الهَواجس

الحـلقة الخامسـة والأربعون (قبل الـاخيرة)

رچيچة الروح يـمعود

تصويت +تعليق +متابعة للحساب حبايب

____________________________

روند

عيونه شاخصة بوجهي مخنزر عليه اعصابه تريد تنفجر من بعد الي نطقته حسيت نفسي تسرعت او ممكن الوقت كان مو مناسب لكلامي ما ادري شسويت ردة فعله وترتني...

دفع الكرسي وگام يفتر بالمطبخ ادينه شابكهن ليورا ومنزل راسه للأرض كل شوية يرفع راسه يخزرني ويرجع يفتر لحد ما رجع گعد وضرب الطاولة بثلاث اصابع وكز اسنانه وگال...

-عقلچ مستوعب الي گلتيه لو تحچين بدون تفكير انتِ

عقدت حاجبي من كلامه وگلت والضوجة مبينة بصوتي

-شنو قصدك يعني ما افتهم غبية احچي بدون تفكير

-لأن هذا الي واضح

-نعممم

-نعامة

خزرته ودرت وجهي عنه زعلانة من كلامه بس لأول مرة ما اهتم لزعلي وكمل كلامه بعصبية...

-عقلچ مغير مكانه حبيبي

-مصعببب

-وجعة ابوي سديه لا اعرف شلون اسده

جر نفس بعمق وغير نبرة صوته وصدمني من گال..

-اهلچ حالياً مفكرين اني عاقد عليچ وجابرچ يعني اذا مفكرة تساوميني ع الزواج في سبيل ترجعين الهم گطعنة وطلعيها من أذنچ...

وگفت بسرعة على طولي واحچي مفرفحة..

-شنوووو عيني عيد بالله عيد يعني اهلي عبالهم اني متزوجة هسه

-اي

-مصعب شلون تتصرف وحدكك بس فهمني ليش كل خطوة تسويها اني اخر من يعلم

-لأن ادري بيچ تفكرين بگلبچ مو بعقلچ ومع الأسف گلبچ مو عليه على اهلچ تريدين اهلچ لسه ما وصلتي للمرحلة الي اني وصلت الها بهالعلاقة...

-يامرحلة قصدك

-مرحلة الي اني (ما اريد غيرها بهالدنيا لا اهل ولا وضيفة ولا اصدقاء هي غانيتني عن الكل)

غمضت عيوني ومسحت وجهي مقهورة من نبرة صوته وكلامه مادري شلون افهمه اني احبه واموت ع النفس الي يتنفسه بس ما اريد اخسر اهلي ما اريد احس نفسي يتيمة واني اهلي عايشين ما اريد اوصل لمرحلة من الحياة اذا تعاركت وياه او أذاني احتار وين اروح اريد سند الي غيره كل شي يصير بزواجي من حمزة اتدمرت بس لأن ابن عمي كانوا اهلي وياه ضدي ما اريد هالشي ينعاد عليه ...

رجعت گعدت اباوعله وهو يباوع بعيوني بتعب ادري ضغطت عليه وتعبته بس ما باليد حيلة...

-شلون هسه مصعب اني مستحيل اسوي شي بدون علم اهلي