الهَواجس

الحـلقة الرابـعة عشـر

الكـاتبة شهـد 🖤

- يا أسمّر لونك بدميّ وصوتَك بيْ حنين أُميّ .

____________________________

عـلي

-حمزة فضني شبيها البنية ..

-البنية طلعت شاردة من اهلها ومقدمين بلاغ عليها بغير منطقة وابوها متهمها بسرقة ذهب وفلوس ويدورون عليها وانتم شلون زلم معدلة مشغلينها يمنه..

انصدمت من كلام حمزة ونار حسيتها صارت بصدري من الموضوع باوعت لمنير الي اخذله صفنة و وضعه مو احسن من وضعي تأكدت هو مايعرف بهالموضوع..

-شنسوي هسه حمزة

-انت مو طردتها..خلص سد الموضوع واذا اجه احد يسأل عنها سوي نفسك ماتعرفها مانريد ندخل بسين وجيم بسببها باب رزقنا هذا ..

نهيت المكالمة من حمزة و وجهت نضري لمنير الي گعد ع الكرسي وايده على لحيته يلعب بيها متوتر نطقت بعد سكوت طويل..

-اتصل بيها خلي نفهم ولا تبين انت تعرف شي

-مستحيل اكيد اكو غلط هي بريئة مو مال هالسوالف

-اي كلش بريئة مثل طي***طفل

خزرني واخذ موبايله يتصل عليها يرن وماتجاوب..

-اخخ شفت شگد بريئة تخرخر

-علي شبيك المتهم بريئ حتى تثبت ادانته

-اقنع روحك بهالسوالف گو****

اتحرك بالمحل واني عقلي ياكله التفكير ليش اجت النا شنو الغاية معقولة تحاول تسرقنا المشكلة صارتلها اكثر من فرصة ليش ما سرقت ..

-الو يسر

التفت على منير بسرعة من شفته يحجي فتحت ست الحسن خط وهو فتح مكبر الصوت ويحجي وياها بهدوء..

-وين انتِ

-ادور شغل ليش

-خفت عليج لأن مارديتي بسرعة

-ماسمعت صوت الموبايل

-تجين للمحل شوية علي يريد يعتذر منج ويرجعج للشغل

اشرتله واخزر بيه وهو ولا عبالك مكمل بالچذبة مالته بس صدمني الرد مالتها..

-ماريد اعتذاره الله لايعوزني اله ولا للشغل وياه..

-بس هو يلوم بنفسه يگول غلطت وياها لأن عصبي وعنده ضروف صعبة شوية..

-كلنا عدنا ضروف بس مانقلل احترام المقابل وهو قلل احترامي ماريد ارجع يلا لگيت محل حاطين اعلان راح اشوفه واحاچيك من اخلص..

باوعلي منير من خلصت مكالمته يلومني بنظراته ونسى الي گاله حمزة ..

-شبيك حرنت

-اني متأكد هي مو هيچ

هزيت راسي بيأس من كلامه مسحور بيها هذا ومايشوف گدامه نطقت بـ برود ..