الهَواجس

الحـلقة الواحـد والأربعـون

حَتىٰ الفراشات
لاتستطيع أن تصفَ
السعادة العارِمة
التي تحيطُ بجميع أحشائي
عند رُؤيتك
أشعر بكل مرة حين ألقيّك
"بأنني أتجدد"
واعودُ للحياة مرة اخرى بهيئة مفعمة بالأمل والطمأنينة !

____________________________

"روند"

مرت فترة اسبوع كامل من بعد الي صار ومصعب لا حس ولا نفس اتصالات ماكو ورسائل ماكو صرت مهووسة بشي اسمه موبايل على امل اشوف منه رسالة او اتصال تعبت نفسيتي واحس كل شي بداخلي ينهار بأصعب طريقة من اتصلت عليه اكثر من مرة وما جاوبني او كلف نفسه يدزلي رسالة يطمني بيها عنه او يتطمن عني؟!اخذت عهد على نفسي ما اتصل ابد ولا ادز شي مادام هو هيچ مرتاح ومستغني راح اكون مثله بالضبط بس ماعرفت ان هالهدوء منه هو هدوء ما قبل العاصفة ...

بيوم من الايام الي اقل من عادية وكلها روتين ممل وصعب واگفة ع المغسلة اغسل وجهي من حسيت نفسي دايخة شوية اكفخ وجهي بالمي البارد اريد ارتاح والنار الي ماكلة گلبي تطفى بس ما فاد سديت المي وابتعدت عن المغسلة سمعت صوت محمد يصيح بأسمي اول ما فات للبيت جريت نفس شگ صدري اعرفه ما يصيحني الا اذا اكو مصيبة بس ما اهتميت سميت بأسم الله وتقدمت للمكان الي هو واگف بيه بدون ما يسلم نطق بهدوء غريب وگال...

-تعاي وراي رايدچ بسالفة

عقدت حاجبي مستغربة طلبه والتفتت اشوف امي واگفة بالباب عينها علينا وحالها مو افضل من حالي حركت رجليني بصعوبة ومترددة احس بشعور كلش مو حلو ونايم على گلبي مأذيني بس لحگته لغرفته فات قبلي وگعد واني واگفة مثل الصنم منتظرة يحچي موضوعه بس ما حچه زاد التوتر عندي من رفع عينه عليه من بعد ما كان يباوع ع الأرض جريت نفس احاول أبين نفسي طبيعية ضل يباوعلي بطريقة خوفتني قطع نضرته من رن موبايله رفعه بوجهي فوراً..

-هاي سالفتي

هزيت راسي مستفهمة ما عرفت قصده بس رجع نطق بكلام جمد الدم بجسمي..

-هذا نفسه الي خطفچ هذا رقمه اذا ما تعرفين يعني..

بلعت ريقي من من التوتر والخوف مادري شنو السالفة شصاير ليش مصعب متصل بمحمد وليش محمد صاحني شيريد مني بس كل هالتسؤلات اختفت من كمل كلامه..

-راح يضل يتصل لحد ما ارد عليه وانطيه جواب

-جواب لشنو

ضحك بخبث واردف..

-جواب عرضه بالزواج منچ

حسيت وجهي صوفر واديني يرجفن بس ما رحم حالي وكمل بالي خلاني اتمنى الموت ولا اسويه..

-راح نفتح خط واحچي وياه و هو راح يطلب يحچي وياچ حتى يعرف قرارچ وانتِ بكل هدوء راح ترفضين لأن هو انطاني عهد راح يتنازل عن القضية ويطلع حمزة اذا انتِ رفضتي ويطلع من حياتنا للأبد لأن ما يريد يجبرچ على شي الشهم..