الهَواجس

الحـلقة الثـانية والثـلاثون

الكـاتبة شهـد 🖤

مزَقت ثيابي لأضمِّد جِراحه ، ناداني بعدها بالعارية"

____________________________

روند

من بعد ما راحت رقية للمدرسة وبابا واخواني للشغل مر اليوم طبيعي بين شغل و سوالف ويه ماما الي كل ما شافتني تحضني او تبوسني وكأنها ما مصدگة اني موجودة...

گاعدين اني وماما بالمطبخ نحضر بالغده وماخذتنا السوالف ..

-روند ماما شوكت ناوية ترجعين لبيت عمچ شوية احس عيب منهم

-مو هسه ما اريد اضغط على نفسي واتحمل شي فوق طاقتي..

هزت ماما راسها وگالت بنبرة حنونة..
-اهم شي راحتچ بنتي عسى ما تضلين سنة محد يجبرچ على شي واني موجودة اني ما مضحية بيچن انتِ واختچ ..

ابتسمت بوجهها مطمنة ادري بيها كلمتها وحدة وبابا مستحيل يرفض الها طلب...

بس للأسف الضحكة والابتسامة الي رسمها مصعب على أيامي و وجهي انمحت بلحظة وحدة وبدون ما اعرف شنو صار الرعب تلبسنا اني و ماما وحدة تباوع بوجه الثانية من سمعنا الباب يندگ بقوة عجيبة حسينا بيه راح ينكسر رجف جسمي بقوة ولزمت ماما ايد ماما من شفتها تريد تطلع تفتح الباب..

-ماما فدوة لا تطلعين گلبي راح يوگف

نزلت ايدي وگالت -لچ ماما عوفيني لعد نضل خاتلين الباب انكسر

ركضت ماما تفتح الباب من الرعب الي حسيت بيه بوقتها سديت الباب مال المطبخ عليه بدون ما اقفله و اباوع من الشباك وجسمي يرجف...

فتحت عيوني بصدمة من فتحت ماما الباب وشفت حمزة شلون هجم ع البيت ودفع ماما بقوة بحيث وگعت بالباب وركض للبيت...

اخذني الخوف عرفته جاي علمودي ركضت احاول احمي نفسي بس للأسف ما لحگت كان اسرع مني دفع باب المطبخ من شافني جر رگبتي من ورا و ضرب راسي بالكاونتر...

شاغت روحي من قوة الضربة راسي افتر ما انطاني مجال افتهم شي رجع يلزمني من نفس المكان بأيد وبالثانية يضرب راشديات ويصيح بصوت عالي..

-ولچ سا*** وبنت ***** وگح*** اني تسوين بيه هيچ ولچ انيييي

سمعت امي تصيح ولازمه ايده تريده يتركني بس ما تگدر عليه ومستمر يغلط ويفشر ويضرب واني مثل الميتة بأيده..

حسيت عليه من دفع امي مرة ثانية وبدأ يصيح عليها ويحچي كلام ما افتهمت منه شي...

-بنتچ الگ***الي تدافعين عليها رافعة قضية خلع تريد تطلگ الخاتون لزميها ربيها يلا تدافعين لزمي گ***چ

امي اخذتها الصفنة تريد تفتهم واني جسمي مثل الي تعود ع الوجع الضرب مالته ما يأثر بيه بس هو كل شوية يسحلني من جهة ويصفگني ..