الهَواجس

الحـلقة الخـامسة

الكـاتبة شهـد 🖤

‏كُلما أردت أن أكون وحيدًا أغلقت الأبواب جميعًا على العالم، إلا واحدًا أُبقيه مُواريًا.. لأجلكِ.

______

روند

مرت يومين ع العقد مالتي بديت اتقبل وضعي واحاول اخمن شنو الي راح يصير احاول من هاللحظة اجهز لنفسي لجملة اني تزوجت عليج ..

يمكن بلحظتها اكون متعلقة بيه ممكن احبه ومستحيل اگدر اوصل لشعوري بمجرد تخيل يمكن البعض يلومني لأن وافقت من الاساس اتزوجه وليش اجيب الهم لنفسي بس محد جرب شعوري من امي تدورلي عرسان واي واحد يجي يشوفني ويشوف عيني يگولون الجملة المعروفة عدنا

"يومين ونردلكم الخبر" ويروحون بعد ما يجون وكلها تعرف الغلط بمنو نظرات الشفقة الي اتحملها وكلمة ان شاء الله يجي نصيبها تأذي خصوصا طالعة من اقرب الاشخاص الج واكيد الحياة تكون اصعب من انتِ شخصية وحيدة لا دراسة ولا صديقة ولا موبايل الي هو ابسط حق ممكن تحصله اي بنية بالدنيا كان عدنا بالعائلة مايصير الا من تتزوج ..

عادات وتقاليد تخلي العاقل يسلك طريق الجنون بأختصار...لهالسبب احس حياتي ويه شخص مايحبني او مو متقبلني كـ زوجة ما راح تكون اسوء من حياتي الحالية اعتقد راح اگدرلها وشگد جنت غلطانة لأن فكرت بهالتفكير الغبي....

نزلت من غرفتي للمطبخ شفت امي واگفة ع الطباخ تگلب بالجدر

-محتاجة شي اساعدج بيه ماما

-سوي الزلاطة علما تجي اختج من المدرسة ونصب الغده

-صار

گعدت اثرم بالزلاطة اجت گعدت يمي وگالت بنبرة خافتة

-اعرف بشنو تفكرين بس ماكو شي صح

-بشنو افكر ماما

رفعت عيني عليها واني عاقدة حاجبي ماعرفت قصدها

-كل بالج اني اريد ازوجج واخلص منح اني اعرف شنو براسج بدون ماتحجين..

نزلت دمعتها وكملت..
-بالله العظيم ماكو شي من هالكلام بس اني ام بس تصيرين ام راح تعرفين الهم الي شايتله اني ماريد اخليج تحسين بنقص عن البنات ماريد يجي يوم تدعين عليه وتگولين امي خربت حياتي كافي عليه من تركتي مدرستج بسبب عينج ماريد يجي يوم ويعايرونج بالزواج ويكسرون گلبج..

اسمعها وگلبي يتفتت ماعرف ألومها لو ألوم نفسي دموعها تجري وتشهگ واني احس نفسي تربطت لا اعرف اواسيها ولا اعرف اواسي نفسي...

تقربت منها حضنتها بأيد وحدة..

-كافي يمه وغلاتج عندي مازعلانة ولا شايلة بگلبي عليج

اخذت نفس عميق واردفت

-بعدين بيت عمي حبابين وعمة كلش حبابة وماعدها حركات خبيثة احس راح ارتاح يمهم شفتي شلون اخذتني للسوگ واشترتلي الذهب والموبابل وكله من الغالي واحسن شي..
لاتضلين تفكرين واني مسامحتج على كل شي دنيا واخرة ..