الهَواجس

الحـلقة الخـامسة والعشـرين

الكـاتبة شهـد 🖤

انا الحافظ رموشه الفوك جفن العين ومتَيّه مواليدي !

____________________________

روند

حسيت صوته بعظامي من الخوف يمكن لو صايح بأسمي هيچ اموت من الرعب..

واگفة بصف الدرج ما صعدت وراه بس اسمع الصياح من فوگ صار عندي فضول اعرف شكو وشنو السالفة صعدت ركض ما اريد تفوتني واضل ياكلني التفكير ..

وصلت لگيت الباب مفتوحة وهو واگف بالخارج حتى ما داخل جوا ويتفرج من بعيد وگفت وراه مديت راسي لأن جسمه مغطي الباب ما اگدر اشوف بس حس بوجودي باوعلي عاقد حاجبه وحابس ضحكته..

-شبيك

-ما تحملتي

-شنو

-الفضول كتلچ وصعدتي

گالها وضحك بخفة ما سيطر على ضحكته ضجت منه وتحركت اريد ارجع شگد فشلة هسه شصعدني ..
بسرعة لزمني من ايدي وگال..

-اشاقه وياچ شبيچ

هزيت راسي ساكته ماعندي شي اگوله وهو ماخذه الواهس لازم ايدي لحد ما باوعت عليها سحبها بسرعة واعتذر مني دار وجهه يباوع على جيهان وامها وهي تتعارك وياها وتجر بيها من شعرها وهي تصيح وتغلط..

اريد افتهم شصار حتى هيچ تتعارك وشنو السبب لحد ما دارت وجهه وشافتني واگفة ومصعب يمي تخبلت وگامت تصيح..

-حقيررة اني من وراچ امي تضربني الله يااخذچ

وامها تجر بيها وترد..

-ولج شگد صلفة لعد كل هالدگ ما يفيد بيچ

باوعت لمصعب متفاجأة اني شعليه افتهم بسرعة بدون ما احچي غمزلي وگال...

-سوي نفسچ ما سمعتي خلي گلبچ قوي والكلمة الي ما تعجبچ فوتيها من جهة وطلعيها من الثانية..

-اي بس ليش تتعارك من وراي شسويتلها

-لأن عيونچ حلوة يمكن

فتحت حلگي اريد ارد عليه ما حسيت غير جيهان هاجمة عليه وتعت بيه من ايدي شاغت روحي ايدها قوية وتجر بقوة مادري شصارلي بوقتها بس حسيت بقوة مو طبيعية او يمكن الضغط الي صار عليه بهالفترة الي راحت طلع بهالموقف البسيط هذا ..

دفعتها من صدرها صار هي ضربة وهي دفعة واحچي بحرگة...

-شو تمدين ايدچ وتطاولين لا عبالچ ساكتة والله العب بيچ طوبة حيوانة..

رجعت تقدمت عليه وعيونها حمر شعرها مكهرب من الجر مال امها بسرعة وگف مصعب گدامي وصاح بيها..

-جييهااان كلمة وحدة ما تنعاد وحفظيها عدل اذا تنرفع ايدچ او صوتچ بوجهها راح تشوفين مصعب ثاني ساكت ومتحمل علمود امچ بس من تطلع من ماعونها امچ ادرى شيصير بوقتها..