الهَواجس

الحـلقة الأربـعون

الكـاتبة شهد 🖤

هل تدركين
‏إلى أي حدٍ أنا مغروم
‏أبتعد عنكِ
‏وأعود بعد بضعِ ساعات
‏لأطمئن
‏على أنكِ لا زلتي تُحبيني ؟

____________________________

رقية

من بعد ما خلصت الخطوبة وكل العالم رجعت لبيوتها وضليت وحدي اني وفرحتي المكسورة..

كل تخيلاتي للسعادة والفرحة بهاليوم راحت مثل السراب واختفت من گدامي سعادتي بالشخص الي احبه وتمنيته انتهت بنفس اليوم الي حصلته بيه ماعرف هذا حظي سيئ لو اني استعجلت ...

ضلت الافكار تطحن وتطحن براسي والثگل نايم على گلبي بسبب التفكير ضليت على هالحال لحد ما نمت احسن شي باچر جمعة ما اشوفه ولا يشوفني بلكي يتحسن الوضع شوية..

گعدت الصبح و اول ما فتحت عيني خطر هو على بالي ورجعت لنقطة الصفر بالأفكار تأفأفت وگمت غسلت ورتبت نفسي ونزلت جوا ولأن گاعدة من وكت كلها نايمة شغلت الصوبة بالمطبخ وحطيت مي ع الطباخ حتى اشرب حليب وگعدت اتدفى...

شوية شوية بدأو اهلي يگعدون ويصير بالبيت حياة ملتمين ع الريوگ بهدوء بس كل واحد عايش بأفكاره وتخيلاته..

خلص الريوگ وكل واحد راح على شغله واني على گعدتي لحد ما حچت ماما ..

-گومي ماما رقية غسلي المواعين ورجعي شغلي الغسالة على ملابس اخوانچ

-تره عروس ما يصير اشتغل

العودة مال الماسحة چانت قريبة منها رفعتها بوجهي وصاحت...

-ولج ابلش بيچ هسه ازورگ جسمچ اشوفچ العروس شلون تصير گومي بلا طول لسان

هزيت راسي بخوف وگمت بسرعة واني احچي ..

-گمت اعصابچ والله گمت

وفعلاً تحركت اخلص الشغل اني وماما و روند كل وحدة عليها شغلة..

من بعد ما خلصنا تقريباً صارت بالعشرة الصبح اندگت الباب طلعت ماما تفتحها وبسرعة اجتنا للمطبخ واني و روند گاعدين ندگ سوالف...

-گومن بسرعة گومن

فزينا بسرعة ثنينا بنفس الوقت وصحنا..

-ها شصار

-بسرعة روند سوي چاي وانتِ العروس بدلي ملابسچ خالتچ وبنتها اجو

التفتت على روند مصدومة ونطقت..

-منو خالتي وبنتها

فرت ماما حلگها مستهزئة وگالت..

-ام علي عيني عيالچ

بلمح البصر اختفيت من گدامها ركض بدلت ملابسي ومشطت شعري ومن كل عقلي واگفة على المراية اضرب بخدودي حتى يصيرن حمر ونزلت اركض..

-ها روند شلون طالعة حلوة مو

التفتت روند عليه من بعد ما چانت ترتب بصينية وگالت..