الهَواجس

الحـلقة السـادسة

الكـاتبة شهـد 🖤

دلوني على اللي يگول

هالبنيه بوجهي من زعل الايام
ودامها بوجهي محد يگدر يزعلها ؟ 🤍

______________

روند

من بعد ماطلعت من المضيف صعدت لغرفتي بسرعة ماعرف راح لو بعده موجود كلش استفزني تصرفه..

ممكن اتحمل علاقتنا بدون حب بس مستحيل اسمح تصير بدون احترام من بعد الأحترام يجي الحب بالنسبة اليه
يعني اتخيل يتصرف بقلة احترام وياي اذا تزوجها او عاشت ويانه بنفس البيت شنو تكون ردة فعلي لازم نتناقش بكل هالأمور بعد الزواج كلشي ولا احترامي يتقلل گدام اي بشر ..

ثواني وسمعت الباب مال غرفتي يندگ كل بالي رقية صحت:

- لا اله الا الله منين نزل الأحترام اليوم تفضلي ست رقية تفضلي ..

سمعت فتحة الباب واني حاطة راسي بالموبايل اگلب بيه من شفتها طولت ما حجت رفعت راسي وفتحت عيوني بصدمة ..

واگف مرتجي ع الباب ويباوعلي بخزرة بلعت ريگي بتوتر هذا شجابه لهنا مو جان جوا كسرت الهدوء الغريب الي صاير ونطقت...

-اني مو عفتك جوا عبالي رحت

-ما اروح قبل ما اعلمج الأحترام

نطق بنترة جسمي رجف من الخوف بس مابينت هالشي ماريد ياكل حقي مثل الكل لازم نرسم حدود من البداية

-اعرف الأحترام عدل بس العتب ع الي يجهل اصوله

-ولج شو انتِ لسانج طويل وماتنتبهين ويا منو تحجين قصدج اني ماعرف الأحترام مو

يحجي وهو يتقدم عليه ولسه مخنزر بوجهي رديت واني اگعد ع الجرباية ماريد يضل يتقدم واني ارجع ماريده يحس بضعفي وخوفي منه ..

-شوف نفسك شسويت وخلاني احجي هالشكل

-اسمعيني زين انتِ بنت عمي قبل ماتكونين مرتي يعني مال تحجين بوجهي سوالف حبيب ماحبيب هاي اخر مرة اسمحلج بيها واذا رايدتها حرب من البداية عادي كملي بهذا الاسلوب واني اعرف شسوي...

-اهاااا يعني انت من يمك حلال ومن يمي حرام

وگفت من مكاني واني اكمل واشوف الدهشة بعيونه من كل تصرف يطلع مني..

-شوف حمزة اني انسانة تگدر تعيش حياتها كلها بدون حب واهتمام وهالخرط كله بس مستحيل ومن سابع المستحيلات اعيش بدون احترام ..

اخذت نفس واردفت..
-احترم تُحترم اتعامل بهالمبدئ هذا يعني ما اشوف تصرفك جوا حلو واتمنى هالشي ماينعاد حتى ما نفوت بسين وجيم مرة ثانية

احجي وهو صافن بوجهي ما انطاني رد ع كل الي گلته غير هز راسه وطلع من الغرفة ..

هذا يمكن عباله ماخذ وحدة من الصم البكم ويريد يمشيها بمزاجه لا والف لا مو اني الي يسوي وياي هيج..