الهَواجس

الحـلقة الرابـعة

الكـاتبة شهـد 🖤

"أن يضُمّ أحدهُم اسمي في طيَّاتِ مُناجاتِه لله
    أن يُردد: اللهم قَلبها "

________

احياناُ التجاهل هو اسوء شي ممكن الشخص يسويه بحياته..

تتجاهل شخص خطأ بحقك..تتجاهل شخص تنمر عليك..تتجاهل شخص قلل من قيمتك وقدرتك..
تتجاهل شخص مد او حاول يمد ايده عليك..
بحجة انه التجاهل يخفف من الأصتدام ويه الأشخاص..

تيقنت هالشي اكبر خطأ ارتكبته أني تجاهلت..
لو رديت على كل شخص غلط بحقي ماكان راح يكرر هالشي..

لو حاربت من اجل كرامتي وشخصيتي ماكان تجرأ اي شخص يرجع يجرحني وهالشي صار من سمعت بنت عمي تگول:

-ام تك عين..

سويت نفسي ما سمعتها بس غصتها ضلت بگلبي مو مشكلة اذا شخص مايعرفك او ما شافك من قبل او مايعرف طبعك يعايرك بهالشغلات الضاهرية...

المشكلة اذا كان منك وبيك من دمك ولحمك..

شفت نظرة الاستحقار الي ملت عينها وعرفت اني سمعتها انسحبت من مكان الجلسة بهدوء ورحت حتى اگعد ويه حمزة..

دخلت المضيف كان گاعد يتصفح بموبايله متلحف الأسود وكأنه بـ فاتحة مو عقد ..

بنطرون اسود جينز وقميص اسود مفتوح اول دگمتين منه..
تحمحمت بصوت حتى ينتبه لوجودي رفع عيونه من الموبايل للحظة وحدة شافني ورجع نزلهم ولا كأني موجودة..
اختاريت المقعد الي گدامه وگعدت اعصر بأصابيعي ابلع الأهانة الي دتصير بحقي مثل كل مرة..
كسر السكوت الي بينا ..

-ماعرف اگول مبروك لو الله يصبرج..

-انتَ مثلت مقولة "سكت دهراً ونطق كفراً"

ابتسم بسخرية -: اي يا الله طلعتِ تعرفين تسولفين..

سكت ثواني ورجع كمل -: ماحب اللسان الطويل ماحب الصوت العالي ماحب المرادد والحجي الزايد هذول الثلاث شغلات اذا طبقتيهن نگدر نگول نكمل على خير بدون اصابات..

شحب وجهي من نطق اخر كلمتين واني افكر بقصده شنو بدون اصابات يعني يضربني لو شنو بالضبط..

-تهدد؟

-ماحب التهديد اني انفذ..

-اكره العنف..

-اني اكثر اكرهه وماحب استعمله

-شنو قصدك لعد

-كل شي بوقته حلو ..

گال هالكلمات وتحرك من مكانه حتى يطلع وصل للباب التفت عليه وبهدوء واردف..

-لسه على اتفاقنا مو

-هزيت راسي بأي واني عيني متشخصة ع الارض ..

-كلش زين ..اشوفج بيوم العرس لعد مع السلامة..