الهَواجس

الحـلقة الثـامنة

الكـاتبة شهـد 🖤

جميع الامور باتت " لاچمـةة گليبـي لَچم "

ــــــــــــــــــــــ
عـلي

اليوم يصادف الحنة مال حمزة اجينا للمحل أني ومنير حتى نوجه العاملة الجديدة شلون تشتغل وبعدها نروح لحمزة ناخذه للسوگ يشتري البدلة مالته وهواي ورانا شغل ..

فتحنا باب المحل وگعدنا نعزل ونرتب منتظرينها تجي شوية ونفتحت الباب اني ومنير بنفس اللحظة رفعنا راسنا الها لأن فتحت الباب بقوة وهي تلهث..

-تأخرت مو اسفة كلش اسفة بس والله راحت عليه نومة اعذروني..

تحجي والخوف تارس ملامحها عبالك مسوية جريمة ..

-لا ما تأخرتي احنه جايين من وكت لأن راح نطلع عدنا شغل مادري تگدرين تدبرينها وحدج؟

-اي اگدر اي تدلل استاذ علي

-علي حاف مو شركة استيراد وتصدير عدنا هو محل ماكو داعي للرسميات يسر

نزلت راسها بخجل وگالت

-اوك علي

نسولف اني وياها ومنير بعالم ثاني انتبهت عليه صافن عليها وفاتح حلگه ضحكت بداخلي على سوالفه الي ماتخلص ..

البنية سمره مملوحه وعيونها سود سوادهن غريب اول مرة اشوف هيج وهذا مفهي وياها صحت بصوت عالي.

-منير باشا تريد تكمل نومتك لو نروح

-لا گاعد شبيك يلا نروح

-يسر بس نخلص شغلنا ع الاغلب بوقت متأخر بالليل نجي للمحل نشوف الوضع الساعة ستة عزلي وانطي المفتاح لأبو المطعم الي بصفج ..

-بـ الستة مو بعد وكت يعني اكو زبائن تجي بعد هالوقت

-اعرف بس اكيد ما تحبين تضلين لبعد هالوقت وانتِ بنية و وراج طريق

عگدت حاجبي واني ارد عليها يعني عادي عدها تضل بعد الستة شنو من بنية هاي تلكئت وهي ترد عليه بنبرة خافته..

-اءء تمام استاذ مثل ماتحب

-علي

-نعم؟

-داگلج علي اسمي مو استاذ

-اعتذر نسيت

-يلا منير ما خلصت

-اجيت يلا

اخذت منير وطلعنا متوجهين لبيت اهل حمزة ناخذه بسيارتي ونطلع گعدنا بالسيارة ونطق المعجب المتخفي..

-هاي ليش نفسية ويه البنية انتَ

-وين النفسية ولك

-لا والله نفسية ماشفت شلون من ورا خشمك تحاجيها

-ايباه ولعد منين تحب احجي وياها من ورا ط***

-انجب هاي انثى خليك رقيق وياها