الهَواجس

الحـلقة الرابـعة والثـلاثون

الكـاتبة شهـد 🖤

عن لسان روند لـ مصعبها..

- من بـعـد طـولـه بـعـيـنـي ، ولا يـحـلالـي طـول ✨🤍.

____________________________

روند

من بعد المكالمة الي صارت بيني وبين مصعب والبيت متوتر وما خلص الصياح گاعدين اني و ماما ورقية وكل شوية واحد يفوت يخزرني ويطلع..

صوت حمزة واضح اليه بكل لحظة يعلى اكثر اعصابي تلفت رجليني ما بطلت اهز بيهن من التوتر والخوف...

المحامي لسه موجود يحاولون يلگون شي يساعدهم واني ادعي يمر كل شي مثل ما اريد واخلص من هالكابوس الي دمر حياتي..

مستحيل اتخيل نفسي راجعة لحمزة او راجعة لبيته ولغرفته مستحيل اتحمل اشوفه يتقرب مني ويستباح أذيتي و وجعي واهانتي..

والمشكلة گلبي..
گلبي الي انملأ بغيره وانكتب بيه اسم مستحيل ينمحي لو مهما صار...
بمدة شهر ونص صار يملكني بصوته وحنيته واسلوبه وحتى الحرف الي يطلع منه احسه يختلف مع انو الي ديصير خيانة لحمزة بس الي احس بيه ماگدر اسيطر عليه ولا واحد بالمية...
حالياً كل الي اريده تخلص الجلسة باچر بطلاقي من حمزة والباقي مصعب هو الي راح يمشيه مزاجه عندي الثقة الكاملة بيه راح يسوي الي يرضيني وبالمقابل يرضيه هو اكثر...

فزيت من سمعت الرگعة مال الباب القوية وعيني اجت بعينه و هو يتقدم عليه..
لا ارادياً صرت بضهر امي مستحيل يمد ايده عليه و بابا هنا واخواني هم بس نضراته اليه رعبتني وطلع مني التصرف بدون وعي...

صار قريب من ماما بينهم متر تقريباً وگال..

-يعني كل عقلچ اذا باچر تطلگتي تخلصين مني؟

ردت عليه ماما بكل برود واني الرجفة محتلتني..

-اطلع برا حمزة ابوها واخوانها بالمضيف كلامك وياهم لا تجي تذب السم يمها..

ميل راسه يباوعلي غمضت عيوني بسرعة ما اريد اشوفه شيطان بهيئة انسان ما اريد المحه..
نطق واني احس بأبتسامته من خلال كلامه روحي فرفحت من الخوف مو طبيعي هذا مو طبيعي..

-ليش هي شافت سم هذا كله مقبلات رورو القادم افضل..

رفعت راسي من ضهر ماما من حسيت بيه تحرك من مكانه طالع عيني عليه يمشي راسه للأرض وادينه شابكهن ليورا بس وصل للباب التفت واجت عيني بعينه بلعت ريقي بخوف بس ما بعدتهن عنه هز راسه اليه وطلع مختفي عن نضري..

گعدت بسرعة أجر نفس عميق وامي تهدي بيه..

-شبيچ ماما وجهچ صار الوان عبالك عزرائيل فوگ راسچ اسم الله

رديت وصوتي گوه طلع -عزرائيل ارحم والله

تمسح على ضهري بخفة لحد ما حسيت نفسي شوية ارتاحيت وراحت الرجفة مني و الوضع طبيعي..