الهَواجس

الحـلقة السـابعة والثـلاثون

الكـاتبة شهـد 🖤

قمتُ بمحو كل شيء يخصك ، لكني نسيت أنْ أمحوك .

____________________________

روند

شگد ما اگول حظي سيئ بالمواقف يثبتلي شگد هو اسوء من ما اني متوقعته..
الباب تندگ وهو يشدني من خصري عليه لازم وجهي بأطراف اصابعه يبوسني من خدودي بقوة عبالك يريد ياكلني ويهمس..

-شني كيك خوما كيك خرب اهلچ

واني حايرة بين مشاعر الخوف الي مسيطرة عليه وبين مصعب الي ما منطيني مجال اتحرك منه رفعت اديني لصدره ادفعه وهمست بخوف..

-الباب مصعب الباب انفضحنا وخر..

حط راسه برگبتي وشفايفه يم اذني يهمس بصوت خلى قشعريرة تمر على طول جسمي..

-ردي حبيبي احچي بصوت نعسان سوي نفسچ هسه گعدتي..

بلعت ريگي بصعوبة من قربه ونفذت كلامه وحچيت بصوت خفيف وما كان تمثيل ابداً بوقتها قربه خلى صوتب يطلع هيچ..

-منو

-اني شنو هالصوت الصار بغرفتچ

باوعت لمصعب بطرف عيني اريده يساعدني ما عرفت اطلع كذبة من الخوف ..

رجع يهمس بأذني بالكلام الي اگوله رددت وراه..

-طلعت اشرب مي ولأن ظلمة وگعت المزهرية بدون ما انتبه

رد محمد من ورا الباب وحسيت بحركته يبتعد..

-ديري بالچ تنجرحين لمي الگزاز ورجعي نامي..

-اي هسه

مجرد ما اختفى الصوت وتأكدت راح دفعت ادين مصعب الي محاوطتني وهمست..

-ردنا ننفضح من ورا سوالفك

رد بـ برود وهو يرجع يتقدم مني..

-بس ما انفضحنا

-مصعب لا تخبلني اطلع بسرعة

لزمته من ايده ادفعه للباب و هو وجهه عليه گوه اخلي يتحرك مبتسم بغباء بوجهي وصلت للباب تذكرت شي ورجعت سحبته عليه وحچيت..

-لا لا ارجع خاف بعده محمد برا ويشوفك انتضر شوية واطلع..

رجع للغرفة يفتر بيها وصل للكنتور مال الملابس ومن كل عقله فتحه!!!

حطيت ايدي على حلگي و هو كلش عادي عنده يگلب بملابسي بدون خجل شوية ورجع قفل الباب وانتقل للجرارات يفتح بيهن وصل للجرارة الأخيرة ركضت دفعته من ايده و وگفت گدامها باوعلي مستغرب وگال..

-ها شبيچ

-شنو ها شو ماخذ راحتك تدور بملابسي

-ابتعدي شوية بقت بس هاي خلي اشوف شنو بيها واطلع

تقدم يريد يبعدني عن طريقه من الخجل خاف صدگ يفتحه گعدت يمها متربعة حتى ما يگدر يفتحها استغرب تصرفي عقد حاجبه وگال...