الهَواجس

الحـلقة التاسـعة

الكـاتبة شهـد🖤

لو عاد معتمراً يطوف حول قلبي، ما قبلته .

____________________________

رونـد

گاعدة بغرفتي الهدوء محاوطني من كل الجهات لسه بفستان عرسي وتسريحتي ومكياجي ..

اسمع الأصوات العالية والصياح مال عمي رجفة تمر على جسمي كله وألوم نفسي شجاني وشجابني لهالضيم عايزة اني ياربي شسويت بنفسي ما انكر نصدمت من گالت زوجته الأولى بس مو مثل صدمة عمي الي ماگدر يوگف على رجلينه من القهر ..

صح بينا اتفاق بس ماكان بهالطريقة گال راح يتزوج بس مو لدرجة يكسرني بيها بنفس الليلة ومتزوجها بيوم الحنة مالتي..

اي هنا الصدمة تزوجها بيوم الحنة وهي گالت لعمي هالكلام من خلص الحنة مالته راح وعاقد عليها سيد على دينه وراجع لكنيسة على دينها هي يعني بالحالتين زواجهم تم بكل النواحي..

درت وجهي اباوع للغرفة حلوة وكل شي حلو بيها ويبهر ...

-ياترى شلون ايامي تصير بيج حلوة مثلج لو مرة مثل كل ايامي قبلج ..

تنهدت بصوت عالي احاول اسمع شكو بس ما اميز غير الصياح دقايق وانفتحت الباب بهمجية ..

عيونه تجدج بوجهي لدرجة خوفتني واريد اتحرك من مكاني رجليني تيبست بسببه ..

تقدم بأتجاهي بسرعة التفت اصابعه على رگبتي ويهمس بفحيح ويخنگني بقوة ..

-كله منج اي بالله كله منج العورة

اديني تتحرك بعشوائية من الخوف والنفس الي ضاق بصدري بعد ماگدر اجره خلاني ما اهتم للأهانة مالته اريد بس اخلص نفسي من ايده..

-اني انطرد من البيت بسبب وحدة مثلج مو اهلج شمروج عليه حقهم منو يگلبج انتِ والله العب بيج طوبة اندمج ع الساعة الي وافقتي بيها..

يهمس بقوة وايده تضغط على رگبتي حسيت هاي اخر دقيقة اليه اديني وگفت عن المقاومة واستسلمت للموت من شافني هيج سحب ايده مني..

وگعت بالگاع بقوة واشهگ النفس بصوت مسموع والرجفة ملازمتني من الرعب الي عيشني ياه نزل لمستواي ..

ومن غبائي وسذاجتي فكرت راح يعتذر مني او خاف عليه من شافني بهالحالة هاي بس للأسف كان العكس وتأكدت من نطق كلامه ببرود..

-شوفي وسمعي كلامي عدل السبب الي خلاج توافقين عليه راح اخليج ليل نهار تسمعيه وافقتي لأن عورة وما يجوج خطابة تحملي لعد والله ياروند الا اخلف من الينا واخلي جهالي يعيروج بعيبج وليلج اسويه نهار ونهارج ليل بس اصبريلي..

حسيت نفسي مليت ريتي هوا رفعت راسي وهو لسه گاعد گبالي ويحجي وابتسامة حقيرة على شفته خلتني اكره نفسي بزيادة لأن وافقت عليه..