه ونسفط ملابس ونمسح اخشاب بس الشغلات الثكيله عليها ومرات جانت تجي عمة زهرة تساعدها من عدها تعزيل وشغل هواي ...